ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީން ޖަމިއްޔާގެ ގޮފިތަކުގެ ހިންގާ ކޮމިޓީތަކާއި ބައްދަލުކުރާ ބައްދަލުކުރުންތަކުގެ 4 ވަނަ ބައްދަލުވުން ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގައި ޤާއިމްކޮށްފައިވާ ގޮފި، ސޮސައިޓީ ފޯ ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް) އާއި އެކު ބާއްވައިފިއެވެ.
ޝެޓްސްގެ ހިންގާ ކޮމިޓީގެ 5 މެންބަރުން (ނައިބު ރައީސް (ޢަމަލީ) ބައިވެރިނުލައްވާ) އަދި ޔޫނިއަންގެ ހިންގާ ކޮމިޓީގެ ނައިބު ރައީސް (ގޮފިތައް)، ނައިބު ރައީސް (ޢިލްމީ)، މީޑިއާ ކޯޑިނޭޓަރ އަދި އެސިސްޓެންޓް ސެކްރެޓަރީ މި ބައްދަލުވުމުގައި ބައިވެރިވިއިރު، މި ބައްދަލުވުން ކުރިއަށްދިޔައީ އޭޕްރީލް 5 ވަނަ ދުވަހުގެ މެންދުރުފަހު 02:00ގައެވެ. ޔޫނިއަންގެ އޮފީހުގައި މި ބައްދަލުވުން ކުރިއަށްދިޔައިރު، ޝެޓްސްގެ މެންބަރުންނަށް މި ބައްދަލުވުންތަކުގެ ބޭނުން ކިޔައިދެއްވީ ނައިބުރައީސް (ގޮފިތައް) ޢަލީ ޝަމްޢޫނެވެ. ޝެޓްސްގެ ފަރާތުން ކުރިއަށްރޭވިފައިވާ ޙަރަކާތްތަކާއި ބެހޭގޮތުން މަޝްވަރާކުރެވުނު މި ބައްދަލުވުން ކުރިއަށްދިޔައީ ގާތްގަނޑަކަށް 30 މިނެޓުގެ ދިގުމިނަށެވެ.
މި ބައްދަލުވުންތަކަކީ ޔޫނިއަންގެ މިހާރު އޮތް 13 ގޮތްޕާއެކު ވަކިވަކިން ބައްދަލުވުންތަކެއް ބޭއްވުމަށް ޔޫނިއަންގެ ހިންގާ ކޮމިޓީން ނިންމައިގެން ބާއްވާ ބައްދަލުވުންތަކެކެވެ. މީގެ ކުރިން ސިއާ، ފެސާ އަދި ހީލާރސް އާއި އެކު ބައްދަލުވުންތައްވަނީ ކުރިއަށްގެންގޮސްފައެވެ.
