ހުރަވީ ދުވަހުގެ މުނާސަބަތުގައި ހޯމް މިނިސްޓްރީން ބޭއްވި ބަހުސްގައި އެމް.އެން.ޑީ.އެފްގެ ޓީމާއި އެމް.އެން.ޔޫ.އެސް.ޔޫގެ ޓީމު ވާދަކޮށްފި

1439 ވަނަ އަހަރުގެ ހުރަވީ ދުވަހުގެ މުނާސަބަތުގައި މިނިސްޓްރީ އޮފް ހޯމް އެފެއާރޒް އިން އިންތިޒާމުކޮށްގެން ބޭއްވި ބަހުސެއްގައި މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް)ގެ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒް (ސީ.ޑީ.އެސް.އެސް) އާއި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) ވާދަކޮށްފިއެވެ. 11 އޭޕްރީލް 2018ވީ ބުދަދުވަހުގެރޭ 08:30ގައި ބޭއްވުނު މި ބަހުސްގެ ނަމަކަށްވެފައިވަނީ ”ޖުމްހޫރީ 50 – ހުރަވީ ބަހުސް 1439“ އެވެ.

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ފެކަލްޓީ އޮފް އެޑިއުކޭޝަން (އެފް.އީ) އޮޑިޓޯރިއަމްގައި ބޭއްވުނު މި ބަހުސް ބައްލަވާލެއްވުމަށް މިނިސްޓަރ އޮފް ހޯމް އެފެއާރޒް އަލްފާޟިލް އަޒްލީން އަޙްމަދު ވަޑައިގެންނެވިއެވެ. ފޯރިގަދަ ވާހަކަތަކެއް އަޑުއިވިގެންދިޔަ މި ބަހުސްގެ މައުޟޫޢު އަކަށް އޮތީ ”ދިވެހި ޤައުމިއްޔަތު ދެމެހެއްޓުމުގެ އެންމެ ބޮޑު ދައުރެއް އޮތީ ފަރުދުންގެއެވެ.“ އެވެ. މި މައުޟޫޢު އާއި އެއްކޮޅަށް އިންސާފުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ޓީމުކަމަށްވާއިރު، ސީ.ޑީ.އެސް.އެސް ގެ ޓީމުން ވާހަކަދައްކާފައިވަނީ މައުޟޫޢު އާއި ދެކޮޅަށެވެ. އެމް.އެން.ޔޫ.އެސް.ޔޫގެ ޓީމުން ވާހަކަ ދައްކަމުން މައުޟޫޢު ދިފާޢުކުރުމަށް ދިވެހި ތާރީޚުގެ އެކި ކަންކޮޅުތަކުން ދޮން ބަންޑާރައިން، މުހައްމަދު ތަކުރުފާނު ފަދަ ބޭފުޅުންގެ މިސާލުން މިސާލު ޖަހައިފައިވެއެވެ. މިގޮތުން އެބޭފުޅުންގެ މަސައްކަތުގެ މާނައަކީ ދިވެހި ޤައުމިއްޔަތު ދެމެހެއްޓުމުގައި ފަރުދުންގެ ރޯލަކީ ”އެންމެ ބޮޑު“ ރޯލުކަމެވެ. މައުޟޫޢު އާއި ދެކޮޅަށް ވާހަކަ ދައްކަމުން ސީ.ޑީ.އެސް.އެސްގެ ޓީމުންވަނީ ފަރުދުންނަށްވުރެ މުއައްސަސާތަކުގެ ދައުރު ބޮޑުކަމަށް ވަކާލާތު ކުރައްވާފައެވެ. މިގޮތުން މޯލްޑިވްސް ޕޮލިސް ސަރވިސް (އެމް.ޕީ.އެސް) އަދި މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) ފަދަ މުއައްސަސާތަކުން މިކަން ދައްކުވައިދޭކަމަށް އެ ޓީމުގެ މެންބަރުންގެ ވާހަކައިގައި ފާހަގަކޮށްފައިވެއެވެ.

ބައިވެރިންގެ ތަފާތު ހުނަރުތަކާއި އުކުޅުތައް ފެނިގެންދިޔަ މި ބަހުސްގައި ކޮންމެ ޓީމެއްގައިވެސް 5 މެންބަރުންތިބިއިރު، އެމް.އެން.ޔޫ.އެސް.ޔޫގެ ޓީމުގައިތިބި މެންބަރުންނަކީ:

1. އަލްފާޟިލާ އަމްރާ އަޙްމަދު
2. އަލްފާޟިލް މުޙައްމަދު އީމާން އަޙްމަދު
3. އަލްފާޟިލް އިބްރާހީމް މުއާން އަބްދުﷲ
4. އަލްފާޟިލް އަލީ އަމީރު (އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެންބަރ)
5. އަލް އުސްތާޛް ޢަލީ ރަޝީދު (އެމް.އެން.ޔޫ ކައުންސިލް މެންބަރ (ދަރިވަރުން ތަމްސީލުކުރާ) އަދި އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ވެރިޔާ)

ބަހުސް ނިންމުމަށްފަހު މި ރަސްމިއްޔާތުގައި މިނިސްޓަރ އޮފް ހޯމް އެފެއާރޒް ވަނީ ވާހަކަފުޅު ދައްކަވާފައެވެ. މިގޮތުން ގައުމިއްޔަތު ދެމެހެއްޓުމުގައި ފަރުދުންގެ އިތުރުން މުއައްސަސާތަކުގެވެސް ވަރަށް ބޮޑު ދައުރެއްއޮތްކަމަށް މިނިސްޓަރުގެ ވާހަކައިގައި ވަނީ ފާހަގަކުރައްވާފައެވެ. މި ބަހުސް ބައްލަވާލެއްވުމަށް އެމް.އެން.ޔޫގެ ގިނަ ދަރިވަރުންތަކެއްގެ އިތުރުން ހޯމް މިނިސްޓްރީގެ ބައެއް މުވައްޒަފުންނާއި، ބައެއް ސްކޫލްތަކުގެ ދަރިވަރުން ބައިވެރިވިއެވެ. މި ބަހުސް ޕަބްލިކް ސަރވިސް މީޑިއާ (ޕީ.އެސް.އެމް)ގެ ޗެނަލްތަކުން ދުރަށް ދެއްކުމަށް ވަނީ ރެކޯޑްކުރެވިފައެވެ.