ޔުނިވަރސިޓީ، ކޮލެޖް، އަދި ހައިސްކޫލްތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތް، އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019 މިރޭ ފަށައިފިއެވެ.
މިމުބާރާތުގައި މިރޭ ކުރިއަށް ދިޔައީ ގްރޫޕް ސްޓޭޖުގެ މެޗުތަކެވެ. ފުރަތަމަ ދެމެޗުގައި ވާދަކުރީ އަންހެން ޑިވިޜަންގެ ޓީމުތަކެވެ. ގްރޫޕް އޭގެ އެފް.އެޗް.ޓީ.އެސް އާއި ސައިރިކްސް ކޮލެޖް ބައްދަލުކުރި މެޗު 2-4 ގެ ނަތީޖާއަކުން ކާމިޔާބުކުރީ ސައިރިކްސް ކޮލެޖްގެ ޓީމެވެ. މިމެޗުގެ ކުއީން އޮފް ދަ މެޗަކަށް ހޮވުނީ ސައިރިކްސް ކޮލެޖަށް 3 ގޯލު ޖަހައިދިން ޖާރޒީ ނަންބަރު 5 މަރިޔަމް ވަފާއެވެ.
އަންހެން ޑިވިޜަންގެ ދެވަނަ މެޗުގައި ގްރޫޕް ބީއިން ވާދަކުރީ މެޕްސް ކޮލެޖާއި އެފް.އެޗް.އެސްއެވެ. މިމެޗު ނިމުނީ ދެޓީމުން ކުރެ އެއްވެސް ޓީމަކަށް ގޯލެއް ނުޖެހިއެވެ. މެޗުގެ ކުއީން އޮފް ދަ މެޗަކަށް ހޮވުނީ އެފް.އެޗް.އެސް.ގެ ޖާރޒީ ނަންބަރު 11 ޒިޔާދާ މުޙައްމަދެވެ.
ފިރިހެން ޑިވިޜަންގެ ފުރަތަމަ މެޗުގައި ބައްދަލުލުރީ ގްރޫޕް އޭގެ އެމް.އައި އާއި ސީ.އެފް.އެސް.އެވެ. މިމެޗު އެމް.އައި ކާމިޔާބުކުރީ ސީ.އެފް.އެސް ކޮޅަށް 6 ގޯލު ޖަހައިގެންނެވެ. މެޗުގައި ސީ.އެފް.އެސްގެ ޓީމަށް އެއްވެސް ގޯލެއް ކާމިޔާބު ކުރެވިފައެއް ނުވެއެވެ. މޭން އޮފް ދަ މެޗަކަށް ހޮވުނީ އެމް.އައި ކޮލެޖްގެ ޖާރޒީ ނަންބަރު 5 ޤާސިމް ސަމާމެވެ. އެމް.އައި ކޮލެޖަކީ ފުޓްސަލް ފިއެސްޓާ 2017ގެ ޗެމްޕިއަން ޓީމެވެ.
ފިރިހެން ޑިވިންޜަގެ ދެވަނަ މެޗުގައި ގްރޫޕް ބީއިން ވާދަކުރީ ޕޮލިޓެކްނިކް އާއި އެފް.އެޗް.ޓީ.އެސްއެވެ. މިމެޗުން 2-3 ގެ ނަތީޖާއަކުން ކުރިހޯދީ އެފް.އެޗް.ޓީ.އެސްގެ ޓީމެވެ. މޭން އޮފް ދަ މެޗަކަށް ހޮވުނީ އެފް.އެޗް.ޓީ.އެސްގެ ޖާރޒީ ނަންބަރު 9 އަޙްމަދު ހުނައިފެވެ. އެފް.އެޗް.ޓީ.އެސް އަކީ ފުޓްސަލް 2017 އަދި 2018ގެ ފިރިހެން ޑިވިޜަންގެ ރަނަރަޕް ޓީމެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ) އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7 އެވެ. އަދި ސްޕޮންސަރުންނަކީ ދިރާގު އަދި ވިޒިޓް ލާމް އެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސް އެވެ. އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު
އެމް.އެން.ޔޫ.އެސް.ޔޫ މީޑިއާ
