ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް)އިން އިންތިޒާމު ކޮށްގެން ބާއްވާ ”ވީ.އޭ.އެމް އިންޓަރ ކޮލެޖް / ޔުނިވަރސިޓީ ވޮލީބޯޅަ މުބާރާތް 2019″ގައި ފުރަތަމަ ކުޅުނު 2 މެޗު އެމް.އެން.ޔޫގެ 2 ޓީމުންވެސް ކާމިޔާބުކޮށްފިއެވެ.
ފިރިހެން ޓީމުގެ ފުރަތަމަ މެޗު 23 މާރިޗު 2019ވީ ހޮނިހިރުދުވަހުގެރޭ 10:00ގައި ކުޅުނީ އެމް.އައި ކޮލެޖާ ދެކޮޅަށެވެ. މި މެޗު ކާމިޔާބުކުރީ ސީދާ 3 ސެޓުންނެވެ. ފިރިހެން ޓީމުގެ ދެވަނަ މެޗު 25 މާރިޗު 2019ވީ ހޯމަދުވަހުގެރޭ 08.00ގައި ކުޅުނީ ސައިރިކްސް ކޮލެޖާ ދެކޮޅަށެވެ. މި މެޗުވެސް އެމް.އެން.ޔޫ ޓީމުން ކާމިޔާބުކުރީ ސީދާ 3 ސެޓުންނެވެ. މި 2 މެޗުގެ ވެސް އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ ޓީމުގެ ޖާރޒީ ނަންބަރ 09 ޝަމާއީލް ޙުސައިން އެވެ.
އަންހެން ޓީމުގެ ފުރަތަމަ މެޗު 24 މާރިޗު 2019ވީ އާދީއްތަދުވަހުގެރޭ 10:00ގައި ކުޅުނީ ސައިރިކްސް ކޮލެޖާ ދެކޮޅަށެވެ. މި މެޗު 1-3 ސެޓުން ކާމިޔާބުކޮށްފައިވާއިރު، 25 މާރިޗު 2019ވީ ހޯމަދުވަހުގެރޭ އެމް.އައި ކޮލެޖާ ދެކޮޅަށް ކުޅެވުނު ދެވަނަ މެޗު ވެސް 3-1 ސެޓުން އެމް.އެން.ޔޫގެ ޓީމުން ވަނީ ކާމިޔާބުކޮށްފައެވެ. މި ދެ މެޗުގެ ވެސް އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ ޓީމުގެ ޖާރޒީ ނަންބަރ 09 އާމިނަތު ޝަހާ ޝާމިން އެވެ.
އެމް.އެން.ޔޫ ޓީމުތަކުގެ ގްރޫޕް ސްޓޭޖުގެ ފަހު މެޗު އޮންނާނީ 28 މާރިޗު 2019 ވާ ބުރާސްފަތި ދުވަހެވެ. ހަވީރު 04:00ގައި ފިރިހެން ޓީމުގެ މެޗު އޮންނައިރު، އަންހެން ޓީމުގެ މެޗު އޮތީ ރޭގަނޑު 08:00ގައެވެ. 2 ޓީމުވެސް ކުޅޭނީ ވިލާ ކޮލެޖާ ދެކޮޅަށެވެ. މި މުބާރާތުގެ ހުރިހާ މެޗެއްވެސް ކުޅެވެނީ ސޯޝަލް ސެންޓަރުގެ އިންޑޯ ހޯލުގައެވެ.
ލިޔުނީ: މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
