ދިވެހިރާއްޖޭގެ ޤައުމީ ޔުނިވަރސިޓީއަށް އަލަށް ގުޅުނު ދަރިވަރުންނަށް އަމާޒުކޮށްގެން ކޮންމެ ސެމިސްޓަރއަކު ވެސް ބާއްވަމުން އަންނަ ”ފްރެޝާސް ނައިޓް“ގެ މިއަހަރުގެ ފުރަތަމަ ސެމިސްޓަރގެ ޙަރަކާތް ބާއްވައިފިއެވެ.
21 ފެބުރުވަރީ 2019ވީ ބުރާސްފަތި ދުވަހުގެރޭ ބޭއްވުނު މި ޙަރަކާތް ކުރިއަށްދިޔައީ އެމް.އެން.ޔޫގެ އޭ-ބްލޮކުގެ ”ބެންޗް އޭރިއާ“ގައެވެ. މި ޙަރަކާތް ފެށިގެންދިޔައީ ކީރިތި ޤުރުއާނުގެ ބަރަކާތުންނެވެ. ޤުރުއާން ކިޔެވީ އެމް.އެން.ޔޫގެ ފެކަލްޓީ އޮފް އެޑިއުކޭޝަންގެ ދަރިވަރު ޚާތިމާ ޔޫސުފެވެ. އެއަށްފަހު އެމް.އެން.ޔޫގެ ޑީން އޮފް ސްޓޫޑެންޓްސް އަލްފާޟިލާ ނާދިޔާ އަހްމަދު، ވައިސް ޗާންސެލަރ ޑރ. ޢަލީ ފަވާޒު ޝަރީފް އަދި ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން ވާހަކަފުޅު ދެއްކެެވިއެވެ. އެމް.އެން.ޔޫ.އެސް.ޔޫގެ ފަރާތުން ވާހަކަ ދެއްކެވީ އެމް.އެން.ޔޫ.އެސް.ޔޫގެ ނައިބު ރައީސް (އަމަލީ) ޙަސަން ޝާހެވެ.
މި ޙަރަކާތުގައި ދެން ކުރިއަށް ގެންދެވުނީ މުނިފޫހިފިލުވުމުގެ އެކި ކުޅިވަރުތަކެވެ. އެގޮތުން، ބަހުރުވަ ގޭމާއި، ”ހިއުމަން ނޮޓު“ ގޭމުގެ އިތުރުން ބަނަސް ކެއުމުގެ ގޭމެއްވެސް މި ޙަރަކާތުގެ ތެރެއިން ވަނީ ކުރިއަށް ގެންދެވިފައެވެ. މި ގޭމުތަކަކީ އެމް.އެން.ޔޫ.އެސް.ޔޫ އާއި އެމް.އެން.ޔޫ ސްޓޫޑެންޓް ސަޕޯޓު ގުޅިގެން ކުރިއަށް ގެންދެވުނު ކުޅިވަރުތަކެއް ކަމަށްވާއިރު، މި ޙަރަކާތުގެ ޑެކަރޭޝަނުގައިވެސް އެމް.އެން.ޔޫ.އެސް.ޔޫގެ މެންބަރުން ވަނީ މުހިއްމު ދައުރެއް އަދާކޮށްފައެވެ.
ލިޔުނީ: މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
