އަންހެން ޗެމްޕިއަންކަން އެމް.ބީ.އެސް އަށް, ފިރިހެން ޗެމްޕިއަންކަން އެމް.އައި އަށް

ބީ.އެމް.އެލް އެމް.އެން.ޔޫ.އެސް.ޔޫ ފުޓްސެލް ފިއެސްޓާ 2024 ގެ އަންހެން ޑިވިޝަނުގެ ޗެމްޕިއަންކަން ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) ބަލިކޮށް މޯލްޑިވްސް ބިޒްނަސް ސްކޫލް (އެމް.ބީ.އެސް) އިން ހޯދިއިރު, ފިރިހެން ޑިވިޝަނުގެ ޗެމްޕިއަންކަން ފެކަލްޓީ އޮފް އެޑިއުކޭޝަން (އެފް.އީ) ބަލިކޮށް އެމް.އައި ކޮލެޖުން ހޯދައިފި އެވެ.

8 ނޮވެމްބަރު ވީ ހުކުރު ދުވަހުގެ ރޭ ހުޅުމާލެ, ރެހެންދި ފުޓްސަލް ދަނޑުގައި ކުރިއަށްދިޔަ މި މުބާރާތުގެ ފައިނަލް މެޗުތައް ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ނައިބު ހުސެއިން ލަތީފް އެވެ. ނައިބު ރައީސްގެ އިތުރުން މޯލްޑިވްސް ނެޝަލަން ޔުނިވަރސިޓީ (އެމް.އެން.ޔޫ) ގެ ވައިސް ޗާންސެލަރ އަދި ކުޅިވަރާ ބެހޭ ވަޒީރު އަބްދުﷲ ރާފިއު ވެސް މި މެޗުތައް ޝަރަފުވެރިކޮށްދެއްވި އެވެ.

އަންހެން ޑިވިޝަނުގެ ފައިނަލުގައި އެމް.ބީ.އެސް އިން ނުކުތީ, ސީ.އެފް.އެސްއާ ދެކޮޅަށެވެ. މި މެޗު އެމް.ބީ.އެސް އިން ކާމިޔާބުކުރީ, 6-0 ގެ ނަތީޖާ އަކުންނެވެ.

މި މެޗުގައި އެމް.ބީ.އެސްގެ ފާތިމަތު އަޒުމާ އަހުމަދު، ފާތިމަތު ސާމިރާ، ފާތިމަތު ސާއިނާ، ފާތުމަތު ނުޒުމާ ނާޒިމް އަދި ސަނިއްޔާ އަބްދުއް ސަމަދު މިއިން ކޮންމެ ކުޅުންތެރިއަކު ލަނޑެއް ކާމިޔާބުކުރިއިރު، އެޓީމުގެ އަނެއް ލަނޑަކީ ސީއެފްއެސްގެ ސަދާ އަންވަރު އަތުން ބައިކޮޅަށް ވަން ލަނޑެކެވެ. މި މެޗުގެ މޮޅު ކުޅުންތެރިޔަކަށް އެމް.ބީ.އެސްގެ ސައިނާ ހޮވުނިއިރު, އޭނާ ވަނީ މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމުވެސް ހޯދައިފަ އެވެ.

މީގެ އިތުރުން, ފިރިހެން ޑިވިޝަނުގެ ޗެމްޕިއަންކަން އެމް އައި ކޮލެޖުން ހޯދީ ފައިނަލުގައި އެފް.އީގެ މައްޗަށް 3-0 ގެ ނަތީޖާއަކުން ކުރިހޯދައިގެންނެވެ.

މި މެޗުގެ ފުރަތަމަ ހާފުގެ 10 ވަނަ މިނެޓުގައި އެމްއައި ކޮލެޖުގެ މުހައްމަދު މިންވާލް ގޯލު ޖަހާ އެ ޓީމަށް ލީޑު ނަގައިދިނެވެ. އެކަމަކު ފުރަތަމަ ހާފުގައި އެމްއައި އަށް އިތުރު ގޯލެއް ޖެހުމުގެ ފުރުސަތު ނުދީ އެފްއީ އިން ވަނީ ވަރުގަދަ ޑިފެންސެއް ކޮށްފަ އެވެ.

އެކަމަކު ދެވަނަ ހާފުގެ ކުރީކޮޅު މިންވާލް ވަނީ އިތުރު ގޯލެއް ޖަހާ އެ ޓީމުގެ ލީޑު ފުޅާކޮށްދީފަ އެވެ. އަދި މެޗު ނިމެން ކުޑަތަންވެފައި ވަނިކޮށް އެމްއައިގެ އިބްރާހިމް ނޫރައްދީން ވަނީ އެ ޓީމުގެ ތިންވަނަ ގޯލު ޖަހާދީފަ އެވެ.

މި މުބާރާތުގެ ފިރިހެން ޑިވިޝަނުގެ ޗެމްޕިއަންކަން އެމްއައި އިން ހޯދިއިރު, މި ޑިވިޝަނުގެ މޮޅު ކުޅުންތެރިޔާގެ މަގާމު ހޯދީ މިންވާލް އެވެ.

މިއަހަރުގެ މުބާރާތުގެ ޓައިޓަލް ސްޕޮންސަރަކީ ބޭންކް އޮފް މޯލްޑިވްސް (ބީ.އެމް.އެލް) އެވެ.