އެމް.އެން.ޔޫ.އެސްޔޫ ބަހުސް މުބާރާތުގެ ފައިނަލުގައި ވާދަކުރާނީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް) ގެ ދެ ޓީމެވެ.
ކުރީ އަހަރުތަކާ ހިލާފަށް މިމުބާރާތުގައި ކޮންމެ ފެކަލްޓީއަކުން ދެ ޓީމަށް ބައިވެރިވުމުގެ ފުރުސަތު ހުޅުވާލާފައިވާއިރު އެފް.އެލް.އައި.އެސް ގެ ދެ ޓީމު ވެސް ވަނީ ފައިނަލުގެ ޖާގަ ކަށަވަރު ކޮށްފައެވެ.
ރޭ ބޭއްވި ބަހުސް މުބާރާތުގެ ސެމީ ފައިނަލުގެ ވާދަވެރި ބަހުސްއަށްފަހު، 926-865 އިން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް)ގެ ބީ ޓީމު ވަނީ ފެކަލްޓީ އޮފް އާރޓްސް (އެފް.އޭ)ގެ އޭ ޓީމުގެ މައްޗަށް ކުރި ހޯދައި ފައިނަލަށް ދަތުރު ކޮށްފައެވެ. މި ބަހުސްގެ އެންމެ މޮޅު ބަހުސް ކުރުންތެރިއަކަށް، 338 ޕޮއިންޓާއެކު ހޮވިފައިވަނީ އެފް.އެލް.އައި.އެސްގެ ބީ ޓީމުގެ އަހުމަދު ތޯއިލެވެ.
ބަހުސްގެ ތެރެއިން | ފޮޓޯ: އެމް.އެން.ޔޫ.އެސް.ޔޫ މީޑިއާ
ފެކަލްޓީ އޮފް ލޯ އެންޑް އިސްލާމިކް ސްޓަޑީޒް (އެފް.އެލް.އައި.އެސް)ގެ އޭ ޓީމުވަނީ ދެވަނަ ބުރުގައި ކުރި ބަހުސްއިން އެންމެ މަތިން ޕޮއިންޓް ހޯދައި ފައިނަލަށް ގޮސްފައެވެ. އެފް.އެލް.އައި.އެސް އޭ ޓީމް ފައިނަލަށް ދިޔައީ 857 ޕޮއިންޓާއެކުއެވެ.
ސެޕްޓެމްބަރ 3 ވާ އަންގާރަ ދުވަހު މުބާރާތުގެ ފައިނަލް ބޭއްވުމަށް ހަމަޖެހިފައިވާއިރު މުބާރާތުގައި ބަހުސް ކުރާނެ މަޢުޟޫއަކީ ”ޤައުމެއްގެ ކުރިއެރުމަށް އެންމެ މުހިންމު ކަމަކީ އަދުލް އިންސާފް ޤާއިމްވެފައި އޮތުމެވެ.“ އެފް.އެލް.އައި.އެސް ޓީމް އޭ އިން މަޢުޟޫއާ އެއްކޮޅަށް ބަހުސް ކުރަން ހަމަޖެހިފައިވާއިރު އެފް.އެލް.އައި.އެސް ގެ ޓީމް ބީ އިން ބަހުސް ކުރާނީ މަޢުޟޫއާ ދެކޮޅަށެވެ.
މިދިޔަ އަހަރުގެ ބަހުސް މުބާރާތުގެ ފައިނަލުގައި ވާދަކުރީ ފެކަލްޓީ އޮފް އެޑިއުކޭޝަން އާއި އެމްއެންޔޫ ބިޒްނަސް ސްކޫލެވެ.
ލިޔުނީ: ޝަމާ މުޙައްމަދު
މީޑިއާ ކޯޑިނޭޓަރ އެމް.އެން.ޔޫ.އެސް.ޔޫ
