ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި ”އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2019″ގެ އަންހެން ޑިވިޝަނުގެ ޗެމްޕިއަންކަން އެމް.އެން.ޔޫ ބިޒްނަސް ސްކޫލުން ހޯދައިފިއެވެ. 28 އެޕްރީލް 2019ވީ ހޮނިހިރުދުވަހުގެރޭ ފެކަލްޓީ އޮފް އެޑިއުކޭޝަންގެ ޕީ.އީ ހޯލުގައި، ފެކަލްޓީ އޮފް ހެލްތު ސައިންސަސް އާ ބައްދަލުކޮށް 3 ސެޓު 1 ސެޓުން އެމް.އެން.ޔޫ.ބީ.އެސް މޮޅުވިއިރު، މިއީ އެމް.އެން.ޔޫ.ބީ.އެސް އިން ވިދިވިދިގެން މި ތަށި ހޯދި 2 ވަނަ ފަހަރެވެ.
ފައިނަލް މެޗުގެ ފުރަތަމަ ސެޓު އެމް.އެން.ޔޫ.ބީ.އެސް އިން 25-11ން ފަސޭހަކަމާއެކު ގެންދިޔައިރު، 2 ވަނަ ސެޓު 25-19ގެ ނަތީޖާއަކުން ކާމިޔާބުކޮށް އެފް.އެޗް.އެސް އިން ނަތީޖާ ހަމަހަމަކުރިއެވެ. ނަމަވެސް، ދެން ކުޅެވުނު 2 ސެޓު 25-20 އަދި 25-08ން ކާމިޔާބުކޮށް އެމް.އެން.ޔޫ.ބީ.އެސް އިން ޗެމްޕިއަންކަން ހޯދިއެވެ. އެފް.އެޗް.އެސް އިން ފައިނަލަށް ދަތުރުކޮށްފައިވަނީ ކުޅުނު އެއްވެސް މެޗަކުން ބަލިނުވެއެވެ. އެގޮތުން ގްރޫޕް ސްޓޭޖުގައި ކުޅުނު 2 މެޗު ކާމިޔާބުކޮށް ސެމީ ފައިނަލުން ޖާގަ ހޯދިއިރު، ސެމީ ފައިނަލުގައި ސެންޓަރ ފޯ ފައުންޑޭޝަން (ސީ.އެފް.އެސް)އާ ބައްދަލުކޮށް މެޗު ކާމިޔާބުކޮށްފައިވަނީ 2-3 ސެޓުންނެވެ. އެމް.އެން.ޔޫ.ބީ.އެސް އަށް ސެމީ ފައިނަލުން ޖާގަ ލިބުނީ ގްރޫޕް ސްޓޭޖުގައި އެންމެ ރަނގަޅު ނަތީޖާ ހޯދި ގްރޫޕްގެ ރަނަރސްއަޕްގެ ގޮތުގައެވެ. ސެމީ ފައިނަލުގައި ސްކޫލް އޮފް ނާރސިންގ (އެސް.އެން)އާ ބައްދަލުކޮށް ފޯރިގަދަ މެޗަކަށްފަހު މެޗު ކާމިޔާބުކުރީ 3-2 ސެޓުންނެވެ. ފައިނަލް މެޗުގެ އެންމެ މޮޅު ކުޅުންތެރިޔަކަށް ހޮވުނީ އެމް.އެން.ޔޫ.ބީ.އެސްގެ ޖާރޒީ ނަންބަރ 5 ޝަމްހާ ރިޔާޒެވެ.
އަންހެން ޑިވިޝަނުގައި ޖުމްލަ 9 ޓީމެއް ވާދަކޮށްފައިވާއިރު ބައިވެރިވި ޓީމުތަކަށް ހަނދާނީ ލިޔުން ޙަވާލުކޮށްދެއްވާފައިވަނީ އެމް.އެން.ޔޫ.އެސް.ޔޫގެ ކުރީގެ ރައީސް އަދި އެމް.އެން.ޔޫގެ ކައުންސިލްގައި ދަރިވަރުން ތަމްސީލުކުރާ މެންބަރ އަލްއުސްތާޛް އަލީ ރަޝީދެވެ.
، މި ޑިވިޝަންގެ ގަދަ 6 ގައި ހިމެނިފައިވަނީ ސްކޫލް އޮފް ނާރސިންގެ ޖާރޒީ ނަންބަރ 7 ފާޠިމަތު މާހިޔާ، ސެންޓަރ ފޯ ފައުންޑޭޝަން ސްޓަޑީޒްގެ ޖާރޒީ ނަންބަރ 4 ޙަލީމަތު އުނޫޝާ، ފެކަލްޓީ އޮފް ހެލްތު ސައިންސަސްގެ ޖާރޒީ ނަންބަރ 01 ފާޠިމަތު އަޒްލީމާ އަދި ޖާރޒީ ނަންބަރ 08 ޝާމާ ޢަބްދުއްޞަމަދު، އެމް.އެން.ޔޫ.ބީ.އެސްގެ ޖާރޒީ ނަންބަރ 06 މަރިޔަމް ހަމްނާ އަދި ޖާރޒީ ނަންބަރ 05 ޝަމްހާ ރިޔާޒެވެ. މި ޑިވިޝަނުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސްގެ ޖާރޒީ ނަންބަރ 12 އިނާޝާ ޢަބްދުއްރަޙީމެވެ.
ގަދަ 6 ށް ހޮވުނު ކުޅުންތެރިންނަށް ޓްރޮފީ ޙަވާލުކޮށްދެއްވީ ދިވެހިރާއްޖޭގެ ވޮލީބޯޅައިގެ ޤައުމީ ޓީމުގެ ކުރީގެ ކެޕްޓަން އަދި ސެޓަރ އަލްފާޟިލް ފަތުޙުﷲ ވަޙީދުކަމަށްވާއިރު، އެންމެ މޮޅު ކުޅުންތެރިޔާއަށް ޓްރޮފީ ޙަވާލުކޮށްދެއްވީ އެފް.އެޗް.އެސްގެ ލެކްޗަރަރ އަލްފާޟިލް މުޙައްމަދު ޒައިދެވެ.
އަންހެން ޑިވިޝަނުގެ ރަނަރސްއަޕްއަށް ހޮވުނު އެފް.އެޗް.އެސް އަށް މެޑަލް އަދި ޓްރޮފީ ޙަވާލުކޮށްދެއްވީ އެމް.އެން.ޔޫގެ ވައިސް ޗާންސެލަރ ޑރ. އަލީ ފަވާޒު ޝަރީފުކަމަށްވާއިރު، ފިރިހެން ޑިވިޝަނުގެ ޗެމްޕިއަން ޓީމް އެމް.އެން.ޔޫ.ބީ.އެސް އަށް މެޑަލް އަދި ޓްރޮފީ ޙަވާލުކޮށްދެއްވީ ވައިސް ޗާންސެލަރގެ އިތުރުން ރަސްމިއްޔާތުގެ ޝަރަފްވެރި މެޙްމާން ފިއުލް އެކްސްޕްރެސް މޯލްޑިވްސްގެ މެނޭޖިންގ ޑިރެކްޓަރ އަލްފާޟިލް މުޙައްމަދު ޝިހާބެވެ. އަދި މީގެ އިތުރުން ފެކަލްޓީ އޮފް އެޑިއުކޭޝަން އަދި އެ ފެކަލްޓީގެ ދަރިވަރުންގެ ފަރާތުން ޗެމްޕިއަން ޓީމަށް ދިން ޓްރޮފީ ޙަވާލުކޮށްދެއްވީ ފެކަލްޓީ އޮފް އެޑިއުކޭޝަން ސްޓޫޑެންޓްސް އެސޯސިއޭޝަންގެ ނައިބު ރައީސާ (އަމަލީ) އަލްފާޟިލާ ޙަލީމަތު އާކިފާ ރަޝީދެވެ.
މުބާރާތުގެ ނިންމުމުގައި ރަސްމިއްޔާތުގައި، ދިވެހިރާއްޖޭގެ 23 އަހަރުންދަށުގެ ޤައުމީ އަންހެން ވޮލީޓީމު ޕޫލްގައި ހިމެނޭ އެމް.އެން.ޔޫގެ ދަރިވަރުންނަށް، އެމް.އެން.ޔޫއަށް ރީތި ނަން ހޯދައިދިނުމުގެ ޝަރަފުގައި އެމް.އެން.ޔޫ.އެސް.ޔޫ އިން ހަނދާނީ ލިޔުމެއް ދެވުނެވެ. މި ހަނދާނީ އެން.ޔޫގެ ވައިސް ޗާންސެލަރ ޑރ. ޢަލީ ފަވާޒު ޝަރީފެވެ. މި ޕޫލްގައި ހިމެނޭ ދަރިވަރުންނަކީ: ޝަމްހާ ރިޔާޒް (އެމް.އެން.ޔޫ.ބީ.އެސް)، އިނާޝާ ޢަބްދުއްރަޙީމް (އެމް.އެން.ޔޫ.ބީ.އެސް)، މަރިޔަމް ނިޝާ (އެސް.އެން)، ފާޠިމަތު މާހިޔާ (އެސް.އެން)، ނަރީމާ އިދުރީސް (އެފް.އެޗް.ޓީ.އެސް)، ބަސްމާ ނައީމް (އެފް.އެޗް.ޓީ.އެސް)، ފާޠިމަތު އަޒްލީމާ (އެފް.އެޗް.އެސް)، މަރިޔަމް އަޒުމާ (އެފް.އެޗް.އެސް) އަދި ފާޠިމަތު ޝިފްނާ (އެފް.އެލް.އައި.އެސް) އެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2019ގެ ހުރިހާ ޓްރޮފީއެއް ސްޕޮންސަރ ކޮށްދެއްވާފައިވަނީ ފިއުލް އެކްސްޕްރެސް މޯލްޑިވްސްގެ ފަރާތުންނެވެ.
ލިޔުނީ: މުޙައްމަދު ޝާން ޢާމިރު
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
