ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި ސޮސައިޓީ އޮފް ޝަރީއާ އެންޑް ލޯ (އެސް.އެސް.އެލް) ގުޅިގެން ރަމަޟާން މަހު ކުރިއަށް ގެންދިޔަ ޤުރުއާން އަދި މަދަޙަ މުބާރާތުގެ ނަތީޖާ ފާޅުކުރުމުގެ ރަސްމިއްޔާތު މިދިޔަ ބުރާސްފަތި ދުވަހުގެރޭ ބާއްވައިފިއެވެ.
މިރަސްމިއްޔާތު ޝަރަފުވެރި ކޮށްދެއްވާފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ ޙަސަން ޙަމީދެވެ.
މިރަސްމިއްޔާތުގައި ޤުރުއާން އަދި މަދަޙަ މުބާރާތުގެ ފަނޑިޔާރުކަން ކުރެއްވި ފަރާތްތަކަށް ރިފަރެންސް ލެޓަރ ހަވާކުރުމާއި، ޤުރުއާން އަދި މަދަޙަ މުބާރާތުގައި ބައިވެރިވި ފެކަލްޓީތަކަން ހަނދާނީ ލިޔުން ހަވާލުކުރުން އޮތެވެ.
ޤުރުއާން މުބާރާތުން ބަލައިގެން ކިޔެވުމުގެ ގޮފިން ފަސް ވަނައަކާއި ނުބަލާ ކިޔެވުމުގެ ގޮފިން ތިން ވަނައެއް ވަނީ ހޮވާފައެވެ. ބަލައިގެން ކިޔެވުމުގެ ގޮފިން އެއްވަނަ ޙާޞިލްކުރީ ސެންޓަރ ފޯ ފައުންޑޭޝަން ސްޓްޑީޒްގެ ދަރިވަރު، ޖަމީލާ އަފްނާން ޙުސައިންއެވެ. ނުބަލާ ކިޔެވުމުގެ ގޮފިން އެއްވަނަ ހޯދީ ފެކަލްޓީ އޮފް އެޑިއުކޭޝަންގެ ދަރިވަރު، ސަމްހާ ޢަލީ ރިޒާއެވެ. ޤުރުއާން މުބާރާތުގެ އެންމެ މޮޅު ފެކަލްޓީއަކަށް ހޮވިފައިވަނީ ސެންޓަރ ފޯ ފައުންޑޭޝަން ސްޓަޑީޒްއެވެ.
މަދަޙަ މުބާރާތުން އަންހެން އަދި ފިރިހެން ވަކިން ފަސް ވަނައެއް ވަނީ ހޮވާފައެވެ. ފިރިހެން ކުދިންގެ ބައިން އެއްވަނަ ޙާޞިލްކުރީ .އެމް.އެން.ޔޫ ބިޒްނަސް ސްކޫލްގެ ދަރިވަރު ޢީސާ އަލޫފް އިބްރާހީމްއެވެ. އަންހެން ކުދިންގެ ބައިން އެއްވަނަ ޙާޞިލްކުރީ އެމް. އެން. ޔޫ ބިޒްނަސް ސްކޫލްގެ ދަރިވަރު، ޢާއިޝަތު ނަބާހަތު ވަޙީދެވެ. މަދަޙަ މުބާރާތުގެ އެންމެ މޮޅު ފެކަލްޓީއަކަށް ހޮވުނީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްއެވެ.
މީގެ އިތުރުން މި ރަސްމިއްޔާތުގައި ވަނީ ފާއިތުވި ރަމަޟާން މަހު ބޭއްވުނު ދީނީ ސުވާލު މުބާރާތުން ބޮޑު އިނާމު ޙާޞިލްކުރި، ރ. ވާދޫ، ނަސީމީވިލާ، ޢަބްދުﷲ ޢާރިފަށް އިނާމު ޙަވާލުކޮށްފައެވެ.
ރަސްމިއްޔާތު ނިންމުމުގެ ގޮތުން ވާހަކަފުޅު ދައްކަވަމުން ދަރިވަރުންގެ ޔޫނިއަންގެ ރައީސް މުޙައްމަދު ޝާން ޢާމިރު ވަނީ މިފަދަ މުބާރާތްތަކުގައި ބައިވެރިވުމަކީވެސް ކާމިޔާބީއެއްގެ ގޮތުގައި ސިފަކުރައްވާ ދަރިވަރުންނަށް ހިތްވަރު ދެއްވާފައެވެ
”މުބާރާތްތަކަކީ އެމުބާރާތެއްގެ ހުރިހާ ދަރިވަރުންނަށް ވަނަވަނަ ލިބޭނެ މުބާރާތްތަކެއް ނޫން. އެހެންނަމަވެސް މިފަދަ މުބާރާތްތަކުގައި ބައިވެރިވުމަކީވެސް ހަމަ ވަރަށް ބޮޑު ކާމިޔާބީއެއް.“
ޔޫނިއަންގެ ރައީސް މުހައްމަދު ޝާން ޢާމިރު
ޔޫނިއަންގެ ރައީސް ވަނީ މުބާރާތް ކާމިޔާބު ކަމާއެކު ނިންމާލެވުނު ކަމަށްޓަކައި މުބާރާތުގައި ބައިވެރިވި ދަރިވަރުންނަށާއި، ޝަރަފުވެރި މެޙެމާން، އެމް.އެން.ޔޫގެ ޗާންސެލަރ އަދި ވައިސް ޗާންސެލަރ އަށާއި، ޑީން އޮފް ސްޓޫޑަންޓްސްއަށާއި، ފަނޑިޔާރުންނަށާއި، މުބާރާތުގައި އެހީތެރިވެދިން ފެކަލްޓީތަކުގެ ވެރިންނާއި ދަރިވަރުންގެ ގޮފިތަކަށާއި، މުބާރާތް އިންތިޒާމުކުރުމުގައި ބައިވެރިވި ސޮސައިޓީ އޮފް ޝަރީއާ އެންޑް ލޯގެ ހިންގާ ކޮމިޓީއާއި، ލީޑާރސް ގްރޫޕާއި، އެމް.އެން.ޔޫގެ ހިންގާ ކޮމިޓީއަށް ޝުކުރުއަދާކުރައްވާފައެވެ.
ލިޔުނީ: އައިމިނަތު ޝީޒާ،
އެމް.އެންޔޫ.އެސްޔޫ މީޑިޔާ
