ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީން ޖަމިއްޔާގެ ގޮފިތަކުގެ ހިންގާ ކޮމިޓީތަކާއި ބައްދަލުކުރާ ބައްދަލުކުރުންތަކުގެ 2ވަނަ ބައްދަލުވުން ފެކަލްޓީ އޮފް އެޑިއުކޭޝަންގައި ޤާއިމްކޮށްފައިވާ ގޮފި ”ފެސާ“ (ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން) އާއި އެކު ބާއްވައިފިއެވެ.
އޭޕްރީލް 4 ވަނަ ދުވަހުގެ ހަވީރު 05:30ގައި ބޭއްވުނު މި ބައްދަލުވުމުގައި ”ފެސާ“ގެ ހިންގާ ކޮމިޓީގެ ހުރިހާ މެންބަރުން ބައިވެރިވިއިރު، ޔޫނިއަންގެ ހިންގާ ކޮމިޓީން އެސިސްޓެންޓް ސެކްރެޓަރީ ފިޔަވައި އެހެން ހުރިހާ މެންބަރުން ބައިވެރިވިއެވެ. ޔޫނިއަންގެ އޮފީހުގައި ކުރިއަށްދިޔަ މި ބައްދަލުވުމުގައި ވާހަކަ ދައްކަވަމުން ޔޫނިއަންގެ ރައީސް އަރުޝަދު އަޝްރަފްވަނީ ބައްދަލުވުންތައް ބޭއްވުމުގެ މަޤްޞަދު ފެސާގެ މެންބަރުންނަށް ކިޔާދީފައެވެ. އަދި ފެސާއިން މިހާތަނަށް މިއަހަރު ކުރިއަށްގެންދިޔަ ޙަރަކާތްތައް އަލިއަޅުވާލައި ވާހަކަ ދެއްކެވިއެވެ. ”މިއަހަރުގެ މިހާތަނަށް ފެސާ އަޅުގަނޑުމެންނަށް ފެނިގެން މިދަނީ ވަރަށް ޙަރަކާތްތެރި ގޮތްޕެއްގެ ގޮތުގައި. ނަމަވެސް އަދިވެސް ރަނގަޅުކޮށްލަންވީ ކަންކަން އެބަހުރި“ ބައްދަލުވުމުގެ ތެރެއިން ރައީސް އަރުޝަދު ވިދާޅުވިއެވެ. ރައީސްގެ އިތުރުން ޔޫނިއަންގެ ހިންގާކޮމިޓީގެ ހުރިހާ މެންބަރުންވެސްވަނީ އެ މެންބަރެއްގެ މަޤާމާއި ގުޅޭގޮތުން ފެސާގެ ހިންގާކޮމިޓީއަށް “ފީޑްބެކް“ ދެއްވާފައެވެ. އަދި ފެސާގެ ފަރާތުންވެސް އެ ކޮމިޓީގެ ހުރިހާ މެންބަރުން ވާހަކަދެއްކެވިއެވެ.
މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. ފެސާ އާއި އެކު މި ސިލްސިލާގެ 2 ވަނަ ބައްދަލުވުން ބޭއްވުނުއިރު، ފުރަތަމަ ބައްދަލުވުން ބޭއްވުނީ ”ސިއާ“ އާއި އެކުއެވެ.
