ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީން ޖަމިއްޔާގެ ގޮފިތަކުގެ ހިންގާ ކޮމިޓީތަކާއި ބައްދަލުކުރާ ބައްދަލުކުރުންތަކުގެ 3 ވަނަ ބައްދަލުވުން ފެކަލްޓީ އޮފް ހެލްތް ސައިންސަސްގައި ޤާއިމްކޮށްފައިވާ ގޮފި ”ހީލާރސް“ އާއި އެކު ބާއްވައިފިއެވެ.
ހީލާރސްގެ ހިންގާ ކޮމިޓީގެ ހުރިހާ މެންބަރުންނާއި ޔޫނިއަންގެ ހިންގާ ކޮމިޓީގެ މީޑިއާ ކޯޑިނޭޓަރ އަދި އެސިސްޓެންޓް ސެކްރެޓަރީ ފިޔަވައި އެހެން ހުރިހާ މެންބަރުން ބައިވެރިވި މި ބައްދަލުވުން ކުރިއަށްދިޔައީ އޭޕްރީލް 4 ވީ ބުދަދުވަހުގެރޭ 09:00ގައެވެ. މި ބައްދަލުވުމުގައި ޔޫނިއަންގެ ރައީސް އަރުޝަދު އަޝްރަފްވަނީ މި ބައްދަލުވުންތައް ކުރިއަށްގެންދާ މަޤްޞަދު ހީލާރސްގެ ހިންގާ ކޮމިޓީގެ މެންބަރުންނަށް ސާފުކޮށްދެއްވާފައެވެ. އަދި ނައިބު ރައީސް (ގޮފިތައް) ޢަލީ ޝަމްޢޫންވަނީ ހީލާޜސްގެ ފަރާތުން މިހާރުވެސް ވަރަށް ގިނަ ޙަރަކާތްތަކެއް މިއަހަރުގެ މިހާތަނަށް ފެނިގެންގޮސްފައިވާކަން ފާހަގަކޮށްފައެވެ. އަދި ކުރިއަށްއޮތްތަނުގައި ޔޫނިއަންގެ އެހެން ގޮތްޕަކާއި ހީލާރސް އާއި ގުޅިގެން ޙަރަކާތެއް ފެންނާނޭކަމަށް އުއްމީދުކުރާކަމަށް ޝަމްޢޫން ވިދާޅުވިއެވެ. ހީލާރސް އިން މިއަހަރުގެ މިހާތަނަށް ކުރިއަށްގެންދިޔަ ޙަރަކާތްތަކާއި ގުޅޭގޮތުން ޔޫނިއަންގެ ހުރިހާ މެންބަރުންވެސް މި ބައްދަލުވުމުގައި ވާހަކަދެއްކެވިއެވެ. އަދި ހީލާރސްގެ ފަރާތުން ރައީސް އަޠީފް އަދި ނައިބު ރައީސް (ޢިލްމީ) މަޒީދު ވަނީ ވާހަކަދައްކަވާފައެވެ.
މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. ހީލާރސް އާއިއެކު މި ބޭއްވުނީ 3 ވަނަ ބައްދަލުވުންކަމަށްވާއިރު، މީގެ ކުރިން ”ފެސާ“ އަދި ”ސިއާ“ އާއި އެކުވަނީ ބައްދަލުވުންތައް ބޭއްވިފައެވެ.
