ޔޫނިއަންގެ ފަރާތުން ކުޅުދުއްފުށީ ކެމްޕަހުގެ ދަރިވަރުންގެ ކަންބޮޑުވުންތަކަށް ލުޔެއް!

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ކުޅުދުއްފުށީ ކެމްޕަހުގެ ދަރިވަރުންނަށް ޓީވީއަކާއި، ވޮލީބޯޅަ ކުޅޭ ސާމާނު ހަދިޔާކޮށްފިއެވެ. އެމް.އެން.ޔޫ.އެސް.ޔޫގެ ފަރާތުން މި ތަކެތި ޙަވާލުކުރެއްވީ މިހާރު ކުޅުދުއްފުށީ ކެމްޕަހަށް އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް އަދި މީޑިއާ ކޯޑިނޭޓަރ މުޙައްމަދު ޝާން ޢާމިރު ކުރައްވަމުން ގެންދާ ދަތުރުގައެވެ.

17 މާރިޗު 2018ވީ ހޮނިހިރުދުވަހުގެ މެންދުރުފަހު 01:00ގައި ކުޅުދުއްފުށީ ކެމްޕަހުގައި އޮތް ބައްދަލުވުމެއްގައި މި ތަކެތި ޙަވާލުކުރެވުނުއިރު، މި ބައްދަލުވުމަކީ އެ ކެމްޕަހުގެ ދަނާލުގެ ދަރިވަރުން އަދި އެ ކެމްޕަހުގައި ޤާއިމު ކުރެވިފައިވާ ޔޫނިއަންގެ ގޮފީގެ ހިންގާ ކޮމިޓީ މެންބަރުންނާއި އެކު ބޭއްވުނު ބައްދަލުވުމެކެވެ. މި ބައްދަލުވުމުގައި 40 އިންޗީގެ ޓީވީއެއް އެ ކެމްޕަހުގެ ދަނާލުގެ ދަރިވަރުންނަށް ޙަވާލުކުރެވުނުއިރު، 4 ވޮލީ ބޯޅައިގެ އިތުރުން ވޮލީ ނެޓެއްވެސް ވަނީ ޔޫނިއަންގެ ފަރާތުން ހަދިޔާކޮށްފައެވެ. ހަދިޔާ އާއި ޙަވާލުވީ ކުޅުދުއްފުށީ ކެމްޕަހުގެ ގޮފީގެ ހިންގާ ކޮމިޓީ މެންބަރުންކަމަށްވާއިރު، ޙަވާލުކޮށްދެއްވީ ޔޫނިއަންގެ ރައީސް އަރުޝަދު އަޝްރަފް އެވެ. މި މަންޒަރު ފޭސްބުކް ލައިވް މެދުވެރިކޮށް ޔޫނިއަންގެ ފޭސްބުކް ޕޭޖުންވަނީ ވަގުތުން ދުރަށް ދައްކާފައެވެ.

މި ބައްދަލުވުމުގައި ވާހަކަ ދައްކަވަމުން ޔޫނިއަންގެ ރައީސް އަރުޝަދު އަޝްރަފް ވިދާޅުވިގޮތުގައި ޔޫނިއަންގެ އަމާޒަކީ ދަރިވަރުންނާއި ވީހާވެސް ކަައިރިން މަސައްކަތްކުރުމެވެ. އަދި މާލޭ ކެމްޕަހުގެ ދަރިވަރުންނާއި، އަތޮޅުތެރޭ ކެމްޕަސްތަކުގެ ދަރިވަރުންނާއި ދެމެދު އެއްވެސް ތަފާތުކުރުމެއް ނުގެންގުޅޭނެކަމުގެ ފުރިހަމަ ޔަޤީންކަން ދެއްވިއެވެ. ”ޔޫނިއަންގެ މި ދައުރުގެ އެންމެ ބޮޑު އަމާޒަކީ އަތޮޅުތެރޭ ކެމްޕަސްތަކުގެ ދަރިވަރުން ބާރުވެރިކުރުވުން. އެކަން ވަމުން އަންނަތަން ފެނުމަކީ އުފާވެރި މަންޒަރެއް.“ އަރުޝަދު އިތުރަށް ވިދާޅުވިއެވެ. މި ބައްދަލުވުމުގައި އަރުޝަދުގެ އިތުރުން، ކުޅުދުއްފުށީ ކެމްޕަސް ގޮފީގެ ނައިބު ރައީސާ (ޢަމަލީ) ޝިޔާމާ ވެސް ވަނީ ވާހަކަދައްކަވާފައެވެ. މީގެ އިތުރުން ކުޅުދުއްފުއްޓަށް ނިސްބަތްވާ ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް)ގެ ދަރިވަރެއްކަމުގައިވާ ސަމްހާ ވަނީ މި ބައްދަލުވުމުގައި ބައިވެރިވެ، ދަރިވަރުންނާއި މުޚާޠަބުކޮށް ވާހަކަ ދައްކަވާފައެވެ.

ކުޅުދުއްފުށީ ކެމްޕަހުގެ ދަނާލުގެ ދަރިވަރުންނަށް ޓީވީއެއް ހަދިޔާކުރެވުނުއިރު، މި ކަމަކީ ޔޫނިއަންގެ ރައީސްގެ ވަޢުދެއްކަން ފާހަގަކޮށްލެވެއެވެ. އެ ވަޢުދު ފުއްދުނުކަމުގެ އުފާވެރިކަން އިޙުސާސްވާކަންވެސް ރައީސް އަރުޝަދު ފާހަގަކުރެއްވިއެވެ.

މި ހަދިޔާތަކާއިއެކު، ކެމްޕަހުގެ ދަރިވަރުންގެ ބައެއް ކަންބޮޑުވުންތަކަށް ޙައްލެއްލިބިގެން ހިނގައްޖެއެވެ. އެމް.އެން.ޔޫ.އެސް.ޔޫގެ އަބަދުވެސް އަމާޒަކީ ދަރިވަރުންގެ ޚިދުމަތުގައި ސާބިތުކަމާއެކު ދެމިތިބުމެވެ.