ޗެމްޕިއަން މެޕްސް ކޮލެޖް ވެސް ކުއާޓަރ އަށް

އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ފިރިހެން ޑިވިޜަންގެ ގްރޫޕް ސްޓޭޖްގައި ރޭ ކުޅުނު ފަހު ތިން މެޗުން ސީ.އެފް.އެސް، އެފް.އެޗް.ޓީ.އެސް އަދި މެޕްސް ކޮލެޖު މޮޅުވެ، 3 ޕޮއިންޓް ނަގައިފިއެވެ.

ފިރިހެން ޑިވިޜަންގެ ގްރޫޕް އޭއިން ސީ.އެފް.އެސް.އާއި އެފް.އޭގެ ޓީމު ވާދަކުރި މެޗު ޝަރަފުވެރި ކޮށްދެއްވީ އެމް.އެން.ޔޫ އެސް.ޔޫ ގެ ނައިބު ރައީސް (ޢަމަލީ)، ޙަސަން ޝާހެވެ. ގްރޫޕް ސްޓޭޖުގެ ފުރަތަމަ މެޗުން ބަލިވެފައިވާ ދެޓީމުގެ ބައްދަލުކުރުން 2-7ގެ ނަތީޖާއަކުން ކާމިޔާބު ކުރީ ސީ.އެފް.އެސްގެ ޓީމެވެ. މެޗުގެ މޮޅު ކުޅުންތެރިއަކަށް ހޮވުނީ ސީ.އެފް.އެސް އަށް ތިން ލަނޑު ކާމިޔާބުކޮށްދިން ޖާރޒީ ނަންބަރު 4، އައިމަން ރަޝީދެވެ.

ގްރޫޕް ބީއިން ވާދަކުރީ އެފް.އެޗް.ޓީ.އެސް އާއި އެފް.އީ.އެސް.ޓީއެވެ. މިމެޗު ޝަރަފުވެރިކޮށްދެއްވީ ހީލާސް ގޮފީގެ ކުރީގެ ރައީސް އަލްފާޟިލް އަޙްމަދު އަޠީޕް އާދަމެވެ. މިމެޗުގައި ވާދަކުރި އެފް.އެޗް.ޓީ.އެސް އަކީ ފުޓްސަލް 2017 އަދި 2018 ވަނަ އަހަރުގެ ރަނަރަޕް ޓީމެވެ.

އެފް.އެޗް.ޓީ.އެސް އާއި އެފް.އީ.އެސް.ޓީގެ ކުރިމަތިލުން ނިމުނީ 1-4 އިން އެފް.އީ.އެސް.ޓީގެ ޓީމު މޮޅުވެގެންނެވެ. މެޗުގެ އެންމެ މޮޅު ކުޅުންތެރިއަކަށް ހޮވުނީ އެފް.އީ.އެސް.ޓީގެ ޖާރޒީ ނަންބަރު 4، އާދަމް ޙާފިޒެވެ.

ގްރޫޕް ސީއިން ވާދަކުރީ 2018ވަނަ އަހަރު ފުޓްސަލްގެ ތަށި އުފުލާފައިވާ މެޕްސް ކޮލެޖާއި އެފް.އެލް.އައި.އެސްގެ ޓީމެވެ. މިމެޗް ޝަރަފުވެރިކޮށްދެއްވީ އެމް.އެން.ޔޫ އެސް.ޔޫގެ ކުރީގެ ނައިބު ރައީސް (ޢިލްމީ)، އަލްއުސްތާޛް ޝާފިޢު އަޙްމަދެވެ. މެޕްސް ކޮލެޖާއި އެފް.އެލް.އައި.އެސްގެ ވާދަވެރި މެޗު ނިމުނީ 4-6 އިން މެޕްސް ކޮލެޖް މޮޅުވެގެންނެވެ.

މެޕްސް ކޮލެޖާއި އެފް.އެލް.އައި.އެސް ވާދަކުރި މެޗުގެ މޮޅު ކުޅުންތެރިއަކަށް ހޮވުނީ މެޕްސް ކޮލެޖަށް ތިން ލަނޑު ކާމިޔާބު ކޮށްދިން ޖާރޒީ ނަންބަރު 10، އަފްރާޙް މުޙައްމަދެވެ. އަފްރާޙް މުޙައްމަދަކީ ޖުމްލަ 5 ލަނޑާއެކު މިހާތަނަށް މުބާރާތުގައި އެންމެ ގިނަ ލަނޑު ޖަހައިދިން އެއް ކުޅުންތެރިޔާއެވެ. 5 ލަނޑާއެކު އެއްވަނައިގައި އުޅޭ ދެވަނަ ކުޅުންތެރިޔަކީ އެވިޑް ކޮލެޖްގެ ޖާރޒީ ނަންބަރު 9، ރިޙާމް ޢަބްދުލްޣަނީއެވެ.

މިހަފްތާގެ މެޗުތައް ނިމުނުއިރު ފިރިހެން ޑިވިޜަންގެ ޓީމުތަކުގެ ތެރެއިން ކުއާޓަރ ފައިނަލް ޔަޤީންވީ ދެޓީމަށެވެ. އެއީ ގްރޫޕް ސީއިން 6 ޕޮއިންޓް ނަގާފައިވާ ދެޓީމު، މެޕްސް ކޮލެޖާއި އެވިޑް ކޮލެޖެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ