ތަފާތު ބޮޑު ނަތީޖާއަކުން އެވިޑް ކޮލެޖް މޮޅުވެ ކުއާޓަރ ފައިނަލަށް ދަތުރުކޮށްފި

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ތިންވަނަ ރޭގެ މެޗުތަކުގައި ޓީމުތަކުގެ މެދުގައި ވާދަވެރި ކުރިމަތިލުންތަކެއްވަނީ ފެނިގެންގޮސްފައެވެ.

މުބާރާތުގެ ތިންވަނަ ދުވަހުގެ މެޗުތައް ދެ ދަންފަޅިއަކަށް ބަހާލައިގެން ކުރިޔަށް ގެންގޮސްފައިވާއިރު ޖުމްލަ 11 މެޗެއްވަނީ ކުޅެފައެވެ. އެގޮތުން ހަވީރު ޖުމްލަ 4 މެޗެއް ކުޅެފައި ވާއިރު ރޭގަނޑު 7 މެޗުވަނީ ކުޅެފައެވެ.

ރޭގަނޑުގެ ފުރަތަމަ މެޗު، އަންހެން ޑިވިޜަނުގެ ގުރޫޕް ޑީގެ އެފް.އޭ އަދި އެފް.އީ ބައްދަލުކުރި މެޗު ޝަރަފުވެރި ކޮށްދެއްވީ ފެކަލްޓީ އޮފް އެޑިއުކޭޝަންގެ ޑީން އަލްފާޟިލާ މަރިޔަމް ފިޒާނާ ރަޝީދެވެ. 0-2 ގެ ނަތިޖާއަކުން މެޗު ކާމިޔާބުކުރީ ފެކަލްޓީ އޮފް އެޑިއުކޭޝަން (އެފް.އީ)އިންނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އީ ޓީމުގެ ޖާރޒީ ނަމްބަރު 9، ޚާތިމާ ޔޫސުފެވެ.

ދެވަނަ މެޗުގައި ބައްދަލުކުރީ އަންހެން ޑިވިޜަނުގެ ގުރޫޕް އޭގެ ދެޓީމުކަމުގައިވާ ސައިރިކްސް ކޮލެޖާއި އެފް.އެލް.އައި.އެސްއެވެ. މިމެޗު ޝަރަފުވެރި ކޮށްދެއްވީ ހާފް ކޯޓް އެމް.ވީގެ ފައުންޑަރ އަލްފާޟިލް އަޙުމަދު އަދުހަމެވެ. ވާދަވެރި ކުޅުމަކަށްފަހު މެޗު ނިމިގެން ދިޔައި 1-1 ގެ ނަތީޖާއަކުން ދެ ޓީމުވެސް އެއްވަރުވެގެންނެވެ. މެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އެލް.އައި.އެސްގެ ޖާރޒީ ނަމްބަރު 13، ޝައުފާ އިބްރާހީމެވެ.

ތިންވަނަ މެޗުގައި ފިރިހެން ޑިވިޜަނުގެ ގުރޫޕް ބީއިން ޕޮލިޓެކްނިކް އަދި ކްލިކް ކޮލެޖު ބައްދަލުކުރިއިރު 0-2 ގެ ނަތީޖާއަކުން ޕޮލިޓެކްނިކް ބަލިކޮށް މެޗު ކާމިޔާބުކުރީ ކްލިކް ކޮލެޖުންނެވެ. މެޗުގެ އެންމެ މޮޅު ކުޅުންތެރިއަކަށް ހޮވުނީ ކްލިކް ކޮލެޖުގެ ޖާރޒީ ނަމްބަރު 5، ހަސަން ސައީދެވެ. މެޗު ޝަރަފުވެރިކޮށްދެއްވީ އެމް.އެން.ޔޫ.އެސް.ޔޫގެ ކުރީގެ ސެކެރެޓަރީ ނާޖިހު އިބްރާހީމެވެ.

ހަތަރުވަނަ މެޗު ގައި ބައްދަލުކުރީ ފިރިހެން ޑިވިޜަނުގެ ގުރޫޕް ސީގެ އެވިޑް ކޮލެޖާއި  ވިލާ ކޮލެޖެވެ. އެވިޑް ކޮލެޖުން ވިލާ ކޮލެޖުގެ މައްޗަށް ކުރި ހޯދީ 1-8 ގެ ތަފާތުކަން ބޮޑު ނަތީޖާއަކުންނެވެ. މެޗުގެ އެންމެ މޮޅު ކުޅުންތެރިއަކަށް ހޮވުނީ އެވިޑް ކޮލެޖުގެ ޖާރޒީ ނަމްބަރު 12، ހުސެއިން ސަވީލެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

 އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: އާމިނަތު ޝަމާ،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ