އެމް.އެން.ޔޫ.އެސް.ޔޫ އިން މިނިސްޓްރީ އޮފް ހޯމް އެފެއާޒްގެ ޕާމަނަންޓް ސެކްރެޓަރީއާ ބައްދަލުކޮށްފި

މިނިސްޓްރީ އޮފް ހޯމް  އެފެއާޒްއާ އެމް.އެން.ޔޫ.އެސް.ޔޫ އާ ދެމެދު އެއްބަސްވުމެއްގައި ސޮއި ކުރުމަށްޓަކައި ހޯމް މިނިސްޓްރީގެ ޕާމެނަންޓް ސެކްރަޓަރީއާ މަޝްވަރާކޮށްފިއެވެ.

މި ބައްދަލުވުން ކުރިޔަށްދިޔައީ މިނިސްޓްރީ އޮފް ހޯމް އެފެއާޒްގެ ކޮންފަރެންސްރޫމުގައެވެ. މި ބައްދަލުވުމުގައި ހޯމް މިނިސްޓްރީގެ ފަރާތުން ބައިވެރިވެވަޑައިގަތީ ހޯމް މިނިސްޓްރީގެ ޕާމެނަންޓް ސެކްރަޓަރީ އަލްފާޟިލް އިބްރާހީމް ހަމީދާއި ސީނިއާ އެގްޒެކެޓިވް ޑިރެކްޓަރ އަލްފާޟިލް އަރުޝަދް އަޝްރަފެވެ. އެމް.އެން.ޔޫ.އެސް.ޔޫގެ ފަރާތުން ބައިވެރިވީ އެމް.އެން.ޔޫ.އެސް.ޔޫގެ ރައީސް މުހައްމަދު ޝާން އާމިރާއި، ނައިބް ރައީސް ގޮފިތައް (އަލީ ޝަމްޢޫން) ، ސެކްރެޓަރީ (އަނާ އަހުމަދް) ، މީޑިއާ ކޯޑިނޭޓަރ (އާމިނަތު ޝަމާ މުހައްމަދު) އަދި ބައެއް ގޮފިތަކުގެ މެމްބަރުންނެވެ.

މިބައްދަލުވުމުގައި ވާހަކަފުޅު ދައްކަވަމުން ހޯމް މިނިސްޓްރީގެ ޕާމަނަންޓް ސެކްރެޓަރީ (ޕީ.އެސް) ވިދާޅުވި ގޮތުގައި، އެމް.އެން.ޔޫ.އެސް.ޔޫއަކީ މިނިސްޓްރީ އިން ހިންގާ ތަފާތު އެކިއެކި ހަރާކާތްތަކުގައި ފުރިހަމަ އެއްބާރުލުމެއް ދީފައިވާ އަދި ފުރިހަމަ އެއްބާރުލުމެއް ދެމުން އަންނަ ބައެކެވެ. އަދި ހޯމް މިނިސްޓްރީގެ ހަރަކާތްތަކުގައި އެމް.އެން.ޔޫ ގެ ދަރިވަރުން ބައިވެރިކުރުމަށް ބޭނުންފުޅުވާކަމަށް ޕީ.އެސް ވިދާޅުވިއެވެ. އަދި ޔޫނިއަން އާއެކު އެމް.އޯ.ޔޫ އެއްގައި ސޮއިކޮށް ދެފަރާތުގެ ގުޅުން އިތުރަށް ބަދަހިކުރުމަށް ބޭނުންފުޅުވާ ވާހަކަވެސް ޕީ.އެސް ވިދާޅުވިއެވެ.

މިބައްދަލުވުމުގައި އެމް.އެން.ޔޫ.އެސް.ޔޫ އިން ވަނީ އެމް.އޯ.ޔޫގައި ހިމަނަން ބޭނުންވާ ބައެއް ކަންތައްތައް ހޯމް މިނިސްޓްރީގެ ޕާމެނެންޓް ސެކެރެޓަރީއާ ހިއްސާ ކޮށްފައެވެ. މިގޮތުން  ހޯމް މިނިސްޓްރީ އިން އެމް.އެން.ޔޫގެ ދަރިވަރުންނަށް އިންޓާންޝިޕްތަކުގައި ބައިވެރިވުމުގެ ފުރުސަތު ފަހިކޮށްދެއްވުމަށް ޔޫނިއަންއިން އެދިފައިވެއެވެ. މީގެ އިތުރުން އިޖްތިމާއީ އެކިއެކި ކަންކަމާއި ގުޅޭގޮތުން ޓްރެއިނިންގް ސެޝަންތަކެއް ކުރިޔަށް ގެންދިޔުމާގުޅޭ ގޮތުންވެސް މަޝްވަރާކުރެވުނެވެ.

މިބައްދަލުވުމުގައި އެމް.އެން.ޔޫ.އެސް.ޔޫގެ ރައީސް މުހައްމަދު ޝާން އާމިރު ވަނީ ހޯމް މިނިސްޓްރީއިން ހިންގާ އެކިއެކި ހަރަކާތްތަކުގައި އެމް.އެން.ޔޫ.އެސް.ޔޫގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ދެއްވާފައެވެ.

ލިޔުނީ: ޝަމާ މުޙައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ