ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މުހައްމަދު ލަޠީފް، އެމް.އެން.ޔޫ.އެސް.ޔޫގެ ހިންގާ ކޮމިޓީ އާއި ބައްދަލުކުރައްވައިފިއެވެ. 8 ނޮވެންބަރު 2017 ވަނަ ދުވަހު ބޭއްވިގެންދިޔަ މި ބައްދަލުވުމުގައި އެމް.އެން.ޔޫ.އެސް.ޔޫ ހިންގާ ކޮމިޓީގެ ޖުމްލަ 5 މެންބަރުންވަނީ ބައިވެރިވެފައެވެ.
މި ބައްދަލުވުމުގައި ޗާންސެލަރ ޑރ. މުހައްމަދު ލަޠީފް ވަނީ އެ ބޭފުޅާ ދަރިވަރެއްގެ ގޮތުގައި އުޅުއްވިއިރުގެ ތަޖުރިބާ ޙިއްޞާކުރައްވާފައެވެ. އަދި ހިންގާ ކޮމިޓީގެ މެންބަރުންގެ މަސައްކަތްތައް ބައްޓަންކުރަންވީ ގޮތުގެ ތަފްޞީލީ އަދި މުހިއްމު މަޢުލޫމާތުތަކެއް ޗާންސެލަރ ވަނީ ދެއްވާފައެވެ. އަދި މީގެ އިތުރުން އެމް.އެން.ޔޫ.އެސް.ޔޫގެ މަސައްކަތްތައް ކުރިއަށްގެންދިއުމަށް ހިތްވަރުދެއްވާ، މިހާރު ކުރަމުންގެންދާ މަސައްކަތްތަކަށްވަނީ ތަޢުރީފުވެސް ކުރައްވާފައެވެ.
ޗާންސެލަރ ގެ އޮފީހުގައި ކުރިއަށްދިޔަ މި ބައްދަލުވުމުގައި، އެމް.އެން.ޔޫ.އެސް.ޔޫގެ ފަރާތުން ވާހަކަދައްކަވަމުން ރައީސް އަރުޝަދު އަޝްރަފް ވަނީ އެމް.އެން.ޔޫ.އެސް.ޔޫގެ ހިންގާ ކޮމިޓީ އާއި އެންމެހާ މެންބަރުންނަށް ޗާންސެލަރ ބަހައްޓަވާ ގާތްކަން ފާހަގަ ކުރައްވާ ޝުކުރުއަދާކުރައްވާފައެވެ. އަދި ކުރިއަށް އޮތް އަހަރުގައި (2018)ވެސް އެ ގާތްކަމާއި އެއްބާރުލުން އޮންނާނެކަމުގެ ފުރިހަމަ އިތުބާރު އެބަ އޮތްކަމަށް ވިދާޅުވިއެވެ.
