ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. ޢަލީ ފަވާޒް ޝަރީފް، ޑެޕިއުޓީ ވައިސް ޗާންސެލަރުން ޑރ. މުޢާވިޔަތު މުޙައްމަދުގެ އިތުރުން އަލްފާޟިލާ ޢާއިޝަތު ޝާހީން އަދި ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ހިންގާ ކޮމިޓީގެ 8 މެންބަރުންނާ ބައްދަލުކުރައްވައިފިއެވެ.
މި ބައްދަލުވުން ބޭއްވިގެންދިޔައީ 06 ނޮވެންބަރ 2018ވީ އަންގާރަދުވަހުގެ މެންދުރުފަހު 02:00ގައި އެމް.އެން.ޔޫ.އެސް.ޔޫ އޮފީހުގައެވެ. މިއީ އެމް.އެން.ޔޫގެ މެނޭޖްމަންޓްގެ ބޭފުޅުންނާއެކު، އެމް.އެން.ޔޫ.އެސް.ޔޫގެ އޮފީހުގައި ބޭއްވުނު ފުރަތަމަ ބައްދަލުވުންކަން ވެސް ފާހަގަކޮށްލެވެއެވެ.
މި ބައްދަލުވުމުގައި ވާހަކަދައްކަވަމުން، ވައިސް ޗާންސެލަރ ޑރ. ޢަލީ ފަވާޒް ޝަރީފް ވަނީ އެމް.އެން.ޔޫ.އެސް.ޔޫގެ 7 ވަނަ ދައުރުގެ ހިންގާ ކޮމިޓީގެ މެންބަރުންނަށް މަރުޙަބާ ވިދާޅުވެފައެވެ. އަދި 7 ވަނަ ދައުރުގައިވެސް 6 ވަނަ ދައުރުގެ ގިނަ މެންބަރުންތަކެއް ތިބުމާއެކު، 6 ވަނަ ދައުރުގައި އެމް.އެން.ޔޫ.އެސް.ޔޫގެ މަސައްކަތްތަކަށްވަނީ ވަރަށް ބޮޑަށް ތައުރީފުކޮށްފައެވެ. އަދި ޔޫނިއަންގެ މަސައްކަތްތައް ކުރުމުގައި ޖާގައިގެ ދަތިކަން ދިމާވާކަން އެނގޭކަމަށާއި، އެހެން ނަމަވެސް އެކަމުގެ އެއްވެސް ޝަކުވާއެއް ޔޫނިއަންގެ ފަރާތުން ނުކުރާކަމަށާއި، އެކަމަށް ވަރަށް ބޮޑަށް ޝުކުރުވެރިވާކަމަށް ވިދާޅުވިއެވެ. އަދި ވީވަރަކުން ޔޫނިއަންއަށް ވެސް އެމް.އެން.ޔޫގެ ކެމްޕަސްތެރެއިން އިތުރު ޖާގައެއް ހަމަޖެއްސުމުގެ މަސައްކަތްކުރައްވާނެކަމަށްވެސްވަނީ ވިދާޅުވެފައެވެ. ބައްދަލުވުމުގައި ދެން ބައިވެރިވެލެއްވި އެމް.އެން.ޔޫގެ މެނޭޖްމަންޓްގެ ބޭފުޅުންވެސް ވަނީ އެމް.އެން.ޔޫ.އެސް.ޔޫގެ އާ ހިންގާ ކޮމިޓީއަށް މަރުޙަބާ ވިދާޅުވެފައެވެ.
7 ވަނަ ދައުރަށް އިންތިޚާބުވި އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް ވަނީ 6 ވަނަ ދައުރުގައި އެމް.އެން.ޔޫގެ މެނޭޖްމަންޓުން ވެދެއްވި ފުރިހަމަ އެއްބާރުލުމަށް، މި ބައްދަލުވުމުގައި، ޝުކުރު ދަންނަވާފައެވެ. އަދި ޔޫނިއަންގެ އޮފީހުގައި ބައްދަލުވުން ކުރިއަށް ގެންދިއުމަށް ނިންމެވި ނިންމެވުމަށް ތައުރީފުކުރައްވާ، މިއީ ލިބުނު ވަރަށް ބޮޑު ޝަރަފެއްކަމަށްވެސް ވިދާޅުވިއެވެ.
ލިޔުނީ: މުޙައްމަދު ޝާން ޢާމިރު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
