އެމް.އެން.ޔޫ ބީއެސްއާއި އެވިޑް އެއްވަރުވުމުން އެމް.އައި ކުއާޓަރ ފައިނަލަށް

އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ އަންހެން ޑިވިޜަންގެ ގްރޫޕް ސީއިން އެމް.އެން.ޔޫ ބީއެސް އާއި އެވިޑް ބައްދަލުކުރި މެޗް އެއްވަރުވުމުން އެގްރޫޕުގައި ހިމެނޭ އެމް.އައި ކޮލެޖަށް ކުއާޓަރ ފައިނަލް ކަށަވަރުވެއްޖެއެވެ.

މިމުބާރާތުގައި އަންހެން 12 ޓީމު ވާދަކުރާއިރު، އަންހެން ޑިވިޜަންގެ ކޮންމެ ގްރޫޕެއްގައި ހިމެނެނީ 3 ޓީމެވެ. މިހާތަނަށް ކުއާޓަރ ފައިނަލް ކަށަވަރުވެފައިވާ އަނެއް ދެޓީމަކީ އަންހެން ޑިވިޜަންގެ ގްރޫޕް އޭގެ ސައިރިކްސް ކޮލެޖާއި އެފް.އެލް.އައި.އެސްއެވެ.

މިއަދު ހަވީރު އެމް.އެން.ޔޫ ބީއެސްއާއި އެވިޑް ބައްދަލުކުރި މެޗު ޝަރަފުވެރިކޮށްދެއްވީ ޕޮލިސް ޗީފް ސްޓޭޝަން އިންސްޕެކްޓަރ ޙަސަން ވަޖީޙެވެ. މިމެޗުން ދެޓީމު އެއްވަރުވީ 1-1ގެ ނަތީޖާއަކުންނެވެ. އެންމެ މޮޅު ކުޅުންތެރިއަކަށް ހޮވުނީ އެމް.އެން.ޔޫ ބީއެސްގެ ޖާރޒީ ނަންބަރު 1، ނަހުދާ އަޙްމަދެވެ.

އަންހެން ޑިވިޜަންގެ ގްރޫޕް ބީގައި އެމް.އެން.ޔޫ އެސް.އެން އާއި މެޕްސް ވާދަކުރި މެޗް ޝަރަފުވެރިކޮށްދެއްވީ ނޭޝަނަލް ޔޫތު ކައުންސިލްގެ ރައީސް އަލްފާޟިލް ފަރުޙާން މުޙައްމަދެވެ. މިމެޗު ނިމުނީ ދެޓީމުން ކުރެ އެއްވެސް ޓީމަކަށް ލަނޑެއް ނުޖެހިއެވެ. އެންމެ މޮޅު ކުޅުންތެރިއަކަށް ހޮވުނީ އެމް.އެން.ޔޫ އެސް.އެންގެ ޖާރޒީ ނަންބަރު 6، ރަޝާ ރިޒާއެވެ.

ފިރިހެން ޑިވިޜަންގެ ގްރޫޕް އޭއިން ބައްދަލުކުރީ އެމް.އައި ކޮލެޖާއި ސައިރިކްސް ކޮލެޖެވެ. އެމް.އައި ކޮލެޖަކީ ފުޓްސަލް 2017 ކާމިޔާބުކުރި ޓީމަށްވާއިރު ސައިރިކްސްއަކީ ފުޓްސަލް 2016ގެ ރަނަރަޕް ޓީމެވެ. ވާދަވެރި ކުޅުމަކަށްފަހު މިމެޗު 2-4ގެ ނަތީޖާއަކުން ކާމިޔާބުކުރީ ސައިރިކްސް ކޮލެޖެވެ. މޮޅު ކުޅުންތެރިއަކަށް ހޮވުނީ ސައިރިކްސް ކޮލެޖްގެ ޖާރޒީ ނަންބަރު 6، އަޙްމަދު މަޚްދޫމެވެ.

ފިރިހެން ޑިވިޜަންގެ ގްރޫޕް ޑީއިން ވާދަކުރީ އެމް.އެން.ޔޫ ބީ.އެސްއާއި އެފް.އެޗް.އެސްއެވެ. އެމް.އެން.ޔޫ ބީ.އެސްއަކީ މީގެ ކުރިން ފުޓްސަލް ފިއެސްޓާގެ ތިން ތަށި ނަގާފައިވާ ޓީމެކެވެ. އެމް.އެން.ޔޫ ބީ.އެސްގެ ގިނަ ލަނޑުތަކެއް ފެނިގެން ދިޔަ މިމެޗު އެޓީމު ކާމިޔާބުކުރީ 0-7އިންނެވެ. މޮޅުކުޅުންތެރިއަކަށް ހޮވުނީ އެމް.އެން.ޔޫ ބީ.އެސްގެ ޖާރޒީ ނަންބަރު 8، އަޙްމަދު ރިއުޝާނެވެ.

މިމުބާރާތުގައި ފިރިހެން 15 ޓީމު ވާދަކުރެއެވެ. ފިރިހެން ޑިވިޜަންގެ ގްރޫޕް އޭ،ބީ،ސީ މިތިން ގްރޫޕުގައި ހިމެނެނީ 4 ޓީމެވެ. ގްރޫޕް ޑީގައި ހިމެނެނީ 3 ޓީމެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: ޝީޒާ މުޙައްމަދު
އެމް.އެން.ޔޫ އެސް.ޔޫ މީޑިއާ