ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ރަސްމީ ޔޫޓިއުބް ޗެނަލް، ރަސްމީ ޓީޝާޓުގެ ފަރުމާ އަދި އާ ވެބްސައިޓް އިފްތިތާހުކޮށްފިއެވެ. ޔޫނިއަންގެ ގޮފިތަކުގެ ހިންގާ ކޮމިޓީތަކުގެ މެންބަރުންނަށް މަޤާމު ހަވާލުކުރެއްވުމަށް 16 ފެބުރުވަރީ 2018 ވީ ހުކުރުދުވަހުގެރޭ ”އެފް.އީ އޮޑިޓޯރިއަމް“ ގައި ބޭއްވުނު ރަސްމިއްޔާތުގައި، ޔޫނިއަންގެ ޔޫޓިއުބް ޗެނަލް، ރަސްމީ ޓީޝާޓު އަދި ވެބްސައިޓް އިފްތިތާހުކޮށްދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މުހައްމަދު ލަޠީފެވެ.
ޔޫނިއަންގެ ފަރާތުން މުޅިން އަލަށް ތަޢާރަފުކުރެވުނު ޔޫޓިއުބް ޗެނަލުން ޔޫނިއަންގެ ފަރާތުން ބައިވެރިވާ އަދި އިންތިޒާމުކުރާ އެކިއެކި ޙަރަކާތްތަކުގެ ވީޑިއޯ، ކުރިއަށް އޮތް ދުވަސްތަކުގައި ފެންނާނެއެވެ. ތަފާތު މުޙިއްމު އެކިއެކި ޙަރަކާތްތައް ޔޫނިއަންގެ މެންބަރުންނަށް ފަސޭހަކަމާއެކު ފޯރުކޮށްދިނުމުގެ މަޤްޞަދުގައި ތަޢާރަފުކުރެވުނު މި ޔޫޓިއުބް ޗެނަލްއަކީ ޔޫނިއަންގެ ފުރަތަމަ ޔޫޓިއުބް ޗެނަލްވެސްމެއެވެ. އެމް.އެން.ޔޫ.އެސް.ޔޫގެ ޔޫޓިއުބް ޗެނަލަށް ”ސަބްސްކްރައިބް“ ކުރެއްވުމަށް: http://tiny.cc/mnusu-youtube އަށް ޒިޔާރަތްކުރައްވާ!
ދަރިވަރުންގެ ޔޫނިއަންގެ ރަސްމީ ޓީޝާޓުގެ ފަރުމާ ވެސް މި ރަސްމިއްޔާތުގައި ވަނީ އިފްތިތާޙުކުރެވިފައެވެ. މިއީ ދަރިވަރުންގެ ޔޫނިއަންގެ ފަރާތުން ބާއްވާ އެކިއެކި ޙަރަކާތްތަކުގައި އިސްކޮށް ޙަރަކާތްތެރިވާ ދަރިވަރުންނަށް ޚާއްޞަކޮށްގެން ތަޢާރަފުކުރެވޭ ޓީޝާޓެކެވެ. މިގޮތުން، ޔޫނިއަންގެ ގޮފިތަކުގެ ހިންގާ ކޮމިޓީގެ މެންބަރުންނަށާއި، ޙަރަކާތްތަކުގައި ދަރުމަވެރިންގެ ގޮތުގައި ބައިވެރިވާ ދަރިވަރުންނަށް މީގެ ޓީޝާޓު ޔޫނިއަންގެ ފަރާތުން ފޯރުކޮށްދެވޭނެއެވެ.
ޔޫޓިއުބް ޗެނަލް އަދި ޓީޝާޓު ފަރުމާ އާއި އެކު ދެން ތަޢާރަފުކުރެވުނު ޔޫނިއަންގެ އާ ރަސްމީ ވެބްސައިޓަކީ ޔޫނިއަންގެ ކުރީގެ ވެބްސައިޓަށް މައްސަލަތަކެއް ކުރިމަތިވުމުން، މުޅީން އަލަށް ތަޢާރަފުކުރެވޭ ވެބްސައިޓެކެވެ. މި ވެބްސައިޓުގެ ”އެޑްރެސް“ އަކީ ”www.mnusu.edu.mv“ އެވެ.
