ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުންދޭ ”އެމް.އެން.ޔޫ.އެސް.ޔޫ ޝަރަފުވެރިކަމުގެ އިނާމު“ 4 ބޭފުޅަކަށް އަރުވައިފިއެވެ. މި އިނާމުތައް އަރުވާފައިވަނީ އެމް.އެން.ޔޫ.އެސް.ޔޫގެ ފަރާތުން 09 ޖޫން 2018ވީ ހޯމަދުވަހުގެރޭ ޗަމްޕާ ސެންޓްރަލް ހޮޓެލްގައި ބޭއްވުނު ”އެމް.އެން.ޔޫ.އެސް.ޔޫ ޝަރަފުވެރިކަމުގެ ޙަފްލާ“ގައެވެ.
ޝަރަފްވެރިކަމުގެ އިނާމު ޙާޞިލްކުރެއްވި 4 ބޭފުޅުންނަކީ:
- އަލްފާޟިލް މުޙައްމަދު ރިފްޢަތު ސިދުޤީ ، މާލެ މުނިސިޕަލްޓީ ދަފްތަރު ނަންބަރު 1600 (އެމް.އެން.ޔޫ ފެސިލިޓީސް މެނޭޖްމަންޓްގެ އިސްވެރިޔާ)
- އަލްފާޟިލް ޝާތިފް ޢަލީ، ނޫކޮކާގެ / ށ. ފޭދޫ (އެމް.އެން.ޔޫ ބިޒްނަސް ސްކޫލްގެ ކުރީގެ ޑީން އަދި މިހާރުގެ ލެކްޗަރަރ)
- އަލްފާޟިލް ޢަބްދުއްރަޝީދު ޢަލީ، ދިލްކަޝްގެ / ބ. އޭދަފުށި (އެމް.އެން.ޔޫ ފެކަލްޓީ އޮފް އާރޓްސްގެ ކުރީގެ ޑީން އަދި މިހާރުގެ ޑިރެކްޓަރ ޖެނެރަލް)
- އަލްފާޟިލާ ޝާމިލާ ޢަބްދުﷲ ، މ.ސޯސަންމާގެ / ކ.މާލެ (އެމް.އެން.ޔޫ ފެކަލްޓީ އޮފް އެޑިއުކޭޝަންގެ ކުރީގެ ޑީން)
މީގެ ތެރެއިން އަލްފާޟިލާ ޝާމިލާ ޢަބްދުﷲ އަދި އަލްފާޟިލް މުޙައްމަދު ރަޝީދު އަޙްމަދަށް ކަންދިމާކުރިގޮތުން ޙަފްލާގައި ބައިވެރިވެވޭގޮތް ނުވިއިރު، އަލްފާޟިލް ޝާތިފް ޢަލީއަށް އިނާމު ޙަވާލުކޮށްދެއްވީ އެމް.އެން.ޔޫ.އެސް.ޔޫ ނައިބު ރައީސް (ޢަމަލީ) ޙަސަން ޝާހެވެ. އަދި އަލްފާޟިލް ޢަބްދުއްރަޝީދު ޢަލީ އަށް އިނާމު ޙަވާލުކޮށްދެއްވީ އެމް.އެން.ޔޫ.އެސް.ޔޫ ނައިބު ރައީސް (ގޮފިތައް) ޢަލީ ޝަމްޢޫނެވެ.
”އެމް.އެން.ޔޫ.އެސް.ޔޫ ޝަރަފުވެރިކަމުގެ އިނާމް“ އަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންއަށް ތަފާތު ރޮނގުތަކުން ކޮށްދެއްވި ޚިދުމަތްތަކުގެ އަގު ވަޒަންކޮށް އެމް.އެން.ޔޫ.އެސް.ޔޫ އިން 2018 ވަނަ އަހަރުން ފެށިގެން ދެމުން އަންނަ ޝަރަފުވެރިކަމުގެ އިނާމެކެވެ.