ދިވެހިރާއްޖޭގް ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން ހިރިޔާ ސްކޫލުގެ ”އެތިކްސް ކްލަބް“ގެ ދަރިވަރުންނަށް ސެޝަންތަކެއް ކުރިއަށްގެންގޮސްފިއެވެ. މައިގަނޑު 2 ސެޝަނަކަށް ކުރިޔަށްގެންދިޔަ މި ޙަރަކާތުގައި ހިރިޔާ ސްކޫލުގެ ”އެތިކްސް ކްލަބް“ގެ ގާތްގަނޑަކަށް 30ހަކަށް ދަރިވަރުން އަދި އެ ކްލަބުގެ މުދައްރިސުންނާއި ލީޑިންގ ޓީޗަރު ބައިވެރިވިއެވެ. 19 މާރިޗު 2018ވީ ހޯމަދުވަހުގެ ހެނދުނު 11:30ން މެންދުރުފަހު 01:00ށް ކުރިއަށްދިޔަ މި ޙަރަކާތުގެ ފުރަތަމަ ސެޝަން ނަގައިދީފައިވަނީ އެމް.އެން.ޔޫ.އެސް.ޔޫގެ ގޮތްޕެއްކަމަށްވާ ”ހީލާރސް“ގެ މެންބަރުންނެވެ. ދެވަނަ ސެޝަން ނަގައިދީފައިވަނީ އެމް.އެން.ޔޫ.އެސް.ޔޫގެ ”ލީޑަރސް ގްރޫޕު“ންނެވެ.
ހީލާރސް އިން ނަގައިދިން ސެޝަނުގެ މައިގަނޑު މައުޟޫއަކީ ”ޕާރސަނަލް ހައިޖީން“ ނުވަތަ އަމިއްލަ ހަށިގަނޑު ސާފުތާހިރުކޮށް ބެހެއްޓުމެވެ. މި ސެޝަނުގައި ދަރިވަރުންނަށް ޕްރެޒެންޓޭޝަނެއްގެ ތެރެއިން ޞިއްޙަތަކީ ކޮބައިކަމާއި އަމިއްލަ ހަށިގަނޑާއި ޞިއްޙަތުގެ މުހިއްމުކަމާއި އަމިއްލަ ހަޑިގަނޑު ސާފުތާހިރުކޮށް ބަހައްޓާނޭ ގޮތްތަކާއި އެކަމުގައި ފަރުވާތެރިވާންވީ ކަންކަން ކިޔައިދެވުނެވެ. ފާހަގަކޮށްލެވޭފަދަ އެއްބާރުލުމަކާއި ޝަޢުޤުވެރިކަމެއް ހިރިޔާ ސްކޫލުގެ ދަރިވަރުންގެ ފަރާތުން ފެނިގެންދިޔަ މި ސެޝަނުގައި ދަރިވަރުންގެ ޢަމަލީ ބައިވެރިވުން ވަރަށް ބޮޑަށް ފެނިގެންދިޔައެވެ.
ދެވަނައަށް ކުރިއަށްގެންދެވުނީ ”ދަރުމަވެރިކަން“ ނުވަތަ ”ވޮލަންޓިއަރިޒަމް“ (volunteerism) އާއި ގުޅޭ ސެޝަނެކެވެ. މި ސެޝަނުގައި އެމް.އެން.ޔޫ.އެސް.ޔޫގެ ލީޑަރުންގެ ގްރޫޕުގެ ދަރިވަރުންގެ ފަރާތުން ދަރުމަވެރިކަމަކީ ކޮބައިކަމާއި، ދަރުމަވެރިކަމުން ފަރުދީގޮތުން ލިބޭ ފައިދާތަކާއި މުޖުތަމަޢަށްކުރާ ފައިދާތައް އުފެއްދުންތެރިކަމާއެކު ކިޔައިދެވުނެވެ. އަދި މީގެ އިތުރުން، ދުނިޔޭގެ ފެންވަރުގައި ދަރުމަވެރިކަމުގައި ފާހަގަކޮށްލެވޭ ބައެއް ބޭފުޅުންގެ މަޢުލޫމާތު ދަރިވަރުންނަށް ދެވުނެވެ. މި ސެޝަނުގައިވެސް ހިރިޔާ ސްކޫލުގެ ދަރިވަރުންގެ ބައިވެރިވުން ވަރަށް ބޮޑަށް ފެނިގެންދިޔައެވެ.
ސެޝަންތަކަށްފަހު، ހިރިޔާ ސްކޫލުގެ ދަރިވަރުންނަށް އެމް.އެން.ޔޫ ސެންޓްރަލް އޭރިއާގެ ފެކަލްޓީތައް ދައްކައިލެވުނެވެ. އެމް.އެން.ޔޫ.އެސް.ޔޫ އިން ކުރިއަށް މި ގެންދިޔަ ޙަރަކާތަށް ހިރިޔާ ސްކޫލުގެ ފަރާތުން ވަނީ ޝުކުރު އަދާކޮށްފައެވެ. އަދި މި ޙަރަކާތުގެ ސަބަބުން ދަރިވަރުންނަށް ވަރަށް ގިނަ މަޢުލޫމާތު ލިބިގެންދިޔަކަން ފާހަގަކުރެއްވިއެވެ. ހަމަ އެހެންމެ، އެމް.އެން.ޔޫ.އެސް.ޔޫގެ ޢިލްމީ ނައިބު ރައީސް އާދަމް ރުޝްދީ މަޢުލޫމާތުދެއްވި ގޮތުގައި ކުރިއަށްއޮތް ދުވަސްތަކުގައިވެސް މިފަދަ ޢިލްމީ އެތައް ޙަރަކާތްތަކެއް އެމް.އެން.ޔޫ.އެސް.ޔޫގެ ފަރާތުން ކުރިއަށްގެންދިޔުމަށްވަނީ ރޭވިފައެވެ.
