ސެންޓަރ ފޯ ފައުންޑޭޝަން ސްޓަޑީޒްގައި ޤާއިމްކުރެވިފައިވާ ގޮފިކަމަށްވާ ”ތަރަޙަ“ އާއި އެކު ”ގޮފިތަކުގެ ބައްދަލުވުން“ތަކުގެ 5 ވަނަ ބައްދަލުވުން ބާއްވައިފިއެވެ.

”ތަރަޙަ“އިގެ ހިންގާ ކޮމިޓީގެ 5 މެންބަރުން (މީޑިއާ ކޯޑިނޭޓަރ ފިޔަވައި އެހެން ހުރިހާ މެންބަރުން) އަދި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީގެ 5 މެންބަރުން (ރައީސް، ނައިބު ރައީސް (ގޮފިތައް)، ނައިބު ރައީސް (ޢިލްމީ)، ޚަޒާންދާރު އަދި މީޑިއާ ކޯޑިނޭޓަރ) ބައިވެރިވިއެވެ. 05 އޭޕްރީލްވީ ބުރާސްފަތިދުވަހުގެރޭ 08:00ގައި ބޭއްވުނު މި ބައްދަލުވުމުގައި މި ބައްދަލުވުންތަކުގެ ތަޢާރަފެއްދެއްވީ ޔޫނިއަންގެ ރައީސް އަރުޝަދު އަޝްރަފެވެ. އެއަށްފަހު ޔޫނިއަންގެ ނައިބު ރައީސް (ގޮފިތައް) ޢަލީ ޝަމްޢޫން ވާހަކަ ދެއްކެވިއެވެ. ޝަމްޢޫންގެ ވާހަކަފުޅުގައި ތަރަޙަ ގޮފީގެ ފަރާތުން މިއަހަރު އަމިއްލައަށް ޙަރަކާތެއް ކުރިއަށްގެންދާނެކަމަށް އުއްމީދުކުރާ ކަމަށް ވިދާޅުވިއެވެ. އަދި ޙަރަކާތްތައް ބޭއްވުމުގައި އެހީތެރިކަމެއް ބޭނުންވާނަމަ ޔޫނިއަން އޮންނާނީ އަބަދުވެސް ތައްޔާރަށްކަމަށް ވިދާޅުވިއެވެ. ޝަމްޢޫނަށް ފަހު ޔޫނިއަންގެ ނައިބު ރައީސް (ޢިލްމީ) އާދަމް ރުޝްދީ ވާހަކަފުޅު ދެއްކެވިއެވެ. ރުޝްދީގެ ވާހަކަފުޅުގައި ތަރަޙަ ގޮފީގެ ފަރާތުން ރާވާފައިވާ ޙަރަކާތްތަކާއިބެހޭގޮތުން ސުވާލުކުރެއްވިއެވެ. އަދި ޙަރަކާތްތައް ރޭވުމުގައި ޢިލްމީ ޙަރަކާތްތައް ހިމެނުމަށް ނަޞޭހަތްތެރިވިއެވެ. މީގެ އިތުރުންވެސް ޔޫނިއަންގެ ޚަޒާންދާރު އަދި މީޑިއާ ކޯޑިނޭޓަރވެސް ބައްދަލުވުމުގައި ވާހަކަދެއްކެވިއެވެ. މިގޮތުން ފައިސާގެ މުޢާމަލާތްތައް ކުރުމާއި ބަޖެޓު ރިޕޯޓުފަދަ ތަކެތި ހެދުމުގައި އަބަދުވެސް އެހީތެރިކަން ފޯރުކޮށްދޭނެކަމަށް ޚަޒާންދާރު ޢަބްދުﷲ ޝަހުނީޒް ވިދާޅުވިއިރު، މިހާރަށްވުރެ ބޮޑަށް މީޑިއާގެ ޕްލެޓްފޯމްތައް ޙަރަކާތްތެރިކުރުމަށާއި، ޙަރަކާތްތައް ހިންގާއިރު މީޑިއާގެ ހުރިހާ ވަޞީލަތަކުން ކަވަރ ކުރުމަށް، ޔޫނިއަންގެ މީޑިއާ ކޯޑިނޭޓަރ މުޙައްމަދު ޝާން ޢާމިރު ވިދާޅުވިއެވެ.

”ވީހާވެސް ބޮޑަށް ފެކަލްޓީގެ ދަރިވަރުން ބޭނުންކޮށްގެން ޙަރަކާތްތައް ހިންގުމަށް މަސައްކަތްކުރަންވީ. އެކަކު އަނެކަކަށް އެހީތެރިވެ، އެއްބަޔަކަށްވެގެން ކާމިޔާބު ޙަރަކާތެއް ބާއްވާނެކަމަށް އުއްމީދުކުރަން.“

ޔޫނިއަންގެ ރައީސް އަރުޝަދު ބައްދަލުވުމުގައި ވާހަކަދައްކަވަމުން ވިދާޅުވިއެވެ.

މި ބައްދަލުވުމުގައި ”ތަރަޙަ“ގޮފީގެ ހިންގާ ކޮމިޓީގެ ހުރިހާ މެންބަރުންވެސްވަނީ އެ މެންބަރުންގެ ޝުޢޫރު ފާޅުކުރައްވާފައެވެ. މިގޮތުން ގޮފީގެ ރައީސާ އާމިނަތު ނުބްލާ ވިދާޅުވީ ގޮފީގެ ޙަރަކާތްތައް ހިންގުމަށް އަބަދުވެސް މަސައްކަތްކުރަމުންދާކަމަށެވެ. އަދި ނައިބު ރައީސާ (ޢިލްމީ) ފާޠިމަތު ރައިނާ އަމްޖަދު ވިދާޅުވީ ޙަރަކާތްތައް ހިންގުމަށް އަބަދުވެސް ރާވާކަމަށާއި ނަމަވެސް އަދި ބޭއްވޭގޮތް ނުވަނީކަމަށެވެ. ނައިބު ރައީސާ (ޢަމަލީ) މަރިޔަމް އިފްހާމާ ޔޫސުފް، ގޮފިން ކުރިއަށް ރޭވިފައިވާ ބައެއް ޙަރަކާތްތަކަށް އަލިއަޅުވާލިއިރު، ޚަޒާންދާރު ފާޠިމަތު ޒިޔަން ޒަކީ ވިދާޅުވިގޮތުގައި ގޮފީގެ ޙަރަކާތްތައް ބޭއްވުމަށް ޔޫނިއަންގެ އެހީތެރިކަން ބޭނުންވެއެވެ.

”އަޅުގަނޑުމެންނަށް އެތައް ޙަރަކާތްތަކެއް ރޭވިފައިވޭ. އަދި ބޭއްވޭގޮތް ނުވަނީ. އިރާދަކުރެއްވިއްޔާ އަވަސް މުސްތަޤްބަލެއްގައި ޙަރަކާތެއް ބާއްވާނަން.“

ސެކްރެޓަރީ ޢާއިޝަތު ލަޔާލް އަޙްމަދު ބައްދަލުވުމުގައި ވިދާޅުވިއެވެ.

45 ވަރަކަށް މިނިޓަށް ކުރިއަށްދިޔަ މި ބައްދަލުވުން ކުރިއަށްދިޔައީ އެމް.އެން.ޔޫ.އެސް.ޔޫ އޮފީހުގައެވެ. މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. 5 ވަނަ ބައްދަލުވުން ތަރަޙަ އާއި އެކު ބޭއްވުނުއިރު، މީގެ ކުރިން ސިއާ، ފެސާ، ހީލާރސް އަދި ޝެޓްސް އާއި އެކު ބައްދަލުވުންތައް ކުރިއަށްގެންދެވިފައިވެއެވެ.