ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ރައީސްކަމުގެ މަޤާމަށް ކުރިން މީޑިއާ ކޯޑިނޭޓަރަކަށް ހުރި މުހައްމަދު ޝާން ޢާމިރު އަދި މީޑިއާ ކޯޑިނޭޓަރުކަމުގެ މަޤާމަށް އާމިނަތު ސަމާ އިންތިޚާބުވެއްޖެއެވެ.
ރައީސްކަމުގެ މަޤާމާއި މީޑިއާ ކޯޑިނޭޓަރުކަމުގެ މަޤާމަށް އާ މެންބަރުން އިންތިޚާބު ކުރުމަށް ނިންމީ އެ މަޤާމުތަކުގައި ތިއްބެވި 2 މެންބަރުން ދައުރުގެ މެދުތެރެއިން އިސްތިއުފާ ދެއްވުމާ ގުޅިގެންނެވެ. މިގޮތުން ރައީސް އަރުޝަދު އަޝްރަފް އިސްތިއުފާ ދެއްވާފައިވަނީ 13 ޖޫން 2019 ގައެވެ. އަދި މީޑިއާ ކޯޑިނޭޓަރ މުޙައްމަދު ޝާން ޢާމިރު މީޑިއާ ކޯޑިނޭޓަރކަމުގެ މަޤާމުން އިސްތިއުފާ ދެއްވާފައިވަނީ 14 ޖޫން 2019ގައެވެ.
މި މަޤާމުތަކަށް ކުރިމަތިލުމަށް 16 ޖޫން 2019ގައި އިޢުލާންކޮށްފައިވާއިރު، 27 ޖޫން 2019ށް މުއްދަތު ހަމަވިއިރު، ކޮންމެ މަޤާމަކަށްވެސް ކުރިމަތިލީ އެންމެ މެންބަރެކެވެ. އެހެންކަމުން އެ މަޤާމުތަކަށް ކުރިމަތިލި މެންބަރުން އިންތިޚާބަކާނުލާ ވަނީ މަޤާމަށް އިންތިޚާބުވެފައެވެ. މި މެންބަރުން އިންތިޚާބުވީ ދައުރުގެ މެދުތެރެއިން ކަމުގައިވިޔަސް، 7 ވަނަ ދައުރު ނިމުމާއެކު އެ މެންބަރުންގެ ދައުރުވެސް ނިމޭނެއެވެ.
މަޤާމުތަކަށް ހޮވުނު 2 މެންބަރުންނަށް މަޤާމުގެ ލިޔުން ޙަވާލުކޮށްދެއްވާފައިވަނީ 08 ޖުލައި 2019ވީ ހޯމަދުވަހު އެމް.އެން.ޔޫގެ އޭ-ބްލޮކުގެ ކޮންފަރެންސް ހޯލުގައި ބޭއްވުނު ރަސްމިއްޔާތެއްގައި އެމް.އެން.ޔޫގެ ވައިސް ޗާންސެލަރ ޑރ. ޢަލީ ފަވާޒު ޝަރީފެވެ. މި ރަސްމިއްޔާތުގައި ޑރ. ޢަލީ ފަވާޒު ޝަރީފުގެ އިތުރުން ޑެޕިއުޓީ ވައިސް ޗާންސެލަރ އަލްފާޟިލާ ޢާއިޝަތު ޝާހީން، ޑީން އޮފް ސްޓޫޑެންޓްސް އަލްފާޟިލާ ނާދިޔާ އަޙްމަދު، އެމް.އެން.ޔޫ ކައުންސިލްގައި ދަރިވަރުން ތަމްސީލުކުރާ މެންބަރ އަލްއުސްތާޛް ޢަލީ ރަޝީދުގެ އިތުރުން ކުރީގެ ރައީސް އަލްފާޟިލް އަރުޝަދު އަޝްރަފް ބައިވެރިވެވަޑައިގަތެވެ. މީގެ އިތުރުން އެމް.އެން.ޔޫ.އެސް.ޔޫގެ ހިންގާ ކޮމިޓީގެ ބައެއް މެންބަރުންނާއި، އެޑްވައިޒަރީ ބޯޑުގެ ބައެއް މެންބަރުންގެ އިތުރުން ގޮފިތަކުގެ ހިންގާ ކޮމިޓީގެ ބައެއް މެންބަރުން ވަނީ މި ރަސްމިއްޔާތުގައި ބައިވެރިވެފައެވެ.
އެމް.އެން.ޔޫ.އެސް.ޔޫ އަށް އަލަށް އިންތިޚާބުވި މެންބަރުންނާއެކު ޖަމިއްޔާގެ ހިންގާ ކޮމިޓީން ވަނީ ކުރީގެ ރައީސް އަރުޝަދު އަޝްރަފް، ޖަމިއްޔާގެ 7 ވަނަ ދައުރުގެ ހިންގާ ކޮމިޓީގެ އެޑްވައިޒަރީ ބޯޑަށް ޢައްޔަނުކޮށްފައެވެ.
އެމް.އެން.ޔޫ.އެސް.ޔޫގެ 7 ވަނަ ދައުރު ހަމަވާނީ 2019 ވަނަ އަހަރުގެ އެމް.އެން.ޔޫ ޓާރމް 2 ނިމުމާއެކު އެވެ.
ލިޔުނީ: އަނާ އަހްމަދު،
ސެކްރެޓަރީ، އެމް.އެން.ޔޫ.އެސް.ޔޫ
