ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ”ލީޑަރސް ގްރޫޕް“އަށް އެމް.އެން.ޔޫގެ ޖުލައި އިންޓޭކުން ގުޅުނު ދަރިވަރުންނާއިއެކު ”ލީޑަރސް ނައިޓް“ ބާއްވައިފިއެވެ. ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)ގެ ”ބެންކެޓް ހޯލު“ގައި ކުރިއަށް ގެންދެވުނު މި ޙަރަކާތް ބޭއްވުނީ 18 ޖުލައި 2018ވީ ބުދަދުވަހުގެރޭ 08:30 ގައެވެ.
މި ޙަރަކާތުގައި އެމް.އެން.ޔޫ.އެސް.ޔޫގެ ހިންގާ ކޮމިޓީން ރައީސް އަރުޝަދު އަޝްރަފް، ނައިބު ރައީސް (ޢިލްމީ) ޙަސަން ރުޝްދީ، ނައިބު ރައީސް (ގޮފިތައް) ޢަލީ ޝަމްޢޫން، ޚަޒާންދާރު ޢަބްދުﷲ ޝަހުނީޒް އަދި މީޑިއާ ކޯޑިނޭޓަރ މުޙައްމަދު ޝާން ޢާމިރު ބައިވެރިވެލެއްވިއެވެ. މީގެ އިތުރުން އެމް.އެން.ޔޫ.އެސް.ޔޫ ލީޑަރސް ގްރޫޕްގެ ބައެއް މެންބަރުންނާއި، ގޮފިތަކުގެ ހިންގާކޮމިޓީގެ ބައެއް މެންބަރުންވެސް ވަނީ ބައިވެރިވެލައްވާފައެވެ. މި ޙަރަކާތުގައި އެންމެ ފުރަތަމަ ކުރިއަށް ގެންދިޔައީ އަލަށް ގުޅުނު ދަރިވަރުންނަށް ”އެމް.އެން.ޔޫ.އެސް.ޔޫ ލީޑަރސް ގްރޫޕް“ އަކީ ކޮބައިކަން ކިޔައިދިނުމެވެ. އަދި އެމް.އެން.ޔޫ.އެސް.ޔޫގެ ތަޢާރަފަކާއި، މި ޖަމިއްޔާގެ ފަރާތުން ކުރިއަށް ގެންދާ ޙަރަކާތްތަކާއި އެ ޙަރަކާތްތައް ކުރިއަށްގެންދެވޭ ގޮތް ބަޔާންކޮށްދިނުމެވެ. މިކަން ދަރިވަރުންނަށް ކިޔައިދެއްވާފައިވަނީ އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފްގެ އިތުރުން އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) ޢަލީ ޝަމްޢޫން އެވެ. އެއަށްފަހު ކުރިއަށް ގެންދެވުނީ އަލަށްގުޅުނު ދަރިވަރުންނާއި، ލީޑަރސް ގްރޫޕްގެ މެންބަރުން އަދި އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެންބަރުންނާއިއެކު ”އައިސް ބްރޭކިންގ“ ނުވަތަ ”ގަނޑުފިލުވުމުގެ“ ޙަރަކާތްތަކެވެ. މި ޙަރަކާތްތައް ކުރިއަށް ގެންގޮސްފައިވަނީ ރައީސް އަރުޝަދު އަޝްރަފްގެ ބެއްލެވުމުގެދަށުން ކަމަށްވާއިރު، މި ޙަރަކާތްތަކުގައި ތަފާތު އިނާމުތައް ދިންއިރު، އިނާމުތައް ހުށަހަޅުއްވާފައިވާ ”އެމް.އެން.ޔޫ މާކެޓިންގ“، ”ދިރާގު“ އަދި ”ޔޫރޯ ސްޓޯރ“ އަށް އެމް.އެން.ޔޫ.އެސް.ޔޫގެ ފަރާތުން ނިހާޔަތަށް ޝުކުރުވެރިވަމެވެ.
ޙަރަކާތުގެ ނިންމުމަށްފަހު އަލަށް ގުޅުނު މެންބަރުން ވާހަކަދައްކާފައިވާއިރު، އެ ކުދިންވަނީ މިފަދަ ޙަރަކާތެއް ބޭއްވީތީ އެމް.އެން.ޔޫ.އެސް.ޔޫ އަށް ޝުކުރު އަދާކޮށްފައެވެ. އަދި މިއީ އުއްމީދު ނުކުރާކަމެއް ކަމަށާއި، އެމް.އެން.ޔޫ.އެސް.ޔޫގެ އެކި ޙަރަކާތްތަކުގައި އިސްދައުރެއް އަދާކުރަން ބޭނުންވާކަމަށް ދަރިވަރުންވަނީ ޝުޢޫރުފާޅުކޮށްފައެވެ.
މިއީ މިއަހަރު (2018) ލީޑަރސް ނައިޓް ބޭއްވުނު 3 ވަނަ ފަހަރުކަން ފާހަގަކޮށްލެވެއެވެ. ފުރަތަމަ ބޭއްވުނީ އެމް.އެން.ޔޫ ޖެނުއަރީ އިންޓޭކުން ގުޅުނު ދަރިވަރުންނާއިއެކު އެވެ. އެއަށްފަހު އެޕްރީލްމަހު ނާރސިންގ ކޯހަށް އަލަށް ގުޅުނު ދަރިވަރުންގެ ތެރެއިން، ލީޑަރސް ގްރޫޕަށް ގުޅުނު ދަރިވަރުންނާއިއެކު ލީޑަރސް ނައިޓްގެ 2 ވަނަ ޙަރަކާތް ކުރިއަށްގެންދެވިފައިވެއެވެ.
އެމް.އެން.ޔޫ.އެސް.ޔޫ ލީޑާރސް ގްރޫޕަކީ އެމް.އެން.ޔޫ.އެސް.ޔޫގެ ޙަރަކާތްތަކުގައި އުޅުމަށް އިސްވެ އުޅުމަށް ޝަޢުޤުވެރިވާ ދަރިވަރުންނަށް އަމާޒުކޮށް 2018ވަނަ އަހަރު ހަދާފައިވާ ގްރޫޕެކެވެ. މި ގްރޫޕަށް ވަނުމަށް އެމް.އެން.ޔޫގެ ކޮންމެ ދަރިވަރަކަށްވެސް ފުރުޞަތު އޮތްއިރު، ހަމަ އެކަނި ކޮށްލަންޖެހޭނެ ކަމަކީ އެމް.އެން.ޔޫ.އެސް.ޔޫގެ އޮފީހަށް ދުރުވެ، ނަންނޯޓު ކޮށްލުމެވެ.