ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން، ޖަމިއްޔާގެ މާލޭ ކެމްޕަހުގެ ގޮފިތަކުގެ ސެކްރެޓަރީންނާއި ޚަޒާންދާރުންނަށް އަމާޒުކޮށް މަސައްކަތު ބައްދަލުވުމެއް ބާއްވައިފިއެވެ. 10 މާރިޗު 2018ވީ ހޮނިހިރުދުވަހުގެ މެންދުރު 02:00ގައި ބޭއްވުނު މި ބައްދަލުވުމުގައި އެމް.އެން.ޔޫ.އެސް.ޔޫގެ ގޮފިތަކުގެ ނައިބު ރައީސް ޢަލީ ޝަމްޢޫން، ސެކްރެޓަރީ އަނާ އަޙްމަދު އަދި ޚަޒާންދާރު ޢަބްދުﷲ ޝަހުނީޒް ބައިވެރިވެލެއްވިއެވެ.
45 މިނިޓަށް ދެމިގެންދިޔަ މި ބައްދަލުވުމުގައި ގޮފިތަކުގެ ޔައުމިއްޔާ ތައްޔާރުކުރާނޭގޮތާއި، ސިޓީ އަދި އިޢުލާން ލިޔަންވީގޮތް، އެމް.އެން.ޔޫ.އެސް.ޔޫގެ ސެކްރެޓަރީ އަނާ އަޙްމަދުވަނީ ގޮފިތަކުގެ ސެކްރެޓަރީންނަށް ކިޔާދެއްވާފައެވެ. އަދި ހަމަ އެހެންމެ ގޮފިތަކުން ހުށަހަޅާ ”ބަޖެޓް ރިކުއެސްޓް“ ފޯމާއި، ބަޖެޓް ރިޕޯޓް ތައްޔާރުކުރަންވީގޮތުގެ ތަފްޞީލީ މަޢުލޫމާތު، އެމް.އެން.ޔޫ.އެސް.ޔޫގެ ޚަޒާންދާރު ޢަބްދުﷲ ޝަހުނީޒްވަނީ ކިޔާދެއްވާފައެވެ. މީގެ އިތުރުން، ގޮފިތަކުގެ ރަސްމީ އީމެއިލްތައްވެސްވަނީ މި ބައްދަލުވުމުގައި ބައިވެރިވި ގޮފިތަކުގެ މެންބަރުންނަށް ޙަވާލުކުރައްވާފައެވެ.
