އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތުގެ ތަށި އެމް.އެން.ޔޫ.ބީ.އެސް އިން އުފުލާލައިފި!

އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތުގެ ޗެމްޕިއަންކަން އެމް.އެން.ޔޫ.ބީ.އެސްއަށް ލިބިއްޖެއެވެ.

– ރަސްމިއްޔާތުގެ ތެރެއިން

 ”ހިތަށް އެންމެ ބޮޑަށް އަސަރުކުރާނީ، އިޝްޤީ ލޯތްބެއް ބީވުމުންނެވެ“ މި މަޢުޟޫއާއި ދެކޮޅަށް ފެކަލްޓީ އޮފް އެޑިއުކޭޝަން އާއި ފައިނަލްގައި ވާދަކޮށް އެމް.އެން.ޔޫ.ބީ.އެސް ކުރިހޯދީ 30 ޕޮއިންޓުގެ ތަފާތުންނެވެ. ފޯރިގަދަ ބަހުސްއެއް ފައިނަލްގައި ފެނިގެންދިޔައިރު މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސް ޓީމުގެ އައިމިނަތު އީނާސް އެވެ.

– ފައިނަލް ބަހުސްގެ ތެރެއިން

ފައިނަލް ބަހުސްއަށްފަހު މުބާރާތް ނިންމުމުގެ ރަސްމިއްޔާތު ވަނީ އެފް.އީ އޮޑިޓޯރިއަމްގައި ބާއްވާފައެވެ. މިރަސްމިއްޔާތުގައި މުބާރާތުގައި ފަނޑިޔާރުކަން ކޮށްދެއްވި ފަނޑިޔާރުންނަށް ޔޫނިއަންގެ ނައިބު ރައީސް (އަމަލީ) ހަސަން ޝާހް ވަނީ ލިޔުން ހަވާލުކޮށްދެއްވާފައެވެ.

އަދި މުބާރާތުގައި ބައިވެރިވި ޓީމްތަކަށް އެފް.އީ ގެ ޑީން މަރިޔަމް ފިޒާނާ ރަޝީދު ލިޔުން ހަވާލުކޮށްދެއްވިއެވެ.

– މުބާރާތުގައި ބައިވެރިވި ޓީމުތަކަށް ހަނދާނީ ލިޔުން ޙަވާލުކުރުން

މި ރަސްމިއްޔާތުގައި ބަހުސްތަކުން ހޮވުނު އެންމެ މޮޅު ބަހުސް ކުރުންތެރިންނަށް ތަށްޓާއި ހަނދާނީ ލިޔުން ހަވާލުކުރިއެވެ.

މިގޮތުން ބަހުސްތަކުގެ އެންމެ މޮޅު ބަހުސްކުރުންތެރިޔާގެ މަޤާމު ޙާޞިލުކޮށްފައިވަނީ:

1. ފުރަތަމަ ބަހުސް: އެފް.އީ އަދި އެފް.އޭ: ޝަޒާރަތު ޝަރީފް (އެފް.އީ)
2. ދެވަނަ ބަހުސް: އެމް.އެން.ޔޫ.ބީ.އެސް އަދި އެސް.އެން: އަމްރާ އަޙްމަދު (އެސް.އެން)
3. ތިންވަނަ ބަހުސް: އެފް.އީ އަދި އެސް.އެން: ޢަބްދުﷲ ޝަފީޢު (އެފް.އީ)
4. ހަތަރުވަނަ ބަހުސް: އެމް.އެން.ޔޫ.ބީ.އެސް އަދި އެފް.އޭ: އެމް.އެން.ޔޫ.ބީ.އެސް: ފާތިމަތު މާސާ
5.  ފަސްވަނަ ބަހުސް: އެފް.އޭ އަދި އެސް.އެން: އަމްރާ އަޙްމަދު (އެސް.އެން)
6. ހަވަނަ ބަހުސް: އެފް.އީ އަދި އެމް.އެން.ޔޫ.ބީ.އެސް: ފާޠިމަތު މާސާ(އެމް.އެން.ޔޫ.ބީ.އެސް)

– ބަހުސްތަކުގެ އެންމެ މޮޅު ބަހުސްކުރުންތެރިޔާ ޙާޞިލުކުރި ބަހުސްކުރުންތެރިން

އަދި މުބާރާތުގެ އެންމެ މޮޅު ބަހުސްކުރުންތެރިއަކަށް ހޮވިފައިވާތީ އެސް.އެން ޓީމުގެ އަމްރާ އަހުމަދަށް އެމް.އެން.ޔޫ.ބީ.އެސްގެ ޑީން ތަށްޓާއި ލިޔުން ހަވާލުކޮށްދެއްވިއެވެ.

ޗެމްޕިއަން ޓީމަށާއި ރަނަރަޕް ޓީމަށް ތައްޓާއި ލިޔުން ހަވާލުކޮށްދިނީ މިރަސްމިއްޔާތުގެ ޝަރަފުވެރި މެހެމާނު އެމް.އެން.ޔޫގެ ވައިސް ޗާންސެލަރ ޑރ. އަލީ ފަވާޒް ޝަރީފެވެ. މީގެއިތުރުން ގޮފިތަކުގެ ހުސްވެފައިވާ ޖާގަތަކަށް ހޮވުނު ދަރިވަރުންނަށްވެސް ވަނީ ލިޔުން ހަވާލުކޮށްފައެވެ.

ރަސްމިއްޔާތުގެ ތެރެއިން ޔުނިއަންގެ ކުރީގެ ރައީސް ވާހަކަފުޅު ދައްކަވަމުން އުފާވެރި ޚަބަރެއްވަނީ ބަހުސްގެ ބައިވެރިންނަށް ދޫކޮށްލާފައެވެ. އަލްއުސްތާޛް އަލީ ރަޝީދު ވިދާޅުވީ ކުރިއަށްހުރި އަހަރުތަކުގައި ޤައުމީ ބަހުސް މުބާރާތުގައި ޔުނިވަސިޓީ ތަމްސީލު ކުރުމުގެ ފުރުޝަތު ބަހުސްގެ ބައިވެރިންނަށް ލިބޭނެކަމަށާއި އަދި ދަރިވަރުންނަށް ލިބެންޖެހޭ ހުރިހާ އެއްބާރުލުމެއް ދޭނެކަމުގެ ފުރިހަމަ ޔަޤީންކަން އެރުވިއެވެ. އަދި އެމް.އެން.ޔޫ.އެސް.ޔޫގެ ބަހުސް ޓީމުން ރިޓަޔާކުރެއްވިކަމާއި، މި މުބާރާތުން ހުނަރުވެރި ކުޅަދާނަ ބަހުސްކުރުންތެރިން ފެނިގެންދިޔަ ވާހަކަވެސް ފާހަގަ ކުރިއެވެ.

މީގެ އިތުރުން  ޝަރަފުވެރި މެހެމާނުގެ ވާހަކަފުޅުގައި ކުރިއަށްއޮތް ތަނުގައި މިއަށްވުރެ ފުރިހަމަ ބަހުސް މުބާރާތެއް ދެކެން ބޭނުންވާ ވާހަކަ ހާމަކުރިއެވެ. އެގޮތުން މުބާރާތުގެ ތެރެއިން ރިސާޗްތަކަށް ރައްދުދިނުމަށްޓަކައި ބައިވެރިންނަށް އިންޓަރނެޓް ބޭނުންކުރުމުގެ ފުރުޝަތު ދިނުމުގެ ހިޔާލުވަނީ ޖަޖުންނަށް ދޫކޮށްލައްވާފައެވެ.

މިއަހަރުގެ މުބާރާތުގައި އިސް ފަނޑިޔާރުކަން ކޮށްދެއްވީ އަލްއުސްތާޛް މުޙައްމަދު ޔާމީން އިބްރާހީމެވެ. އަދި ފަނޑިޔާރުންގެ ގޮތުގައި ދެންތިއްބެވީ އަލްފާޟިލް މުޙައްމަދު ޝިފާން، އަލްއުސްތާޛް މުޙައްމަދު ޖައުޝާން ޝަރީފް އަދި އަލްފާޟިލް އަލީ އަމީރެވެ. އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތަކީ 2015 އިން ފެށިގެން ކޮންމެ އަހަރަކު ބާއްވަމުން އަންނަ ހަރަކާތެކެވެ.

ލިޔުނީ: ފާތިމަތު ޒަހުރާ، އެމް.އެން.ޔޫ.އެސް.ޔޫ މީޑިއާ ޓީމް