ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފިތަކުގެ ހިންގާ ކޮމިޓީގެ މެންބަރުން ހޮވުމަށް ބާއްވާ އިންތިޚާބު މާލޭ ކެމްޕަހުގައި މާދަމާ (02 އޭޕްރީލް 2019) އޮންނާނެއެވެ. އެހެން ނަމަވެސް އަތޮޅުތެރޭ ކެމްޕަސްތަކުގައި އިންތިޚާބު އޮންނާނީ އޭގެ އަނެއް ދުވަހު (03 އޭޕްރީލް 2019) އެވެ.
ވޯޓުލުން ފަށާނީ ހެނދުނު 10.00ގައެވެ. އަދި ރޭގަނޑު 07.00ށް ވޯޓުލުން ކުރިއަށްދާނެއެވެ. މާދަމާ އޮންނަ އިންތިޚާބުގައި ވޯޓުލުމަށް ހަމަޖެހިފައިވަނީ ސޮސައިޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް)ގެ ސެކްރެޓަރީ އަދި ސޮސައިޓީ އޮފް ޝަރީޢާ އެންޑް ލޯ (އެސް.އެސް.އެލް)ގެ ނައިބު ރައީސް (ޢަމަލީ)ގެ މަޤާމަށެވެ.
ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)ގެ ދަރިވަރުން ވޯޓުލާ ފޮށި ބެހެއްޓުމަށް ހަމަޖެހިފައިވަނީ އެމް.އެން.ޔޫ ސެންޓްރަލް އެޑްމިނިސްޓްރޭޝަން (އޭ.ބްލޮކް ކުރިމަތި) ގައި ކަމަށްވާއިރު، ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް)ގެ ދަރިވަރުން ވޯޓުލާ ފޮށި ހުންނާނީ ޖީ.ބްލޮކް (ކުރީގެ އެމް.އީ.އެސް އިމާރާތް) ގައެވެ.
ކޮންމެ ދަރިވަރަކުވެސް ވޯޓުލާން އަންނައިރު، އެމް.އެން.ޔޫ ދަރިވަރުންގެ ކާޑު ގެންނަން ޖެހޭނެއެވެ. ދަރިވަރުންގެ ކާޑު ނެތް ދަރިވަރުންނަށް ވޯޓުލެވޭނީ ވޯޓު ފޮށި ކައިރި ކައުންޓަރުން ދޫކުރާ ސްލިޕް ކޮޅެއް ސްޓޫޑެންޓް ސަޕޯޓަށް ގޮސް ފުރުމަށްފަހުއެވެ.
ލިޔުނީ: މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
