ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ މަސައްކަތްތަކުގައި ޢަމަލީގޮތުން ބައިވެރިވުމަށް މި 2018 ވަނަ އަހަރުގެ ޖަނަވަރީ އިންޓޭކްގެ އޮރިއެންޓޭޝަންގައި ޝަޢުޤުވެރިކަން ފާޅުކުރި ދަރިވަރުންނަށް ”ނިއު ލީޑަރސް ނައިޓް“ ނުވަތަ އާ ލީޑަރުންގެ ރޭ ބޭއްވިތާ އަދި މާގިނަ ދުވަހެއްނުވެއެވެ. އެމް.އެން.ޔޫ.އެސް.ޔޫގެ ޓީމަށް އަނެއްކާވެސް އާ ލީޑަރުންތަކެއް އިތުރުވެއްޖެއެވެ.
އެމް.އެން.ޔޫ.އެސް.ޔޫގެ ފަރާތުން އޮރިއެންޓޭޝަންގައި ދެއްކި ވީޑިއޯ އަދި އެމް.އެން.ޔޫ.އެސް.ޔޫގެ ތަފާތު މީޑިއާގެ ވަޞީލަތްތަކުގެ ސަބަބުން އެމް.އެން.ޔޫ.އެސް.ޔޫގެ ޙަރަކާތްތަކުގައި ބައިވެރިވުމަށް މިފަހަރު ޝަޢުޤުވެރިކަން ފާޅުވި ދަރިވަރުންނަކީ އެމް.އެން.ޔޫ.އެސް.ޔޫގެ ތާރީޚުގެ ތެރެއަށް ވަދެގެންދާނޭ ދަރިވަރުންތަކެކެވެ. މުޅި އެމް.އެން.ޔޫ.އެސް.ޔޫގެ ތާރީޚުގައިވެސް އަމިއްލައަށް އެމް.އެން.ޔޫ.އެސް.ޔޫ އޮފީހަށް އައިސް ދަރުމަވެރިންގެ ގޮތުގައި މަސައްކަތްކުރުމަށް އެއްފަހަރާ މިހާ ގިނަ ޢަދަދެއްގެ ކުދިން ނަންނޯޓު ކުރި މިއީ ފުރަތަމަ ފަހަރެވެ.
މި ކުދިންގެ އެދުމުގެމަތިން އެ ކުދިންނާއި އެމް.އެން.ޔޫ.އެސް.ޔޫގެ ހިންގާ ކޮމިޓީގެ ބައެއް މެންބަރުންވަނީ 28 ފެބުރުވަރީ 2018ވީ ބުދަދުވަހުގެ ހަވީރު 04:00ގައި އެމް.އެން.ޔޫގެ B1-18 ކްލާސްރޫމްގައި ބައްދަލުކޮށްފައެވެ. މި ބައްދަލުވުމުގައި އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް ވަނީ ވަރަށް ތަފްޞީލުކޮށް އެމް.އެން.ޔޫ.އެސް.ޔޫގެ ޙަރަކާތްތައް ހިނގަމުންދާ ގޮތާއި، އެ ކުދިންނަށް ދަރުމަވެރިންގެ ގޮތުގައި އެމް.އެން.ޔޫ.އެސް.ޔޫއަށް މަސައްކަތްކޮށްދެވިދާނެގޮތް ކިޔާދެއްވާފައެވެ. އަދި މީގެ އިތުރުން އެ ކުދިންގެ އެކި ސުވާލުތަކަށް ޖަވާބުދެއްވާފައެވެ. ހަމަ އެހެންމެ އެމް.އެން.ޔޫ.އެސް.ޔޫގެ މީޑިއާ ވަޞީލަތްތަކުގެ މަޢުލޫމާތުވަނީ ދެއްވާފައެވެ. މި ބައްދަލުވުމުގައި އެމް.އެން.ޔޫ.އެސް.ޔޫގެ ނައިބު ރައީސް (ޢިލްމީ) އާދަމް ރުޝްދީ، ޚަޒާންދާރު ޢަބްދުﷲ ޝަހުނީޒް، މީޑިއާ ކޯޑިނޭޓަރ މުޙައްމަދު ޝާން ޢާމިރު އަދި އެމް.އެން.ޔޫ.އެސް.ޔޫ އެޑްވައިޒަރީ ބޯޑު މެންބަރު ޙުސައިން ޢަލީ ބައިވެރިވިއެވެ.
މި ބައްދަލުވުމަށް އެދިގެން އައި ހުރިހާ ދަރިވަރުންނަކީ އެމް.އެން.ޔޫގެ ސެންޓަރ ފޯ ފައުންޑޭޝަން ސްޓަޑީޒްގައި ކިޔަވަމުންދާ ދަރިވަރުންނެވެ. މިއީ ހެޔޮ ފާލެކެވެ. އެމް.އެން.ޔޫ އާއި އެމް.އެން.ޔޫ.އެސް.ޔޫގެ މުސްތަޤުބަލު އުޖާލާވާނޭކަމުގެ ހެތްކެކެވެ. މި ބައްދަލުވުމާއިއެކު މި ދެންނެވި ހުރިހާ ދަރިވަރުންވަނީ އެމް.އެން.ޔޫ.އެސް.ޔޫގެ ލީޑަރުންގެ ގްރޫޕްގެ ތެރެއަށް އިތުރުކުރެވިފައެވެ. އެމް.އެން.ޔޫ.އެސް.ޔޫގެ ލީޑަރުންގެ ގްރޫޕަކީ އެމް.އެން.ޔޫ.އެސް.ޔޫގެ އެކި ޙަރަކާތްތަކުގައި ބައިވެރިވުމަށް ޝަޢުޤުވެރިވާ ދަރިވަރުންގެ މައްޗަށް އެކުލެވިގެންވާ ގްރޫޕެކެވެ. އަދި އެމް.އެން.ޔޫ.އެސް.ޔޫ އަށް ދަރިވަރުންގެ އެހީ ބޭނުންވާ ޙާލަތްތަކުގައި ފަސޭހަކަމާއެކު ދަރުމަވެރިންގެ ގޮތުގައި އުޅޭ ކުދިން ހޯދުމަށް އެކުލަވާލެވުނު ގްރޫޕެކެވެ. މި ގްރޫޕުގެ މެންބަރަކަށްވުމަށް އެމް.އެން.ޔޫގެ މާލޭ ކެމްޕަހުގެ ހަމަ ކޮންމެ ދަރިވަރަކަށް ފުރުޞަތު އެބައޮތެވެ. އެމް.އެން.ޔޫ.އެސް.ޔޫ އޮފީހަށް ދުރުވެ ނަންނޯޓުކޮށްލައިގެން، ނުވަތަ އެމް.އެން.ޔޫ.އެސް.ޔޫގެ މީޑިއާގެ ވަޞީލަތަކަށް މެސެޖުކޮށްލައިގެންވެސް މިކަން ހަމަޖެހޭނެ އުޞޫލުތައްވަނީ ހަމަޖެހިފައެވެ.
