އެމް.އައި އަދި ސައިރިކްސް ކޮލެޖުން ކުއާޓަރ ފައިނަލުގެ ޖާގަ ކަށަވަރުކޮށްފި!

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ 2019 ގެ ހަތަރުވަނަ ރޭގެ ފުރަތަމަ މެޗުގައި ފިރިހެން ޑިވިޝަންގެ ގްރޫޕް އޭގެ އެމް.އައި ކޮލެޖް އަދި ފެކަލްޓީ އޮފް އާރޓްސް ގެ ކުރިމަތިލުން އެމް.އައި ކޮލެޖުން ކާމިޔާބުކުރީ 0-23 ގެ ތަފާތު ބޮޑު ނަތީޖާ އަކުންނެވެ. އެމް.އައި ކޮލެޖަށް ޖުމްލަ 14 ލަނޑު ކާމިޔާބުކޮށްދީ މެޗުގެ އެންމެ މޮޅު ކުޅުންތެރިއަކަށް ހޮވުނީ އެކޮލެޖުގެ ޖާރޒީ ނަމްބަރު 8، އަކްމަލް މުހައްމަދެވެ. އަދި އޭނާ އަކީ މުޅި މުބާރާތުގައި މިހާތަނަށް އެންމެ ގިނަ ލަނޑު ޖަހައިފައިވާ ކުޅުންތެރިއާއެވެ.

ދެވަނަ މެޗުގައި ފިރިހެން ޑިވިޝަންގެ ގްރޫޕް އޭއިން ބައްދަލުކުރީ ސީ.އެފް.އެސް އަދި ސައިރިކްސް ކޮލެޖެވެ. 1-2 ގެ ނަތީޖާ އަކުން މެޗު ކާމިޔާބުކުރީ ސައިރިކްސް ކޮލެޖެވެ. އަދި މިމެޗުގެ އެންމެ މޮޅު ކުޅުންތެރިއަކަށް ހޮވުނީ ސައިރިކްސް ކޮލެޖުގެ ޖާރޒީ ނަމްބަރު 11، އިސްމާއިލް މަމްދޫހެވެ.

ފިރިހެން ޑިވިޝަންގެ ގްރޫޕް އޭގެ ގްރޫޕް ސްޓޭޖް މެޗުތައް ކުޅެނިމިފައިވާއިރު އެމް.އައި އަދި ސައިރިކްސް ކޮލެޖުން ވަނީ އެފް.އޭ އަދި ސީ.އެފް.އެސް ބަލިކޮށް މުބާރާތުގެ ކުއާޓަރ ފައިނަލުގެ ޖާގަ ކަށަވަރުކޮށްފައެވެ. ޖުމްލަ 9 ޕޮއިންޓާއެކު ޕޮއިންޓް ތާވަލުގެ އެއްވަނައިގައި އޮތީ ސައިރިކްސް ކޮލެޖެވެ. 6 ޕޮއިންޓާއެކު ތާވަލުގެ ދެވަނައިގައި އޮތީ އެމް.އައި ކޮލެޖެވެ.

މުބާރާތުގެ ކުއާޓަރ ފައިނަލުގައި ސައިރިކްސް ކޮލެޖް ގްރޫޕް ސީގެ މެޕްސް ކޮލެޖާއި ބައްދަލުކުރަން ހަމަޖެހިފައިވާއިރު އެމް.އައި ކޮލެޖް ވާދަ ކުރާނީ ގްރޫޕް ސީގެ އެއްވަނަ ޓީމު އެވިޑް ކޮލެޖާއެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

 އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޝަނާއި އަންހެން ޑިވިޝަން ހިމެނެއެވެ. މުބާރާރުގައި އަންހެން ޑިވިޝަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: ޝަމާ މުޙައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ