05 ނޮވެންބަރ 2018ވީ ހޯމަދުވަހުގެރޭ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ފެކަލްޓީ އޮފް އެޑިއުކޭޝަންގެ (އެފް.އީ) އޮޑިޓޯރިއަމްގައި ބޭއްވުނު ޙަފްލާއެއްގައި، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 7 ވަނަ ދައުރުގެ ހިންގާ ކޮމިޓީ، އެމް.އެން.ޔޫގެ ވައިސް ޗާންސެލަރ ޑރ. ޢަލީ ފަވާޒް ޝަރީފް އިފްތިތާޙުކޮށްދެއްވައިފިއެވެ.
މި ޙަފްލާ ފެށުނީ އެރޭ 08:45ގައި ކަމަށްވާއިރު، ޙަފްލާގައި އެމް.އެން.ޔޫ.އެސް.ޔޫގެ ހިންގާ ކޮމިޓީގެ 6 ވަނަ ދައުރުގެ ފަރާތުން ވަނީ އެ ދައުރުގެ ތެރޭގައި ޔޫނިއަންއަށް އެކިގޮތްގޮތުން އެހީތެރިވެދެއްވާފައިވާ ފަރާތްތަކުގެ އަގުވަޒަންކޮށް އިނާމު ދީފައެވެ.
މި ޙަފްލާ ފެށިގެން ގޮސްފައިވަނީ ކީރިތި ޤުރްއާނުގެ ބަރަކާތުންނެވެ. ޤުރްއާން ކިޔެވީ އެމް.އެން.ޔޫގެ ސެންޓަރ ފޯ ފައުންޑޭޝަން (ސީ.އެފް.އެސް)ގެ ދަރިވަރު ދިމްޝާ ޙަސަން އެވެ. އަދި ޙަފްލާ ތަޢާރަފްކޮށްދީފައިވަނީ އެފް.އީގެ ދަރިވަރު މުޙައްމަދު އަބޫބަކުރެވެ.
ޙަފްލާ ފެށުމަށްފަހު އެންމެ ފުރަތަމަ ކުރިއަށްދިޔައީ، އެމް.އެން.ޔޫ.އެސް.ޔޫގެ 6 ވަނަ ދައުރުގެ ފައިސާ އާއި ޚަރަދުތަކުގެ ތަފްސީލު ބަޔާންކޮށްދިނުމެވެ. ތަފްޞީލު ދެއްވާފައިވަނީ އެމް.އެން.ޔޫ.އެސް.ޔޫގެ ޚަޒާންދާރު ޢަބްދުﷲ ޝަހުނީޒެވެ.
އެއަށްފަހު، ދަރިވަރުންގެ ޔޫނިއަންއަށް 2018ވަނަ އަހަރުގެތެރޭގައި އެކިގޮތްގޮތުން އެހީތެރިވެ އެއްބާރުލުންދީފައިވާ ދަރިވަރުންގެ އަގު ވަޒަންކުރުމުގެ ގޮތުންދެވޭ ”އިސްވާރުންގެ އިނާމު“ ޙަވާލުކުރެވުނެވެ. ޖުމްލަ 69 ދަރިވަރުންނަށް މި އިނާމު ދެވުނުއިރު، އިނާމުތައް ޙަވާލުކޮށްދެއްވާފައިވަނީ، އެމް.އެން.ޔޫ ކައުންސިލްގައި ދަރިވަރުން ތަމްސީލުކުރާ މެންބަރ އަލްއުސްތާޛް ޢަލީ ރަޝީދާއި، ފިއުލް އެކްސްޕްރެސް މޯލްޑިވްސްގެ މެނޭޖިންގ ޑިރެކްޓަރ އަލްފާޟިލް މުޙައްމަދު ޝިހާބާއި، ރައްޔިތުންގެ މަޖިލީހުގެ މާފަންނު ދެކުނު ދާއިރާގެ ޢިއްޒަތްތެރި މެންބަރ އޮނަރަބަލް ޢަބްދުﷲ ރިފާޢުގެ އިތުރުން، ދިވެހިރާއްޖޭގެ ޖުމްހޫރިއްޔާއިން ކިންގްޑަމް އޮފް ތައިލެންޑަށް ކަނޑައަޅުއްވާފައި ހުންނެވި ސަފީރު، ހިޒް އެކްސެލެންސީ މުޙައްމަދު ނަޝީދު އަދި އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެންބަރ އަލްފާޟިލް ޢަލީ އަމީރެވެ.
އެއަށްފަހު، އެމް.އެން.ޔޫ.އެސް.ޔޫގެ 6 ވަނަ ދައުރު ހިންގާފައިވާ ޙަރަކާތްތަކުގެ މަޢުލޫމާތު ދެވުނެވެ. މި މަޢުލޫމާތު ދެއްވާފައިވަނީ އެމް.އެން.ޔޫ.އެސް.ޔޫގެ ނައިބު ރައީސް (ޢިލްމީ) އާދަމް ރުޝްދީއެވެ.
މި ރަސްމިއްޔާތުގައި ދެން ކުރިއަށްދިޔައީ ”ދަރިވަރުންގެ ޔޫނިއަންގެ ޝަރަފުވެރިކަމުގެ އިނާމު“ ދިނުމެވެ. މި އިނާމު ޖުމްލަ 11 ފަރާތަކުން ޙާޞިލުކުރިއެވެ.
އެއަށްފަހު، އެމް.އެން.ޔޫ.އެސް.ޔޫގެ 6 ވަނަ ދައުރުގެ މީޑިއާގެ މަޢުލޫމާތުތައް އެމް.އެން.ޔޫ.އެސް.ޔޫގެ މީޑިއާ ކޯޑިނޭޓަރ މުޙައްމަދު ޝާން ޢާމިރު ޙިއްސާކުރެއްވިއެވެ.
މީގެ އިތުރުން މި ޙަފްލާގައި މަރްޙޫމް އަޙްމަދު މުޙައްމަދުގެ ހަނދާނުގައިދެވޭ އިނާމު ޖުމްލަ 7 ފަރާތަކަށްދެވުނުއިރު، މުޅީން އަލަށް ތަޢާރަފު ކުރެވުނު، ”ޑީންސް އިނާމު“ އެމް.އެން.ޔޫގެ 4 ޑީންއަކަށް ދެވުނެވެ. އެއީ:
- ސެންޓަރ ފޯ ފައުންޑޭޝަން ސްޓަޑީޒްގެ ހެޑް އޮފް ސެންޓަރ:
އަލްފާޟިލް މުޙައްމަދު ދީދީ، މ. ނިޔަނދުރުގެ / މާލެ - ފެކަލްޓީ އޮފް ހެލްތު ސައިންސަސްގެ ޑީން:
އަލްފާޟިލާ ޢާއިޝަތު ޝާހީން އިސްމާޢީލް، މއ. ބޯގަންވިލާ / މާލެ - އެމް.އެން.ޔޫ ބިޒްނަސް ސްކޫލްގެ ޑީން:
އަލްފާޟިލް ޢަބްދުއްރަޙްމާން މުބާރަކް، މ. އާދިއްލީގެ / މާލެ - ފެކަލްޓީ އޮފް އެޑިއުކޭޝަންގެ ޑީން:
އަލްފާޟިލާ މަރިޔަމް ފިޒާނާ ރަޝީދު، މ. ޒޭވަރު / މާލެ
ޑީންސް އިނާމަކީ، ދަރިވަރުންގެ ޔޫނިއަންއަށް ތަފާތު ގޮތްގޮތުން އެހީތެރިވެ، ދަރިވަރުންގެ ޔޫނިއަންގެ ޙަރަކާތްތަކަށް ފުރިހަމަ އެއްބާރުލުމެއް ދެއްވާފައިވާ އެމް.އެން.ޔޫގެ ފެކަލްޓީތަކުގެ ޑީނުންނަށް ދެވޭ އިނާމެކެވެ. ޑީންސް އިނާމު ޙަވާލުކޮށްދެއްވީ އެމް.އެން.ޔޫގެ ޗާންސެލަރ ޑރ. މުޙައްމަދު ލަޠީފެވެ.
އެއަށްފަހު މި ޙަފްލާގައި ކުރިއަށްދިޔައީ އެމް.އެން.ޔޫ.އެސް.ޔޫގެ 7 ވަނަ ދައުރުގެ މެންބަރުންނަށް މަޤާމު ޙަވާލުކުރެއްވުމެވެ. މަޤާމުތައް ޙަވާލުކޮށްދެއްވީ ޙަފްލާގެ ޝަރަފްވެރި މެޙްމާން އެމް.އެން.ޔޫ ވައިސް ޗާންސެލަރ ޑރ. ޢަލީ ފަވާޒް ޝަރީފެވެ.
އެމް.އެން.ޔޫ.އެސް.ޔޫގެ 7 ވަނަ ދައުރުގެ ހިންގާ ކޮމިޓީ:
- ރައީސް: އަރުޝަދު އަޝްރަފް
- ނައިބު ރައީސް (ޢިލްމީ): އާދަމް ރުޝްދީ
- ނައިބު ރައީސް (އަމަލީ): ޙަސަން ޝާހު
- ނައިބު ރައީސް (ގޮފިތައް): ޢަލީ ޝަމްޢޫން
- ޚަޒާންދާރު: ޢަބްދުﷲ ޝަހުނީޒް
- ސެކްރެޓަރީ: އަނާ އަޙްމަދު
- އެސިސްޓެންޓް ސެކްރެޓަރީ: އާމިނަތު ރައުދާ
- މީޑިއާ ކޯޑިނޭޓަރ: މުޙައްމަދު ޝާން ޢާމިރު
މި ރަސްމިއްޔާތުގައި، އެމް.އެން.ޔޫ.އެސް.ޔޫގެ 7 ވަނަ ދައުރުގެ ރައީސް އަރުޝަދު އަޝްރަފްގެ އިތުރުން، ޝަރަފުވެރިކަމުގެ އިނާމު ޙާޞިލުކުރެއްވި ބޭފުޅެއްގެ ޙައިޞިއްޔަތުން އަލްފާޟިލް މުޙައްމަދު ޝިފާންވެސް ވަނީ ވާހަކަދައްކަވާފައެވެ. އަދި މީގެ އިތުރުން ޝަރަފްވެރި މެޙްމާން، ޑރ. ޢަލީ ފަވާޒް ޝަރީފްވެސް ވާހަކަ ދެއްކެވިއިރު، ޝަރަފްވެރި މެޙްމާންގެ ވާހަކަފުޅުގައި، އެމް.އެން.ޔޫ.އެސް.ޔޫގެ 6 ވަނަ ދައުރުގެ މަސައްކަތްތަކަށް ވަރަށް ބޮޑަށް ތަޢުރީފުކުރެއްވިއެވެ. އަދި ކުރިއަށް އޮތް ދައުރުގައި ޔޫނިއަންގެ ހިންގުން އިތުރަށް ފުޅާކޮށް، އިތުރު ޙަރުފަތަކަށް ގެންދާނެކަމުގެ ނުވަތަ ”ލެވަލް އަޕް“ކޮށްލުމުގެ އުއްމީދު ވަރަށް ބޮޑުކަމަށްވަނީ ވިދާޅުވެފައެވެ.
މި ޙަފްލާގައި، ދަރިވަރުންގެ ޔޫނިއަން އިން ދޭ އެންމެ މަތީ ޝަރަފުކަމަށްވާ ”އެމް.އެން.ޔޫ.އެސް.ޔޫ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ“ގެ ލަޤަބު ޖުމްލަ 10 ފަރާތަކަށް އެރުވުނުއިރު، 2018 ވަނަ އަހަރުގެ އެންމެ ޙަރަކާތްތެރި ގޮފިތަކަށްވެސް ވަނީ އިނާމު ޙަވާލުކުރެވިފައެވެ.
ލިޔުނީ: މުޙައްމަދު ޝާން ޢާމިރު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
