ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ފަވާޒް ޝަރީފް އަދި ޑެޕިއުޓީ ވައިސް ޗާންސެލަރުން ކަމުގައިވާ ޑރ. މުޢާވިޔަތު މުހައްމަދު އަދި އަލްފާޟިލާ ޢާއިޝަތު ޝާހިން އާއި އެމް.އެން.ޔޫ.އެސް.ޔޫގެ ހިންގާ ކޮމިޓީއިން ބައްދަލުކުރައްވައިފިއެވެ. 19 ޑިސެމްބަރ 2017ވީ އަންގާރަދުވަހުގެ ހެނދުނު 10.30 ގައި ބޭއްވުނު މި ބައްދަލުވުމުގައި ވަނީ ތަފާތު ގިނަ މަޝްވަރާތަކެއް ކުރިއަށްގޮސްފައެވެ. މި ބައްދަލުވުމުކީ އެމް.އެން.ޔޫގެ އިސް މެނޭޖްމަންޓްގެ ބޭފުޅުންނާއި ބައްދަލުކުރެއްވުމަށް އެމް.އެން.ޔޫ.އެސް.ޔޫގެ ހިންގާ ކޮމިޓީއިން ހިންގާ ސިލްސިލާ ބައްދަލުވުންތަކުގެ ތެރެއިން ބައްދަލުވުމެކެވެ. މީގެ ކުރިން، އެމް.އެން.ޔޫ.އެސް.ޔޫގެ ހިންގާ ކޮމިޓީއިން ވަނީ އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފާއި، ޑީން އޮފް ސްޓޫޑެންޓްސް އަލްފާޟިލާ ނާދިޔާ ޢަހްމަދާއިވެސް ބައްދަލުކުރައްވައިފައެވެ.
އެމް.އެން.ޔޫގެ ”އޭ“ ބުލޮކުގެ ދެވަނަ ފަންގިފިލާގެ ސެމިނަރ ރޫމުގައި ކުރިއަށްދިޔަ މި ބައްދަލުވުމުގައި އެމް.އެން.ޔޫ.އެސް.ޔޫގެ ފަރާތުން ރައީސް އަރުޝަދުވަނީ އެމް.އެން.ޔޫ.އެސް.ޔޫގެ މިހާރު ހިނގަމުންދާ މަސައްކަތްތަކުގެ ތަފްޞީލު ވައިސް ޗާންސެލަރ އަދި ޑެޕިއުޓީ ވައިސް ޗާންސެލަރުންނާ ޙިއްޞާ ކުރައްވާފައެވެ. އަދި އެމް.އެން.ޔޫ.އެސް.ޔޫގެ ބައެއް ނިންމުންތައް ނިންމުމުގައި އެބޭފުޅުންގެ އަރިހުންވަނީ އިރުޝާދަށް އެދި ލައްވާފައެވެ. ހަމަ މިއާއެކު، އެމް.އެން.ޔޫ.އެސް.ޔޫގެ ފަރާތުން އެމް.އެން.ޔޫގައި ސްޕޮންސަރުންގެ އިޝްތިހާރު ކުރެވިދާނޭ ގޮތްތަކާއިބެހޭގޮތުންވަނީ ސުވާލު ކުރައްވާފައެވެ.
އެމް.އެން.ޔޫ.އެސް.ޔޫގެ ހިންގާ ކޮމިޓީގެ 7 މެންބަރުން ބައިވެރިވި މި ބައްދަލުވުމުގައި، ވައިސް ޗާންސެލަރ، އަދި ޑެޕިއުޓީ ވައިސް ޗާންސެލަރުންގެ ފަރާތުންވަނީ ގިނަ އިރުޝާދުތަކަކާއި މުހިއްމު މަޢުލޫމާތުތަކެއް ދެއްވާފައެވެ. މިގޮތުން، ޑެޕިއުޓީ ވައިސް ޗާންސެލަރ ޑރ. މުޢާވިޔަތު މުޙައްމަދުގެ ވާހަކަފުޅުގައި، އެމް.އެން.ޔޫގެ ފިނޭންސް ޑިޕާޓްމެންޓުން އެމް.އެން.ޔޫ.އެސް.ޔޫ އާއި އެކު ބާއްވަމުން އަންނަ ގާތް ގުޅުމަށްވަނީ އިޝާރާތް ކުރައްވާފައެވެ. މީގެ އިތުރުން އެމް.އެން.ޔޫ.އެސް.ޔޫގެ ހިންގުން އިތުރަށް ކުރިއެރުވާނޭ ގޮތުގެ ލަފާވެސް ވަނީ އަރުވާފައެވެ. ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީންގެ ވާހަކަފުޅުގައި އެމް.އެން.ޔޫ.އެސް.ޔޫގެ މަސައްކަތްތަކަށްވަނީ ތަޢުރީފުކުރައްވާފައެވެ. އަދި ތަޢުލީމީގޮތުންނާއި، ކުޅިވަރުގެ ދާއިރާއިން ޙަރަކާތްތައް ބޭއްވުމުގައި ވިސްނާލަންޖެހޭ ބައެއް ނުޤުތާތަކަށްވަނީ އަލިއަޅުވާލާފައެވެ.
ޖުމްލަ 2 ގަޑިއިރަށް ދެމިގެންދިޔަ މި ބައްދަލުކުރެއްވުމުގައި ވައިސް ޗާންސެލަރ ޑރ. ޢަލީ ފަވާޒް ޝަރީފްވަނީ އެމް.އެން.ޔޫ.އެސް.ޔޫގެ ވޭތުވެދިޔަ ދައުރުތަކުން އެމް.އެން.ޔޫގެ މެނޭޖްމަންޓާއި ދެމެދު ބޭއްވި ގުޅުން ފާހަގަކުރައްވާފައެވެ. އަދި އެބޭފުޅާގެ ވާހަކައިގައި ވޭތުވެދިޔަ 2 އަހަރަކީ އެމް.އެން.ޔޫ.އެސް.ޔޫގެ އެންމެ ޙަރަކާތްތެރި 2 އަހަރުކަމަށްވެސްވަނީ ވިދާޅުވެފައެވެ. މީގެ އިތުރުން، އެމް.އެން.ޔޫގެ ފެކަލްޓީތަކަށް ގެނެވިފައިވާ ބަދަލުތަކުގެ ތަފްޞީލުވެސްވަނީ އެމް.އެން.ޔޫ.އެސް.ޔޫގެ ހިންގާކޮމިޓީ އާއި ޙިއްޞާކުރައްވާފައެވެ.
”އަޅުގަނޑުގެ ވަރަށްބޮޑު ހުވަފެނެއް އެއީ ޔޫނިއަންގެ ސީދާ ބެލުމުގެ ދަށުން، ދަރިވަރުންގެ ފުރިހަމަ ޙިއްޞާ އާއި އެކު މުޅީން ތަފާތުކަމެއް ޔޫނިއަންއިން ކުރުން.“
އެމް.އެން.ޔޫ.އެސް.ޔޫ އިން ޙަރަކާތެއް ހިންގުމަށް ލަފާ ދެއްވަމުން ވައިސް ޗާންސެލަރ ޑރ. ޢަލީ ފަވާޒް ޝަރީފް ވިދާޅުވިއެވެ. މިގޮތުން އެ ޙަރަކާތްވާން ޖެހޭނީ ދިގު މުއްދަތަކަށް ކުރިއަށްދާ ޙަރަކާތެއްގެ އިތުރުން، ދަރިވަރުންގެ ބައިވެރިވުންވެސް ސީދާގޮތުން ހިމެނޭ ޙަރަކާތަކަށް ކަމަށް އެބޭފުޅާވަނީ ވިދާޅުވެފައެވެ. ހަމަ މިއާއެކު އެމް.އެން.ޔޫ.އެސް.ޔޫގެ ފަރާތުން ކުރާނޭ ޙަރަކާތްތައް ރޭވުމުގައި މުޖުތަމަޢުގެ ލާބަ އާއި މަންފާއަށް ކުރެވޭ ބައެއް ޙަރަކާތްތައް ހިމެނުމަށް ވައިސް ޗާންސެލަރ ވަނީ އިރުޝާދު ދެއްވާފައެވެ. މި ބައްދަލުވުންވެގެންދިޔައީ އެމް.އެން.ޔޫ.އެސް.ޔޫގެ ހިންގާ ކޮމިޓީއަށް ނުހަނު ބޭނުންތެރި އަދި މުހިއްމު މައުލޫމާތުތަކެއް ލިބިގެންދިޔަ ބައްދަލުވުމަކަށެވެ.
