ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ޢިލްމީ ނައިބު ރައީސް އާދަމް ރުޝްދީ އަދި ޢަމަލީ ނައިބު ރައީސް ޙަސަން ޝާހު، އެމް.އެން.ޔޫގެ ގަން ކެމްޕަހުގައި ޤާއިމުކުރެވިފައިވާ ޔޫނިއަންގެ ގޮފި، ”އަހުރަ“އިގެ ހިންގާ ކޮމިޓީ މެންބަރުންނާއި ބައްދަލުކޮށްފިއެވެ. ޔޫނިއަންގެ 2 ނައިބު ރައީސުން ލ. ގަމަށް ކުރައްވަމުން ގެންދަވާ ރަސްމީ ދަތުރުގައި މި ބައްދަލުވުން ބޭއްވުނީ އެމް.އެން.ޔޫގެ ގަން ކެމްޕަހުގައެވެ.
ހުކުރުދުވަހުގެރޭ (09 މާރިޗު 2018) 08:30ގައި ބޭއްވުނު މި ބައްދަލުވުމުގައި ގިނަ ކަންތައްތަކަކާއި ބެހޭގޮތުން މަޝްވަރާކުރެވުނެވެ. އެގޮތުން، އަހުރަ ގޮފީގެ 2 ވަނަ ދައުރުގެ ހިންގާ ކޮމިޓީގެ މެންބަރުންނަށް ޔޫނިއަންގެ ފަރާތުން މަރުޙަބާކިޔުނުއިރު، މި އަހަރު ”އަހުރަ“އިގެ ފަރާތުން ހިންގުމަށް ވިސްނާފައިވާ ކަންކަމާ ބެހޭގޮތުން މަޝްވަރާކުރެވުނެވެ. މީގެ އިތުރުން، ޔޫނިއަންގެ 2 ނައިބު ރައީސުންވަނީ، ޢިލްމީގޮތުންނާއި ޢަމަލީގޮތުން ހިންގިދާނެ ބައެއް ޙަރަކާތްތަކާއިބެހޭގޮތުން ލަފާ އަރުވާފައެވެ. ހަމަ މިއާއިއެކު، ކެމްޕަހުގެ ދަރިވަރުންގެ އެއްބާރުލުން ގޮތްޕަށް ހޯދިދާނޭ ގޮތްތަކާއި، ގޮފީގެ ޙަރަކާތްތަކުގައި ފުލް ޓައިމް ދަރިވަރުންގެ ބައިވެރިވުން އިތުރުކުރެވިދާނޭ ގޮތްތަކާއިބެހޭގޮތުންވެސް މަޝްވަރާކުރެވުނެވެ. ހަމަ އެހެންމެ، ޙަރަކާތްތައް ހިންގުމުގައި ”އަހުރަ“އަށް ދިމާވެފައިވާ ދަތިތަކާއިގުޅޭ މަޢުލޫމާތު އެ ގޮފީގެ ހިންގާ ކޮމިޓީން ޔޫނިއަންގެ ނައިބު ރައީސުންނަށް ދެއްވިއެވެ.
ބައްދަލުވުމުގެ ތެރެއިން…
މީގެ އިތުރުން، އެމް.އެން.ޔޫގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު (ނާދިޔާ މިސް)ގެ އެދިލެއްވުމުގެ މަތިން، ގަން ކެމްޕަހުގައި ކެންޓީނެއް ހުޅުވުމާއިބެހޭގޮތުންނާއި، އެ ކެމްޕަހުގެ އަންހެންކުދިންނަށް ކެމްޕަހުގައި ނަމާދުކުރެވޭނޭ އިންތިޒާމު ހަމަޖެއްސޭނެގޮތްތަކާއި ބެހޭގޮތުން މަޝްވަރާކުރެވުނެވެ.
ލ. ގަމަށް ޔޫނިއަންގެ 2 ނައިބު ރައީސުން މިކުރައްވާ ދަތުރުގައި، ހޮނިހިރުދުވަހު (10 މާރިޗު 2018) ގަން ކެމްޕަހުގެ ފުލް ޓައިމް ދަރިވަރުންނާއި ބައްދަލުކުރައްވާނެއެވެ. މި ދަތުރަކީ ކެމްޕަސްތަކުގައި ޤާއިމްކޮށްފައިވާ ޔޫނިއަންގެ ގޮފިތަކުގެ ހިންގާ ކޮމިޓީގެ މެންބަރުންނާއި ބައްދަލުކޮށް، އެ ގޮފިތަކުގެ ޙަރަކާތްތައް ފުޅާކުރުމުގެގޮތުން ޔޫނިއަންގެ ފަރާތުންކުރާ ރަސްމީ ދަތުރުތަކުގެ ތެރެއިން ދަތުރެކެވެ. މިގޮތުން ކެމްޕަސްތަކުގެ ގޮފިތަކުގެ މަޤާމު ޙަވާލުކުރެއްވުމުގެ ރަސްމިއްޔާތަށް ކުޅުދުއްފުށި، ތިނަދޫ އަދި އައްޑޫ ސިޓީއަށް ޔޫނިއަންއިން ދަތުރުކޮށްފައިވާއިރު، މިއީ މިއަހަރު ގަމަށް ކުރެވޭ ފުރަތަމަ ދަތުރެވެ.
