ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019″ގައި ގްރޫޕް ސްޓޭޖުގެ 23 މެޗު މިހާރު ވަނީ ކުޅެވިފައެވެ.
މި މުބާރާތުގެ މެޗުތައް ފެށުނީ 2019 ސެޕްޓެމްބަރ 12ވީ ބުރާސްފަތި ދުވަހުގެ ރެޔެވެ. އެރޭ ޖުމްލަ 8 މެޗު ކުޅެވިފައިވާއިރު، ކޮންމެ ޑިވިޝަނަކުން ކުޅެވުނީ 4 މެޗެވެ.
މުބާރާތުގެ ހުޅުވުމުގެ ރަސްމިއްޔާތު ބޭއްވުނީ 2019 ސެޕްޓެމްބަރ 13ވީ ހުކުރުދުވަހުގެ ރެޔެވެ. އެރޭ ވަނީ އަންހެން ޑިވިޝަނުގެ 1 މެޗާއި، ފިރިހެން ޑިވިޝަނުގެ 3 މެޗާއެކު ޖުމްލަ 4 މެޗެއް ކުޅެވިފައެވެ.
މުބާރާތުގައި ދެން މެޗުތައް ކުޅެވުނީ 2019 ސެޕްޓެމްބަރ 14ވީ ހޮނިހިރުދުވަހެވެ. އެދުވަހު ހަވީރު 4 މެޗެއްވަނީ ކުޅެވިފައެވެ.
އަދި އެދުވަހުގެރޭ 7 މެޗެއްވަނީ ކުޅެވިފައެވެ.
މުބާރާތުގެ މިހާތަނަށް އައިއިރު، އަންހެން ޑިވިޝަނުން ކުއާޓަރ ފައިނަލަށް ދަތުރުކޮށްފައިވަނީ އެފް.އެލް.އައި.އެސް އަދި ސައިރިކްސް ކޮލެޖެވެ. ސައިރިކްސް ކޮލެޖް ކުއާޓަރ ފައިނަލަށް ދަތުރުކުރީ ގްރޫޕް އޭގެ އެއްވަނަ ޓީމުގެ ގޮތުގައެވެ. އަދި އެފް.އެލް.އައި.އެސް ދަތުރުކުރީ ގްރޫޕް އޭގެ ދެވަނަ ޓީމުގެ ގޮތުގައެވެ.
ފިރިހެން ޑިވިޝަނުން ކުއާޓަރ ފައިނަލަށް ދަތުރުކޮށްފައިވަނީ މެޕްސް ކޮލެޖް އަދި އެވިޑް ކޮލެޖެވެ.
މުބާރާތުގެ މެޗުތައް ދެން އޮންނާނީ 2019 ސެޕްޓެމްބަރ 19 ވާ ބުރާސްފަތި ދުވަހެވެ. އެދުވަހު ހަވީރާއި ރޭގަނޑު މެޗުތައް އޮންނައިރު، އެދުވަހު ގްރޫޕް ސްޓޭޖްގެ ހުރިހާ މެޗެއް ނިމޭނެއެވެ. އަދި އޭގެ އަނެއް ދުވަހުގެރޭ ކުއާޓަރ ފައިނަލްގެ މެޗުތައް ކުޅެވޭނެއެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: އާމިނަތު ޝަމާ،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
