މުބާރާތުގެ ކުއާޓަރ ފައިނަލުގައި ޗެމްޕިއަން މެޕްސް އަދި ސައިރިކްސް ކޮލެޖުގެ ކުރިމަތިލުމެއް!

ގްރޫޕް ސްޓޭޖްގެ މެޗުތައް ނިމި ކުއާޓަރ ފައިނަލުގައި ވާދަ ކުރާ ޓީމުތައް މިރޭ ކަށަވަރުވެއްޖެއެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ 2019 ގެ ގްރޫޕް ސްޓޭޖްގެ އެންމެ ފަހު މެޗުތައް މިރޭ ކުޅެނިމިފައިވާއިރު، ފިރިހެން ޑިވިޝަންގެ ގްރޫޕް ސީގެ އެވިޑް ކޮލެޖް އަދި މެޕްސް ކޮލެޖް ބައްދަލުކުރި މެޗު 3-7 ގެ ނަތީޖާ އަކުން 2018 ވަނަ އަހަރުގެ ޗެމްޕިއަން މެޕްސް ކޮލެޖް ބަލިކޮށް މެޗު ކާމިޔާބުކުރީ އެވިޑް ކޮލެޖެވެ. ޖުމްލަ ފަސް ލަނޑު ޓީމަށް ކާމިޔާބުކޮށްދީ މެޗުގެ އެންމެ މޮޅު ކުޅުންތެރިއާގެ މަޤާމް ހާޞިލް ކުރީ މެޕްސް ކޮލެޖުގެ ޖާރޒީ ނަމްބަރު 12، ހުސައިން ސަވީލެވެ.

ގްރޫޕް ސްޓޭޖުގެ އެންމެފަހު މެޗުން ވިލާ ކޮލެޖު މޮޅުވީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްއާ ވާދަކޮށް 0-1 ގެ ނަތީޖާއަކުންނެވެ. މެޗުގެ އެންމެ މޮޅު ކުޅުތެރިއަކަށް ހޮވުނީ ވިލާ ކޮލެޖަށް ލަނޑު ކާމިޔާބު ކޮށްދިން ޖާރޒީ ނަމްބަރު 14، މިންހާޖް އާދަމެވެ.

މި ނަތީޖާއާއެކު ފިރިހެން ޑިވިޝަންގެ ގްރޫޕް ސީއިން ކުއާޓަރ ފައިނަލުގެ ޖާގަ ކަށަވަރުކުރީ އެވިޑް ކޮލެޖާއި މެޕްސް ކޮލެޖެވެ. އެގޮތުން 9 ޕޮއިންޓާއެކު ޕޮއިންޓް ތާވަލުގެ އެއްވަނައިގައި އޮތީ ގްރޫޕް ސީގެ އެވިޑް ކޮލެޖެވެ. 6 ޕޮއިންޓާއެކު ލަނޑުގެ ތަފާތުން ތާވަލުގެ ދެވަނައިގައި އޮތީ ޗެމްޕިއަން މެޕްސް ކޮލެޖެވެ.

ކުއާޓަރ ފައިނަލުގައި  މެޕްސް ކޮލެޖް ވާދަކުރަން ހަމަޖެހިފައިވަނީ ގްރޫޕް އޭގެ އެއްވަނަ ޓީމު ސައިރިކްސް ކޮލެޖާއެވެ. އެވިޑް ކޮލެޖް ވާދަކުރާނީ ގްރޫޕް އޭއިން ކުއާޓަރ ފައިނަލަށް ދަތުރުކުރި ދެވަނަ ޓީމު އެމް.އައި ކޮލެޖާއެވެ.

މުބާރާތުގެ ކުއާޓަރ ފައިނަލުގެ މެޗުތައް ކުޅުމަށް ހަމަޖެހިފައިވަނީ 20 ސެޕްޓެމްބަރ ވާ ހުކުރު ދުވަހުގެ ރޭ 20:00ގައެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

 އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޝަނާއި އަންހެން ޑިވިޝަން ހިމެނެއެވެ. މުބާރާރުގައި އަންހެން ޑިވިޝަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: ޝަމާ މުޙައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ