މެލޭޝިޔާގެ އެކިއެކި ޔުނިވަރސިޓީތަކުގެ ދަރިވަރުންތަކެއްގެ މައްޗަށް އެކުލެވޭ އައި.ވައި.ސީ (އިންޓަރނޭޝަނަލް ޔޫތު ކައުންސިލް)ގެ މެންބަރުންތަކެއް ދިވެހިރާއްޖޭގެ ޤައުމީ ޔުނިވަރސިޓީއަށް ޒިޔާރަތްކޮށްފިއެވެ. ޤައުމީ ޔުނިވަރސިޓީއަށް މިއީ މިއަހަރު މިގޮތަށް މެލޭޝިޔާ ދަރިވަރުންތަކެއް ޒިޔާރަތްކުރި 3 ވަނަ ފަހަރެވެ. 05 މާރިޗު 2018ވީ ހޯމަދުވަހުގެ 09:45ން 11:45ށް ކުރި މި ޒިޔާރަތުގައި ޤައުމީ ޔުނިވަރސިޓީގެ ސެންޓްރަލް އޭރިއާގެ އެކި ޢިމާރާތްތައްވަނީ އެ ދަރިވަރުންނަށް ދައްކާލާފައެވެ.
މި ކުދިންނާއި ޙަވާލުވެހުރީ ސްޓޫޑެންޓް ސަޕޯޓުގެ ފަރާތުން ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދުކަމަށްވާއިރު، އެމް.އެން.ޔޫ.އެސް.ޔޫގެ ފަރާތުންވަނީ ފުރިހަމަ އެއްބާރުލުމެއް މިކަމުގައި ދެއްވާފައެވެ. މިގޮތުން، މިއަދު ޒިޔާރަތްކުރި މެލޭޝިޔާގެ ދަރިވަރުންނަށް ޤައުމީ ޔުނިވަރސިޓީ އާއި ބެހޭ އެކިއެކި މަޢުލޫމާތު ދެއްވުމަށް ޔޫނިއަންގެ ގާތްގަނޑަކަށް 20 ވަރަކަށް މެންބަރުން ޙަރަކާތްތެރިވިއެވެ.
ޔުނިވަރސިޓީގެ ފަރާތުން މެލޭޝިޔާގެ ދަރިވަރުންނަށް ބިލެތްމީރުކޮށްލެއްވުމެއް ދެއްވިއިރު، ޔޫނިއަންގެ ކުދިންނާއި މެލޭޝިޔާގެ ދަރިވަރުންނާއި ދެމެދު، އެފް.އީ ޕީ.އީ ހޯލުގައި، ހޭންޑު ބޯޅަ މެޗެއް ކުޅެވުނުކަންވެސް ފާހަގަކޮށްލެވެއެވެ.
