ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން އިންތިޒާމުކޮށްގެން ސިލްސިލާގޮތެއްގައި ބާއްވަމުންދާ ”ނިއު ލީޑަރސް ނައިޓް“ގެ 4 ވަނަ ޙަރަކާތް ބާއްވައިފިއެވެ. މިއީ 2019 ވަނަ އަހަރުގައި ބޭއްވުނު މިފަދަ ފުރަތަމަ ޙަރަކާތްކަމަށްވާއިރު، މިދިޔަ އަހަރު ވަނީ މީގެ 3 ޙަރަކާތެއް ބާއްވާފައެވެ.
08 މާރިޗު 2019ވީ ހުކުރުދުވަހުގެރޭ އެމް.އެން.ޔޫގެ ފެކަލްޓީ އޮފް އެޑިއުކޭޝަންގެ ޕީ.އީ ހޯލުގައި ކުރިއަށްދިޔަ މި ޙަރަކާތުގައި ލީޑަރސް ގްރޫޕަށް އަލަށް ގުޅުނު 70ށް ވުރެ ގިނަ ދަރިވަރުން ވަނީ ބައިވެރިވެފައެވެ. މި ޙަރަކާތުގައި އެމް.އެން.ޔޫ.އެސް.ޔޫގެ ހިންގާ ކޮމިޓީގެ 8 މެންބަރުން (ރައީސް އަރުޝަދު އަޝްރަފް، ނައިބު ރައީސް – އިލްމީ ޙަސަން ރުޝްދީ، ނައިބު ރައީސް – އަމަލީ ޙަސަން ޝާހު، ނައިބު ރައީސް – ގޮފިތައް ޢަލީ ޝަމްޢޫން، ޚަޒާންދާރު ޢަބްދުﷲ ޝަހުނީޒް، ސެކްރެޓަރީ އަނާ އަޙްމަދު، އެސިސްޓެންޓް ސެކްރެޓަރީ އާމިނަތު ރައުދާ މުޙައްމަދު، މީޑިއާ ކޯޑިނޭޓަރ މުޙައްމަދު ޝާން ޢާމިރު)ގެ އިތުރުން މިހާރުވެސް ލީޑަރސް ގްރޫޕްގައި ޙަރަކާތްތެރިވާ ދަރިވަރުންނާއި، ގޮފިތަކުގެ ބައެއް މެންބަރުންވަނީ ބައިވެރިވެފައެވެ.
މި ޙަރަކާތް ހުށަހަޅައިދެއްވާފައިވަނީ ރައީސް އަރުޝަދު އަޝްރަފެވެ. މިގޮތުން، ނިއު ލީޑަރސްއަށް އަމާޒުކޮށް ކުރިއަށް ގެންދެވުނު ޙަރަކާތްތަކުގެ ތެރޭގައި މުނިފޫހިފިލުވުމުގެ ކުއިޒެއްގެ އިތުރުން ކުއްލި މައުޟޫއަށް ވާހަކަދެއްކުން ހިމެނެއެވެ.
”ނިއު ލީޑަރސް ނައިޓް“ އަކީ އެމް.އެން.ޔޫގެ އިންޓޭކްތަކާ ދިމާކޮށް، އެމް.އެން.ޔޫއަށް އަލަށް ގުޅޭ ދަރިވަރުންގެ ތެރެއިން، އެމް.އެން.ޔޫ.އެސް.ޔޫގެ ޙަރަކާތްތަކުގައި އަމަލީގޮތުން އުޅެން ބޭނުންވާ ދަރިވަރުންނަށް އަމާޒުކޮށް ބާއްވާ ތަޢާރަފުގެ ޙަރަކާތެކެވެ.
އެމް.އެން.ޔޫ.އެސް.ޔޫ ލީޑާރސް ގްރޫޕަކީ އެމް.އެން.ޔޫ.އެސް.ޔޫގެ ޙަރަކާތްތަކުގައި އުޅުމަށް އިސްވެ އުޅުމަށް ޝަޢުޤުވެރިވާ ދަރިވަރުންނަށް އަމާޒުކޮށް 2018ވަނަ އަހަރު ހަދާފައިވާ ގްރޫޕެކެވެ. މި ގްރޫޕަށް ވަނުމަށް އެމް.އެން.ޔޫގެ ކޮންމެ ދަރިވަރަކަށްވެސް ފުރުޞަތު އޮތްއިރު، ހަމަ އެކަނި ކޮށްލަންޖެހޭނެ ކަމަކީ އެމް.އެން.ޔޫ.އެސް.ޔޫގެ އޮފީހަށް ދުރުވެ، ނަންނޯޓު ކޮށްލުމެވެ.
ލިޔުނީ: މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
