ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ޢިލްމީ ނައިބު ރައީސް އާދަމް ރުޝްދީ، ޢަމަލީ ނައިބު ރައީސް ޙަސަން ޝާހު އަދި އެސިސްޓެންޓް ސެކްރެޓަރީ ޙައްވާ ނައުޝާ، ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ގަން ކެމްޕަހުގެ ފުލް-ޓައިމް ދަރިވަރުންނާއި ބައްދަލުކޮށްފިއެވެ. ޔޫނިއަންގެ ހިންގާ ކޮމިޓީގެ ޓީމަކުން ލ. ގަމަށް މިހާރު ކުރައްވަމުންދާ ދަތުރުގައި ”އަހުރަ“ ގޮފީގެ ހިންގާ ކޮމިޓީގެ މެންބަރުންނާއިވެސް ވަނީ ބައްދަލުކޮށްފައެވެ.
ގަން ކެމްޕަހުގެ ފުލް-ޓައިމް ދަރިވަރުންނާއި ހޮނިހިރުދުވަހުގެ (10 މާރިޗު 2018) ހެނދުނު 10:15ގައި ބައްދަލުކުރެވުނުއިރު، މި ބައްދަލުވުމުގައި ”އަހުރަ“ ގޮފީގެ ހިންގާ ކޮމިޓީގެ ރައީސް، ޢިލްމީ ނައިބު ރައީސް، ޚަޒާންދާރު އަދި މީޑިއާ ކޯޑިނޭޓަރވެސް ބައިވެރިވިއެވެ. މި ބައްދަލުވުމުގައި ޔޫނިއަންގެ 2017ގެ ރަސްމީ ރިޕޯޓު ދެއްކުނުއިރު، ގަން ކެމްޕަހުގެ ފުލް ޓައިމް ދަރިވަރުން ޔޫނިއަންގެ ޙަރަކާތްތަކުގައި ބައިވެރިވުމަށް ހިތްވަރުދެއްވާފައިވެއެވެ. މީގެ އިތުރުން، އެ ދަރިވަރުންނަށް ދިމާވެފައިވާ ދަތިތަކާއި، ޝަކުވާތައް ޔޫނިއަންގެ ހިންގާ ކޮމިޓީގެ ޓީމުންވަނީ އަޑުއަހާފައެވެ. ހަމައެހެންމެ، ”އަހުރަ“ އާއި ގުޅިގެން އެ ދަރިވަރުންނަށް ހިންގިދާނޭ ޙަރަކާތްތަކާއި ބެހޭގޮތުންވެސް ވަނީ މަޝްވަރާކުރެވިފައެވެ.
މި ދަތުރަކީ ކެމްޕަސްތަކުގައި ޤާއިމްކޮށްފައިވާ ޔޫނިއަންގެ ގޮފިތަކުގެ ހިންގާ ކޮމިޓީގެ މެންބަރުންނާއި ބައްދަލުކޮށް، އެ ގޮފިތަކުގެ ޙަރަކާތްތައް ފުޅާކުރުމުގެގޮތުން ޔޫނިއަންގެ ފަރާތުންކުރާ ރަސްމީ ދަތުރުތަކުގެ ތެރެއިން ދަތުރެކެވެ. މިގޮތުން ކެމްޕަސްތަކުގެ ގޮފިތަކުގެ މަޤާމު ޙަވާލުކުރެއްވުމުގެ ރަސްމިއްޔާތަށް ކުޅުދުއްފުށި، ތިނަދޫ އަދި އައްޑޫ ސިޓީއަށް ޔޫނިއަންއިން ދަތުރުކޮށްފައިވާއިރު، މިއީ މިއަހަރު ގަމަށް ކުރެވޭ ފުރަތަމަ ދަތުރެވެ.
