ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން އިންތިޒާމުކޮށްގެން ”އެމް.އެން.ޔޫ.އެސް.ޔޫ ޝަރަފުވެރިންގެ ޙަފްލާ“ގެ ނަމުގައި ހަފްލާއެއް ބާއްވައިފިއެވެ. މި ހަފްލާގައި ދަޢުވަތު އެރުވިގެން ވަޑައިގެންނެވި ޝަރަފުވެރިންނާއި އެމް.އެން.ޔޫގެ ޗާންސެލަރ އާއި ޑެޕިއުޓީ ވައިސް ޗާންސެލަރުންނާއި ޑީން އޮފް ސްޓޫޑެންޓްސް އަދި އެމް.އެން.ޔޫގެ އެކި ޑިޕާޓްމަންޓްތަކުގެ ބައެއް މުވައްޒިފުންގެ އިތުރުން އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެންބަރުން ބައިވެރިވެލެއްވިއެވެ.
09 ޖޫން 2018ވީ ހޯމަދުވަހުގެރޭ ޗަމްޕާ ސެންޓްރަލް ހޮޓެލްގެ ކޮންފަރެންސް ހޯލުގައި ބޭއްވުނު މި ޙަފްލާ ތަޢާރަފުކޮށްދެއްވަމުން އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް ވިދާޅުވީ މި ހަފްލާގެ މައިގަނޑު މަޤްޞަދަކީ އެމް.އެން.ޔޫއަށާއި އެމް.އެން.ޔޫ.އެސް.ޔޫ އަށް އެކި ގޮތްގޮތުން ޚިދުމަތްކޮށްދެއްވާފައިވާ ބޭފުޅުންގެ އަގު ވަޒަންކުރުމެވެ.
ރައީސް އަރުޝަދުގެ ވާހަކަކޮޅަށްފަހު ހަފްލާގައި އޮތީ ޝަރަފުވެރިންނަށް ހަނދާނީ ފިލާ ހަވާލުކުރުމެވެ. މިގޮތުން އެންމެ ފުރަތަމަ އަގުވަޒަންކޮށް ހަނދާނީ ފިލާ އެރުވީ އެމް.އެން.ޔޫގައި އެންމެ ފުރަތަމަ ޑޮކްޓަރ އޮފް ފިލޯސޮފީ (ޕީ.އެޗް.ޑީ) ޙާޞިލުކުރެއްވި 2 ބޭފުޅުންނަށެވެ. އެއީ ޑރ. ޢާއިޝަތު އަލީ އަދި ޑރ. ސުނީނާ ރަޝީދު ކަމަށްވާއިރު، ޑރ. ޢާއިޝަތު އަލީ އަށް ހަފްލާގައި ބައިވެރިނުވެވޭތީ ފަހުން ހަނދާނީ ފިލާ ޙަވާލުކުރުމަށްވަނީ ހަމަޖެހިފައެވެ. މި ހަނދާނީ ފިލާ ޙަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ސެކްރެޓަރީ އަނާ އަޙްމަދެވެ.
އެއަށްފަހު މި ޙަފްލާގައި ބައިވެރިވެލެއްވި އަދި އެމް.އެން.ޔޫ އިން ދަސްވެނިވެފައިވާ އެމް.އެން.ޔޫގެ ބިދޭސީ ދަރިވަރެއްކަމަށްވާ ”ޔޯނާ“ އަށް ހަނދާނީ ފިލައެއް އެރުވުނެވެ. މި ފިލާ ޙަވާލުކޮށްދެއްވީ އެމް.އެން.ޔޫ.އެސް.ޔޫގެ އެސިސްޓެންޓް ސެކްރެޓަރީ ޙައްވާ ނައުޝާ އެވެ.
ދެން މި ހަފްލާގައި ކުރިއަށްދިޔައީ އެމް.އެން.ޔޫ.އެސް.ޔޫގެ ޝަރަފުވެރިކަމުގެ އިނާމު ޙަވާލުކުރުމެވެ.
މި އިނާމުތައް ޙަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ޢަލީ ޝަމްޢޫން އަދި ނައިބު ރައީސް (ޢަމަލީ) ޙަސަން ޝާހެވެ. އަދި އެއަށްފަހު ކުރިއަށްދިޔައީ ”އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ“ގެ މަޤާމު އެރުވުމެވެ.
“އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ”ގެ ލަޤަބު ރަޝީދު ސަރ އަށް
މި މަޤާމު ޙަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ މީޑިއާ ކޯޑިނޭޓަރ މުޙައްމަދު ޝާން ޢާމިރެވެ.
މި މަޤާމުތައް ޙަވާލުކޮށް ނިމުމަށްފަހު ޙަފްލާއަށް ހާޒިރުވެތިއްބެވި ހާޒިރިންނާއި މުޚާޠަބުކޮށް އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފު ވާހަކަފުޅު ދެއްކެވިއެވެ. ޗާންސެލަރގެ ވާހަކަފުޅުގައި ޔޫނިއަންގައި މަސައްކަތްކުރުމަކީ އެންމެ ކުރިން ”އެކްސްޓްރާ ކަރިކިއުލާ“ ޙަރަކާތެއްގެ ގޮތުގައި އޮތްކަމެއްކަމަށް ވިދާޅުވިއެވެ. އަދި މިހާރު އެކަމަކީ ”ކޯ ކަރިކިއުލާ“ ޙަރަކާތެއްކަމަށާއި، ޙަޤީގަތުގައި ޔޫނިއަންގައި މަސައްކަތްކުރުމަކީ ކިޔެވުމުގެ ބައެއްގެ ގޮތުގައި ޤަބޫލުކުރައްވާކަމަށް ޗާންސެލަރ ވިދާޅުވިއެވެ.
ޗާންސެލަރގެ ވާހަކަފުޅަށްފަހު ޑެޕިއުޓީ ވައިސް ޗާންސެލަރ ޑރ. މުޢާވިޔަތު މުޙައްމަދު ވާހަކަފުޅުދެއްކެވިއެވެ. ޑރ. މުޢާވިޔަތުގެ ވާހަކަފުޅުގައި ސްޓޫޑެންޓް ޔޫނިއަންއިން އިސްނަގައިގެން އެމް.އެން.ޔޫ އާއި އެމް.އެން.ޔޫ.އެސް.ޔޫއަށް ޚިދުމަތްކޮށްދެއްވާފައިވާ ފަރާތްތަކުގެ އަގުވަޒަންކުރެއްވިކަމަށްޓަކައި ޝުކުރުއަދާކުރެއްވިއެވެ. ޑރ. މުޢާވިޔަތުގެ ވާހަކަކޮޅަށްފަހު، ރަސްމިއްޔާތުގައި ވާހަކަދެއްކެވީ އެމް.އެން.ޔޫ.އެސް.ޔޫގެ ޝަރަފުވެރިކަމުގެ އިނާމު ޙާޞިލުކުރެއްވި އަލްފާޟިލް ޢަބްދުއްރަޝީދު ޢަލީއެވެ. އެބޭފުޅާގެ ވާހަކަފުޅުގައި އެބޭފުޅުންގެ މަސައްކަތް ބަލައިގަތުމުން އެކަމާ ވަރަށް ހިތްހަމަޖެހިއްޖެކަމަށް ވިދާޅުވިއެވެ. އަދި ސްޓޫޑެންޓް ޔޫނިއަން އިން ކުރާ މަސައްކަތްތަކަށް ތަޢުރީފުކުރެއްވިއެވެ. އަދި ދަރިވަރުން ޔޫނިއަން ހިންގުމަށް ކުރާ މަސައްކަތަކީ ފަސޭހަކަމެއްނޫންކަމަށާއި، އެކަމަށް ވަޤުތު ހޯދައިގެން މިކުރާ މަސައްކަތަކީ އެކަމަށް ތާއީދުކޮށް، ހިލޭސާބަހަށް މަސައްކަތްކުރުމުގެ ލޯބި އަށަގެންފައިވާ ބަޔަކަށް ނޫނީ ނުކުރެވޭނެކަމެއްކަމަށް ވިދާޅުވިއެވެ.
މި ރަސްމިއްޔާތު ނިންމާލުމަށްފަހު ޔޫނިއަންގެ ފަރާތުން އެންމެހާ ބައިވެރިންނަށް ތަރާވީހެއް ދެއްވިއެވެ. އަދި މި ތަރާވީހަށް އިންސާފުކުރެއްވި ވަގުތު އެމް.އެން.ޔޫ ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު ވާހަކަފުޅު ދެއްކެވިއެވެ. ޝާހީންމިސްގެ ވާހަކަފުޅުގައި ޔޫނިއަންގެ ފަރާތުން މިފަދަ އަގުވަޒަންކުރެއްވުމުގެ ޕްރޮގްރާމެއް ކުރިއަށްގެންދަވާތީ އެކަމަށް ޝުކުރު އަދާކުރެއްވިއެވެ. އަދި ނާދިޔާމިސްގެ ވާހަކަފުޅުގައި ޔޫނިއަންގެ ފަރާތުން މި ދައުރުގައި ވަރަށް ތަފާތު ކަންކަން ފެންނަމުންދާކަމަށާއި، އެކަމާއިމެދު ވަރަށް އުފާކުރައްވާކަމަށް ވިދާޅުވިއެވެ. އަދި ޔޫނިއަން ހިންގުމުގައި އިސްކޮށް އުޅޭ ދަރިވަރުންނަކީ އަބަދުވެސް އެހެން ދަރިވަރުންނަށް ނަމޫނާ ބަޔަކަށްވުމަށް ނަސޭހަތްތެރިވެލެއްވިއެވެ.