އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ފިރިހެން ޑިވިޜަންގެ ގްރޫޕް ބީއިން ކްލިކް ކޮލެޖާއި ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) ކުއާޓަރ ފައިނަލަށް ދަތުރުކޮށްފިއެވެ.
ގްރޫޕް ސްޓޭޖުގައި ރޭ ކުޅުނީ ފިރިހެން ޑިވިޜަންގެ ގްރޫޕް ބީގެ ފަހު ދެމެޗެވެ. ޕޮލިޓެކްނިކާއި ފެސްޓް ވާދަކުރި މެޗު 0-3އިން ކާމިޔާބު ކުރީ ފެސްޓް އެވެ. މެޗުގެ މޮޅު ކުޅުންތެރިއަކަށް ހޮވުނީ ފެސްޓްގެ ޖާރޒީ ނަންބަރު 9، ޠަލާލް ނަޞީރެވެ.
ހަމަ މިގްރޫޕުން ދެން ވާދަކުރީ ކުރީ އެފް.އެޗް.ޓީ.އެސްއާއި ކްލިކް ކޮލެޖެވެ. މިމެޗުން 0-1ގެ ނަތީޖާއިން މޮޅުވީ ކްލިކް ކޮލެޖެވެ. މޮޅު ކުޅުންތެރިއަކަށް ހޮވުނީ ކްލިކް ކޮލެޖްގެ ހަމައެކަނި ލަނޑު ކާމިޔާބުކޮށްދިން ޖާރޒީ ނަންބަރު 11، ޖާވިދް ޢަލީއެވެ.
މިނަތީޖާއަށްފަހު ގްރޫޕްގެ އެއްވަނަ ޓީމެއްގެ ގޮތުގައި 9 ޕޮއިންޓާއެކު ކުއާޓާރ ފައިނަލުން ޖާގަހޯދީ ކުޅުނު ތިންމެޗުންވެސް މޮޅުވެފައިވާ ކްލިކް ކޮލެޖެވެ. ގްރޫޕްގެ ދެވަނަ ޓީމެއްގެ ގޮތުގައި 6 ޕޮއިންޓާއެކު ކުއާޓަރ ފައިނަލަށް ދަތުރުކުރީ ފެސްޓެވެ. 2017 އަދި 2018ގެ ރަނަރަޕް ޓީމް އެފް.އެޗް.ޓީ.އެސް ވަނީ ޕޮލިޓެކްނިކްއާއިއެކު ގްރޫޕް ސްޓޭޖުން ކަޓާފައެވެ.
ގްރޫޕް އޭއިން މޮޅުވާ ދެޓީމު ކުއާޓާ ފައިނަލުގައި ބައްދަލުކުރާގޮތަށް ހަމަޖެހިފައިވަނީ ގްރޫޕް ޑީއިން މޮޅުވި ދެޓީމާއެވެ. ކްލިކް ކޮލެޖްގެ ޓީމު ވާދަކުރާނީ ގްރޫޕް ޑީގެ ދެވަނަ ޓީމު، އެފް.އެޗް.އެސްއާއެވެ. ފެސްޓް ވާދަކުރާނީ ގްރޫޕް ޑީގެ އެއްވަނަ ޓީމު، އެމް.އެން.ޔޫ ބީ.އެސްއާއެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
