ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ 6 ވަނަ ދައުރުގެ ހިންގާ ކޮމިޓީ އިފްތިތާޙުކޮށްފިއެވެ. ހިންގާ ކޮމިޓި އިފްތިތާޙު ކުރުމުގެ ޖަލްސާ ބާއްވާފައިވަނީ ނޮވެމްބަރ މަހުގެ 5 ވީ އާދީއްތަ ދުވަހުގެރޭ ފެކަލްޓީ އޮފް އެޑިއުކޭޝަންގެ އޮޑިޓޯރިއަމްގައެވެ. މި ޖަލްސާ ޝަރަފްވެރި ކޮށްދެއްވާފައިވަނީ ސިވިލްސާރވިސް ކޮމިޝަންގެ ރައީސް ޑރ. އަލީ ޝަމީމެވެ. އަދި މާފަންނު ދެކުނުދާއިރާގެ އިއްޒަތްތެރި މެންބަރު އަލްފާޟިލް އަބްދުﷲ ރިފާޢު ވެސް މި ރަސްމިއްޔާތުގައި ބައިވެރިވެވަޑައިގެންފައިވެއެވެ. މީގެ އިތުރުން ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ފަވާޒް ޝަރީފް އާއި ޑެޕިއުޓީ ވައިސް ޗާންސެލަރ އަލްފާޟިލާ އައިޝަތު ޝާހީން އަދި ޑރ. މުޢާވިޔަތު މުޙަންމަދު އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު ބައިވެރިވެވަޑައިގެންފައިވެއެވެ.
މިޖަލްސާގައި އެމް.އެން.ޔޫ.އެސް.ޔޫއަށް އެކި ގޮތްގޮތުން އެހީތެރިވެދިން ފަރާތްތަކަށާއި ރީތިނަން ހޯދައިދިން ދަރިވަރުންނަށްވަނީ އެވޯޑް ދެވިފައެވެ. އަދި އެމް.އެން.ޔޫ.އެސް.ޔޫގެ ފާއިތުވެދިޔަ އަހަރުގެ ވީޑިއޯ ރިޕޯޓެއްވެސްވަނީ ދައްކާލާފައެވެ. މި ރިޕޯޓުގައި ވޭތުވެދިޔަ އަހަރުތަކުގައި އެމް.އެން.ޔޫ.އެސް.ޔޫއިން ހިންގާފައިވާ ހަރަކާތްތަކާއި ހޯދާފައިވާ ކާމިޔާބީތަކުގެ ވާހަކަވަނީ ހިމަނާފައިވެއެވެ. ވީޑިއޯ ރިޕޯޓަށްފަހު 2017 ވަނަ އަހަރުގެ އެންމެ ހަރަކާތްތެރި ވިންގް (ގޮފި) ހޮވާފައިވެއެވެ. 2017 ވަނަ އަހަރުގެ އެންމެ ހަރަކާތްތެރި ގޮތްޕަކަށް ހޮވިފައިވަނީ ފެކަލްޓީ އޮފް ހެލްތް ސައިންސަސްގެ ގޮފި ”ހީލާރސް“އެވެ.
އެންމެ ހަރަކާތްތެރި ގޮތްޕަށް އެވޯޑް ހަވާލުކުރުމަށްފަހު އެމް.އެން.ޔޫ.އެސް.ޔޫގެ 6ވަނަ ދައުރުގެ ހިންގާ ކޮމިޓީއަށް މަޤާމުގެ ލިޔުން ހަވާލުކުރެވުނެވެ. މި ލިޔުން ހަވާލުކޮށްދެއްވާފައިވަނީ މި ޖަލްސާގެ ޝަރަފްވެރި މެހެމާނު ސިވިލްސާރވިސް ކޮމިޝަންގެ ރައީސް ޑރ. އަލީ ޝަމީމެވެ.
އެމް.އެން.ޔޫ.އެސް.ޔޫގެ 6ވަނަ ދައުރުގެ ހިންގާ ކޮމިޓީގެ މެންބަރުންނަށް ހޮވިފައިވަނީ:
- ރައީސް – އަރުޝަދު އަޝްރަފް
- ނައިބުރައީސް (ޢިލްމީ) – އާދަމް ރުޝްދީ
- ނައިބުރައީސް (ގޮފިތައް) – ޢަލީ ޝަމްއޫން
- ނައިބުރައީސް (ޢަމަލީ) – ހަސަން ޝާޙް
- މީޑިއާ ކޯޑިނޭޓަރ – މުހަންމަދު ޝާން އާމިރު
- ހަޒާންދާރު – އަބްދުﷲ ޝަހުނީޒް
- ސެކްރެޓަރީ – އަނާ އަޙްމަދު
- އެސިސްޓަންޓް ސެކްރެޓަރީ – ހައްވާ ނައުޝާ
ހިންގާ ކޮމިޓީގެ މެންބަރުންނަށް މަޤާމުގެ ލިޔުން ހަވާލުކުރުމަށްފަހު، އެމް.އެން.ޔޫ.އެސް.ޔޫގެ ރަމްޒީ ދަންމަރު ވަނީ އެމް.އެން.ޔޫ.އެސް.ޔޫގެ 6 ވަނަ ދައުރުގެ ހިންގާކޮމިޓީގެ ރައީސް އަލްފާޟިލް އަރުޝަދު އަޝްރަފްއަށް ހަވާލުކުރެވިފައެވެ. މި ޖަލްސާގައި ޝަރަފްވެރި މެހެމާނު ސިވިލްސާރވިސް ކޮމިޝަންގެ ރައީސް ޑރ. އަލީ ޝަމީމް ވާހަކަފުޅު ދައްކާފައިވެއެވެ. އަދި އެމް.އެން.ޔޫ.އެސް.ޔޫގެ 6 ވަނަ ދައުރުގެ ރައީސް އަލްފާޟިލް އަރުޝަދު އަޝްރަފްގެ އިތުރުން ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުން ތަމްސީލުކުރާ ކައުންސިލް މެންބަރު އަލްފާޟިލް އަލީ ރަޝީދު ވެސް ވާހަކަފުޅު ދައްކަވާފައިވެއެވެ. އަދި އެމް.އެން.ޔޫ.އެސް.ޔޫ ގެ ރައީސް އަރުޝަދު އަޝްރަފާއި ކައުންސިލް މެންބަރު އަލީ ރަޝީދުވަނީ އެއްބާރުލުންދިނުމުގެ ފަހުމުނާމާއެއްގައި ސޮއިކުރައްވާފައެވެ.
