ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ އިންޓަރ ފެކަލްޓީ ބަހުސް މުބާރާތް 2018″ގެ ގްރޫޕް ސްޓޭޖް ނިމިއްޖެއެވެ.
ގްރޫޕް ސްޓޭޖްގެ ފަހު 2 ބަހުސްގެ ތެރެއިން ފުރަތަމަ ބަހުސްގައި ބައްދަލުކުރީ ސްކޫލް އޮފް ނާރސިންގ (އެސް.އެން) އަދި ފެކަލްޓީ އޮފް އާރޓްސް (އެފް.އޭ) އެވެ. ހޮނިހިރުދުވަހުގެރޭ (20 އޮކްޓޯބަރ 2018) އެފް.އީ އޮޑިޓޯރިއަމްގައި ބޭއްވުނު މި ބަހުސްގައި އެސް.އެން އަށް 897 ޕޮއިންޓް ލިބުނުއިރު، އެފް.އޭއަށް ލިބުނީ 684 ޕޮއިންޓެވެ. އެސް.އެން އިން ބަހުސްކުރަން އެރީ ޝަހީދާ އިބްރާހީމް، ފާޠިމަތު ސާރާ، އަދި މި ބަހުސްގެ އެންމެ މޮޅު ބަހުސްކުރުންތެރިޔާ އަށް ހޮވުނު އަމްރާ އަޙްމަދެވެ. އެފް.އޭ އިން ބަހުސްކުރަން އަރާފައިވަނީ މަރިޔަމް ޝަހުދާ، މަރިޔަމް އާލާއު އަދި ފާޠިމަތު އުސްރާ އެވެ.
ގްރޫޕް ސްޓޭޖްގެ އެންމެ ފަހު ބަހުސްގައި ވާދަކޮށްފައިވަނީ ފެކަލްޓީ އޮފް އެޑިއުކޭޝަން (އެފް.އީ) އަދި އެމް.އެން.ޔޫ ބިޒްނަސް ސްކޫލު (އެމް.އެން.ޔޫ.ބީ.އެސް) އެވެ. މި ބަހުސް 868-830ން ކާމިޔާބުކުރީ އެމް.އެން.ޔޫ ބިޒްނަސް ސްކޫލެވެ. މި ބަހުސްގައި އެމް.އެން.ޔޫ.ބީ.އެސް އިން ބަހުސްކޮށްފައިވަނީ އާމިނަތު އިމާލާ، އިބްރާހީމް ޝިފާން ޙަސަން އަދި މި ބަހުސްގެ އެންމެ މޮޅު ބަހުސްކުރުންތެރިޔާއަށް ހޮވުނު ފާޠިމަތު މާސާއެވެ. އެފް.އީ އިން ބަހުސްކޮށްފައިވަނީ ޚާތިމާ ޔޫސުފް، ޝަޒާރަތު ޝަރީފް އަދި ޢަބްދުﷲ ޝަފީޢު ޙަސަން އެވެ.
މި މުބާރާތުގެ އިސްފަނޑިޔާރަކީ އަލްއުސްތާޛް މުޙައްމަދު ޔާމީން އިބްރާހީމެވެ. އަދި ފަނޑިޔާރުންގެ ގޮތުގައި ދެން ތިއްބަވާނީ އަލްފާޟިލް މުޙައްމަދު ޝިފާން، އަލްއުސްތާޛް މުޙައްމަދު ޖައުޝަން ޝަރީފް އަދި އަލްފާޟިލް ޢަލީ އަމީރެވެ.
މިއީ، އެމްއެންޔޫއެސްޔޫ އިން އިންތިޒާމުކުރާ މުބާރާތެކެވެ. މި މުބާރާތުގައި ވާދަކުރަނީ 4 ޓީމަކުންކަމަށްވާއިރު، މުބާރާތްކުރިއަށްދާނީ ލީގު އުސޫލުންނެވެ. 4 ޓީމު 4 ޓީމާ ބައްދަލުކޮށް ނިމޭއިރު، 1 ވަނަ އަދި 2 ވަނައިގައި އޮންނަ 2 ޓީމު ފައިނަލަށް ދަތުރު ކުރާނެއެވެ. މުބާރާތް ކުރިއަށް ދާނީ 18 އޮކްޓޯބަރުން 21 އޮކްޓޯބަރުގެ ނިޔަލަށެވެ.
ލިޔުނީ: މުޙައްމަދު ޝާން ޢާމިރު، މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
