ދިވެހިރާއްޖޭގެ ގައުމީ ޔުނިވަސިޓީ ދަރިވަރުންގެ ޔޫނިއަންގެ (އެމް.އެން.ޔޫ.އެސް.ޔޫ) ރައީސް މުހައްމަދު ޝާން ޢާމިރު އަދި އެމް.އެން.ޔޫ.އެސް.ޔޫގެ އެޑްވައިޒަރީ ބޯޑު މެންބަރު އަރުޝަދު އަޝްރަފް ތިނަދޫއަށް ކުރެއްވި ދަތުރުގައި ތިނަދޫ ކެމްޕަހުގެ ދަނާލުގައި ދިރިއުޅޭ ދަރިވަރުންނާއި ބައްދަލު ކޮށްފިއެވެ. މި ދަތުރުގައި އެމް.އެން.ޔޫގެ ހަތަރު ދަރިވަރުންވެސް ވަނީ ބައިވެރި ވެފައެވެ. އެއީ:
- ފާތިމަތު ނަޒާހާ ނަޒީމް (ސެންޓަރ ފޯ ފައުންޑޭޝަން ސްޓަޑީޒްގެ ގޮފި ތަރަޙައިގެ ސެކްރެޓަރީ)
- މަރިޔަމް ރިފްގާ މުހައިމިން (އެމް.އެން.ޔޫ ބީ.އެސް ގެ ގޮފި ބީ.އެސް.އެސް.އޭގެ ސެކްރެޓަރީ)
- ޢާއިޝަތު ދީނާ އަޙްމަދު ( ސެންޓަރ ފޯ ފައުންޑޭޝަން ސްޓަޑީޒް، އެމް.އެން.ޔޫ.އެސް.ޔޫ ލީޑާޒް ގްރޫޕް މެމްބަރ)
- އިމްތިޝާލް އަޙްމަދު ނަޢީމް (އެސް.އެން، އެމް.އެން.ޔޫ.އެސް.ޔޫ ލީޑާޒް ގޮރޫޕް މެމްބަރ)
މިބައްދަލުވުމުގައި ދަރިވަރުންނަށް ދިމާވެފައިވާ ދަތިތަކާމެދު މަޝްވަރާ ކުރެވުނެވެ. މީގެ އިތުރުން ދަރިވަރުންނަށް ދިމާވެފައިވާ ދަތިތަކަށް ހައްލެއް ހޯދުމަށްވެސް ވަނީ ވާހަކަދެކެވިފައެވެ. އަދި މި ބައްދަލުވުމުގެ ތެރެއިން، އެމް.އެން.ޔޫ.އެސް.ޔޫގެ ފަރާތުން ތިނަދޫ ކެމްޕަހުގެ ދަރިވަރުންނަށް ހަދިޔާ ކުރެވުނު ވޮލީ ބޯޅަ ކުޅުމުގައި ބޭނުންކުރާ ބައެއް ސާމާނު ވަނީ ތިނަދޫ ކެމްޕަސް ގޮފި، ނޭކައިގެ ރައީސާ އަރީޝާ ހަބީބަށް ހަވާލުކުރެވިފައެވެ.
މި ބައްދަލުވުމަކީ އެމް.އެން.ޔޫ.އެސް.ޔޫއިން ސިލްސިލާ ގޮތެއްގައި ކެންޕަސް ދަރިވަރުންނާއިއެކު ބޭއްވޭ ބައްދަލުވުންތަކުގެ ތެރެއިން ބައްދަލުވުމެކެވެ. މީގެކުރިން 2018ވަނަ އަހަރު މާލޭ ކެންޕަހުގެ ދަނާލުގެ ދަރިވަރުންނާއި، ކުޅުދުއްފުށީ ކެންޕަހުގެ ދަނާލުގެ ދަރިވަރުންގެ އިތުރުން ގަން ކެމްޕަހުގެ ދަރިވަރުންނާއި ބައްދަލުކޮށްފައިވެއެވެ.
ލިޔުނީ: އަނޫފާ އަލީ
އެމް.އެން.ޔޫ.އެސް.ޔޫ މީޑިއާ
