ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ގޮތްޕެއް، ދިވެހިރާއްޖޭގެ ޤައުމީ ޔުނިވަރސިޓީގެ ހިތަދޫ ކެމްޕަހުގައި ޤާއިމުކުރުމުގެ ގޮތުން ހިންގާ ކޮމިޓީގެ މަޤާމުތަކުގެ އިންތިޚާބު ބާއްވައިފިއެވެ. 01 މާރިޗު 2018 ވީ ބުރާސްފަތިދުވަހު ބޭއްވުނު މި އިންތިޚާބުގައި ޖުމްލަ 4 މަޤާމަކަށް (ގޮފީގެ ރައީސް، ނައިބު ރައީސް (ޢިލްމީ)، ނައިބު ރައީސް (ޢަމަލީ) އަދި ސެކްރެޓަރީ) އިންތިޚާބު ބޭއްވުނެވެ. މި އިންތިޚާބާއި އެކު، މިހާރު ޔޫނިއަންގެ 4 ގޮފި، އެމް.އެން.ޔޫގެ އަތޮޅުތެރޭ 4 ކެމްޕަހުގައި ޤާއިމުކުރެވުނުކަން ފާހަގަކޮށްލެވެއެވެ.
އިންތިޚާބު ކޮމިޝަންކުރުމަށް އެމް.އެން.ޔޫ.އެސް.ޔޫގެ ނައިބު ރައީސް (ގޮފިތައް) އަލްފާޟިލް ޢަލީ ޝަމްޢޫން އައްޑޫ ސިޓީއަށް ވަޑައިގެންނެވިއިރު، މި އިންތިޚާބު ކާމިޔާބުކަމާއެކު ނިންމާލެވުނުކަމަށް އެބޭފުޅާ މަޢުލޫމާތު ދެއްވިއެވެ. މި އިންތިޚާބުގެ ނަތީޖާ ދައްކާގޮތުން ސެކްރެޓަރީގެ މަޤާމަށް 76 ވޯޓާއެކު ހޮވިފައިވަނީ އާމިނަތު ޒުހާ އެވެ. ދެން ވާދަކުރި ނުވައިރާން އަސްލަމް އަށް 55 ވޯޓު ލިބުނެވެ. ނައިބު ރައީސް (ޢަމަލީ)ގެ މަޤާމަށް ހޮވިފައިވަނީ 81 ވޯޓާއެކު ޢާއިޝަތު ޝަރާއެވެ. ދެން ވާދަކުރި ޝިފްނާ ޙުސައިން އަށް ލިބުނީ 53 ވޯޓެވެ. ނައިބު ރައީސް (ޢިލްމީ)ގެ މަޤާމަށް 87 ވޯޓާއެކު ޠާއިފް މަޖީދު ހޮވުނުއިރު، އެ މަޤާމަށް ދެން ވާދަކުރި އިއްފަތު ރަޝީދަށް ލިބުނީ 44 ވޯޓެވެ. ރައީސްކަމުގެ މަޤާމަށް އިސްމާއިލް އަހްމަދު ނަޢީމް ހޮވުނީ 92 ވޯޓުން ކަމަށްވާއިރު އެ މަޤާމަށް ދެން ވާދަކުރި ނަޖުވާ ރިޔާޒަށް ލިބުނީ 39 ވޯޓެވެ.
އެމް.އެން.ޔޫގެ އަތޮޅުތެރޭ ކެމްޕަހެއްގައި އިންތިޚާބެއް ބޭއްވުނު މިއީ 2 ވަނަ ފަހަރެވެ. ފުރަތަމަ އިންތިޚާބަކީ ހަމަ މި ހިނގާ 2018 ވަނަ އަހަރު ތިނަދޫ ކެމްޕަހުގައި ބޭއްވުނު އިންތިޚާބެވެ.
