އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ އަންހެން ޑިވިޜަންގެ ސެމީ ފައިނަލުގެ ފުރަތަމަ މެޗުގައި ކުޅޭނީ ސައިރިކްސް ކޮލެޖާއި، ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަނުންކަން ޔަގީންވެއްޖެއެވެ. މިދެޓީމު ސެމީ ފައިނަލުން ޖާގަ ކަށަވަރުކުރީ ރޭ ކުޅެވުނު ކުއާޓާރ ފައިނަލްގެ މެޗުތަކުން މޮޅުވެގެންނެވެ.
ކުއާޓަރ ފައިނަލުގައި ރޭ ސައިރިކްސް ކޮލެޖާއި އެމް.އެން.ޔޫ ބިޒްނަސް ސްކޫލް ވާދަކުރި މެޗު ސައިރިކްސް ކާމިޔާބުކުރީ 0- 2އިންނެވެ. މޮޅު ކުޅުންތެރިއަކަށް ހޮވުނީ ސައިރިކްސްގެ ޖާރޒީ ނަންބަރު 5، މަރިޔަމް ވަފާއެވެ.
ކުއާޓަރ ފައިނަލްގެ ދެވަނަ މެޗުގައި ވާދަކުރީ އެމް.އެން.ޔޫގެ ސްކޫލް އޮފް ނަރސިން (އެސް.އެން)އާއި ފެކަލްޓީ އޮފް އެޑިއުކޭޝަން (އެފް.އީ)އެވެ. މިމެޗު 0-2ގެ ނަތީޖާއަކުން ކާމިޔާބުކުރީ އެފް.އީއެވެ. މޮޅު ކުޅުންތެރިއަކަށް ހޮވުނީ އެފް.އީގެ ޖާރޒީ ނަންބަރު 5، އާމިނަތު ފަސީޙާއެވެ.
ސައިރިކްސް ކޮލެޖާއި އެފް.އީ ބައްދަލުކުރާ މެޗު އޮންނާނީ ސެޕްޓެންބަރ 26ވާ ބުރާސްފަތި ދުވަހުގެރެޔެވެ. މިމެޗު ފެށުމަށް ހަމަޖެހިފައިވަނީ އެރޭ 08.00ގައެވެ.
އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.
ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ
