ފެކަލްޓީ އޮފް އެޑިއުކޭޝަންގައި ”ސޯޝިއޮލޮޖީ އޮފް އެޑިއުކޭޝަން“ މާއްދާ ކިޔަވަމުންދާ ދަރިވަރުން އިސްނަގައިގެން ”އެފް.އީ އިޖްތިމާޢީ ދަތުރު“ގެ ނަމުގައި ކ. ގުރައިދޫގައި ހުންނަ ”ޚާއްޞަ އެހީއަށް ބޭނުންވާ މީހުންގެ މަރުކަޒަ“ށް ޒިޔާރަތްކޮށްފިއެވެ. މިއީ ފެކަލްޓީ އޮފް އެޑިއުކޭޝަންގައި ”ސޯޝިއޮލޮޖީ އޮފް އެޑިއުކޭޝަން“ ކިޔަވާ ދަރިވަރުން އެ މާއްދާގައި ހިމެނޭ ބައެއްގެ ދަށުން ކުރަންޖެހޭ ކަމެއްކަމަށް އެ ދަރިވަރުންވަނީ މަޢުލޫމާތުދެއްވާފައެވެ.
14 އޭޕްރީލް 2018ވީ ހޮނިހިރުދުވަހުގެ ހެނދުނު 06:00ގައި މާލެއިން ކ. ގުރައިދުއަށް ފުރިއިރު، މި ދަތުރުގައި ޖުމްލަ 55 ދަރިވަރުންނާއި، އެފް.އީގެ އެކަޑަމިކް ސްޓާފުންގެ ތެރެއިން ބައެއް ބޭފުޅުން އަދި އެ މާއްދާ ކިޔަވައިދެއްވާ ލެކްޗަރަރ (ފެކަލްޓީ އޮފް އެޑިއުކޭޝަންގެ ޑީން) އަލްފާޟިލާ މަރިޔަމް ފިޒާނާ ރަޝީދު ވަނީ ބައިވެރިވެވަޑައިގެންފައެވެ. މި ދަތުރުގައި ކ. ގުރައިދޫގެ ”ޚާއްޞަ އެހީއަށް ބޭނުންވާ މީހުންގެ މަރުކަޒަ“ށް، ދަތުރުގައި ބައިވެރިވި ދަރިވަރުންގެ ފަރާތުންވަނީ، ގިނަ ހަދިޔާތަކެއް ޙަވާލުކޮށްފައެވެ. އޭގެ ތެރޭގައި އަންނައުނު އަދި ބަދިގެ ސާމާނު ހިމެނޭކަމަށް މި ދަތުރުގައި ބައިވެރިވި ދަރިވަރުންވަނީ މަޢުލޫމާތު ދީފައެވެ. އަދި މި ތަކެއްޗަކީ މިވަޤުތު އެ މަރުކަޒަށް އެންމެ ބޭނުންޖެހިފައިވާ ތަކެތިކަމަށް ފާހަގަވެފައިވާ ތަކެތިކަމަށްވެސް އެ ދަރިވަރުންވަނީ މަޢުލޫމާތު ދީފައެވެ.
މި ދަތުރުގައި ހެނދުނު 09:00ން ފަށައިގެން 04:30 އާއި ހަމައަށް ދަތުރުގެ ބައިވެރިން އެ މަރުކަޒުގައި ވަޤުތު ހޭދަކުރިއިރު، މަރުކަޒުގައި ތިބި ޚާއްޞަ އެހީއަށް ބޭނުންވާ މީހުންނާއިއެކު، ވާހަކަ ކިޔުމާއި ކުޅިވަރު ކުޅުންފަދަ ޙަރަކާތްތައް ހިންގުނުކަމަށް އެ ދަރިވަރުން ވަނީ ”އެމް.އެން.ޔޫ.އެސް.ޔޫ“ އަށް މަޢުލޫމާތު ދީފައެވެ. ދަތުރުގެ ބައިވެރިން އެނބުރި މާލެ އައުމަށް ގުރައިދޫން ފުރީ ހަވީރު 04:30 ގައެވެ. މި ދަތުރުގެ ދެކޮޅު ދަތުރުގެ ފެރީ ހަމަޖައްސާފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ކަން ފާހަގަކޮށްލެވެއެވެ.
ދަތުރުގެ މަޢުލޫމާތު ދެއްވަމުން ދަތުރުގައި ބައިވެރިވި ދަރިވަރެއްކަމުގައިވާ އިބްރާހީމް ވަހީދު މަޢުލޫމާތުދެއްވި ގޮތުގައި މިދަތުރަކީ ފެކަލްޓީ އޮފް އެޑިއުކޭޝަންގެ ”ސޯޝިއޮލޮޖީ އޮފް އެޑިއުކޭޝަން“ މާއްދާ ކިޔަވާ ދަރިވަރުން ކުރާ ދަތުރެކެވެ. އަދި ދަތުރު ފެށުމުގެ ކުރިން، މި ދަތުރުގެ ސަބަބުން ޚާއްޞަ އެހީއަށް ބޭނުންވާ މީހުންނާއިބެހޭ ތަފާތު މަޢުލޫމާތު އަދި ތަޖުރިބާލިބިގެންދާނެކަމަށް އުއްމީދުކުރާ ކަމަށް، އިބްރާހީމް ވަނީ ބުނެފައެވެ.
މި ދަތުރާއި ގުޅޭގޮތުން ”އެމް.އެން.ޔޫ.އެސް.ޔޫ“އަށް މަޢުލޫމާތުދެއްވަމުން ފެކަލްޓީ އޮފް އެޑިއުކޭޝަންގެ ޑީން އަދި ”ސޯޝިއޮލޮޖީ އޮފް އެޑިއުކޭޝަން“ މާއްދާގެ ލެކްޗަރަރ އަލްފާޟިލާ މަރިޔަމް ފިޒާނާ ރަޝީދު ވިދާޅުވިގޮތުގައި މި ޙަރަކާތުގައި އެފް.އީގެ ”ބެޗްލަރސް އޮފް ޓީޗިންގ ސެކަންޑަރީ“ގެ ބިޒްނަސް އަދި ސައިންސްގެ ޖޫން 2015 އަދި ޖަނަވަރީ 2016 ބެޗުގައި ”ސޯޝިއޮލޮޖީ އޮފް އެޑިއުކޭޝަން“ ކިޔަވާ ދަރިވަރުން ބައިވެރިވެއެވެ.
”މި ޙަރަކާތުގެ މަޤްޞަދުގެ ތެރޭގައި މުޖްތަމަޢަށް ފައިދާކުރަނިވި ކަންކަން ކުރުން ހިމެނޭ. ޙަރަކާތުގެ ތީމް އަކީ ”އިސްރަށްވެހިންނަށް ލޯތްބާއި އަޅާލުމާއި އިޙްތިރާމް ދޭށެވެ.““
އެމް.އެން.ޔޫ.އެސް.ޔޫއަށް މަޢުލޫމާތުދެއްވަމުން ވިދާޅުވެފައިވެއެވެ. މި ދަތުރުގެ ފެރީ ހަމަޖައްސަވައިދެއްވިކަމަށްޓަކައި އެފް.އީގެ ޑީން އަލްފާޟިލާ މަރިޔަމް ފިޒާނާ ރަޝީދުވަނީ އެމް.އެން.ޔޫ.އެސް.ޔޫ އަށް ޝުކުރު އަދާކުރައްވާފައެވެ.
