ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮތްޕެއް، ދިވެހިރާއްޖޭގެ ޤައުމީ ޔުނިވަރސިޓީގެ ކުޅުދުއްފުށީ ކެމްޕަހުގައި ޤާއިމުކޮށް، އެ ގޮފީގެ ފުރަތަމަ ހިންގާ ކޮމިޓީގެ މެންބަރުންނަށް މަޤާމުގެ ލިޔުން ޙަވާލުކޮށްފިއެވެ. ހުކުރުދުވަހުގެރޭ ކުޅުދުއްފުށީ ކެމްޕަހުގައި ބޭއްވުނު ރަސްމިއްޔާތެއްގައި މަޤާމުގެ ލިޔުން ޙަވާލުކުރެވުނުއިރު، މި ރަސްމިއްޔާތުގައި އެމް.އެން.ޔޫ.އެސް.ޔޫގެ ހިންގާ ކޮމިޓީގެ ޚަޒާންދާރު ޢަބްދުﷲ ޝަހުނީޒް، ސެކްރެޓަރީ އަނާ އަޙްމަދު އަދި އެމް.އެން.ޔޫ.އެސް.ޔޫ އެޑްވައިޒަރީ ބޯޑުގެ މެންބަރު ޙުސައިން ޢަލީ ބައިވެރިވެވަޑައިގެންނެވިއެވެ.
ކުޅުދުއްފުށީ ކެމްޕަހުގެ ޔޫނިއަން ގޮފީގެ ހިންގާ ކޮމިޓީ މެންބަރުންނަށް މަޤާމު ޙަވާލުކޮށްދެއްވީ ރަސްމިއްޔާތުގެ ޝަރަފުވެރި މެޙްމާން ބީ.އެމް.އެލް ކުޅުދުއްފުށީ ބްރާންޗްގެ މެނޭޖަރ އަލްފާޟިލާ ޢާއިޝަތު ޢަބްދުއްރަޙީމެވެ. މި ރަސްމިއްޔާތުގައި އެމް.އެން.ޔޫ.އެސް.ޔޫގެ ސެކްރެޓަރީ އަނާ އަޙްމަދުގެ އިތުރުން، ކުޅުދުއްފުށީ ކެމްޕަހުގެ ގޮފީގެ ރައީސާ އަލްފާޟިލާ ޝިއުނާ އަޙްމަދު އަދި ޝަރަފްވެރި މެޙްމާން ޢާއިޝަތު ޢަބްދުއްރަޙީމް ވާހަކަފުޅު ދައްކަވާފައިވެއެވެ.
02 މާރިޗު 2018ވީ ހުކުރުދުވަހުގެރޭ ކުޅުދުއްފުށީ ކެމްޕަހުގެ ގޮފި އިފްތިތާޙު ކުރެވުނު ހަމަ އެރޭ އެމް.އެން.ޔޫގެ ގަން ކެމްޕަހުގައި ”އަހުރަ“ ގޮފީގެ 2 ވަނަ ދައުރުގެ ހިންގާ ކޮމިޓީ އާއި، ތިނަދޫ ކެމްޕަސް އަދި ހިތަދޫ ކެމްޕަހުގައިވެސް މުޅީން އަލަށް އެމް.އެން.ޔޫ.އެސް.ޔޫގެ ގޮފިތައްވަނީ ޤާއިމުކޮށްފައެވެ.
