ފިރިހެން ފައިނަލުގައި އެވިޑް އަދި ސައިރިކްސްގެ ވަރުގަދަ ކުރިމަތިލުމަކަށް!

ވަރުގަދަ ކުރިމަތިލުންތަކަކަށްފަހު އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ފިރިހެން ޑިވިޜަންގެ ފައިނަލުން ޖާގަ ހޯދީ ސައިރިކްސް ކޮލެޖާއި އެވިޑް ކޮލެޖެވެ. މިދެޓީމު ފައިނަލުން ޖާގަ ކަށަވަރުކުރީ ރޭ ކުޅެވުނު ސެމީފައިނަލްގެ މެޗުތަކުން މޮޅުވެގެންނެވެ. މި 2 ޓީމުވެސް ފައިނަލަށް ދަތުރުކުރީ މުބާރާތުގައި ކުޅުނު އެއްވެސް މެޗަކުން ބަލިނުވެއެވެ.

ސެމީ ފައިނަލުގައި ރޭ ސައިރިކްސްއާއި ކްލިކް ކޮލެޖް ވާދަކުރި މެޗު ޝަރަފުވެރިކޮށްދެއްވީ ސައިރިކްސް ކޮލެޖްގެ ރެކްޓަރ ޑރ. ޢަލީ ފަވާޒް ޝަރީފް، ވައިސް ރެކްޓަރ ޢަބްދުﷲ ނާޒިމް އިބްރާހީމް، އަދި ކްލިކް ކޮލެޖްގެ ޑީން މަރިޔަމް ޝިފްނާއެވެ. ވާދަވެރި ކުޅުމެއް ފެނިގެންދިޔަ މެޗުގެ ފުރިހަމަ ވަގުތު ހަމަވީ 2-2އިން ދެޓީމު އެއްވަރު ވެގެންނެވެ.

ދެޓީމު އެއްވަރުވުމުން ޕެނަލްޓީ ޖަހައިގެން މޮޅުވީ ސައިރިކްސް ކޮލެޖެވެ. އެޓީމު ވަނީ ޖެހި 6 ޕެނަލްޓީގެ ތެރެއިން 5 ޕެނަލްޓީ ކާމިޔާބު ކޮށްފައެވެ. ކްލިކް ކޮލެޖަށް ކާމިޔާބު ކުރެވުނީ 4 ޕެނަލްޓީއެވެ. މެޗުގެ މޮޅު ކުޅުންތެރިއަކަށް ހޮވުނީ ސައިރިކްސްގެ ގޯލު ކީޕަރު، ޖާރޒީ ނަންބަރު 1، ޙަސަން ނަޞީރެވެ.

ސެމީ ފައިނަލްގައި އެވިޑް ކޮލެޖާއި ވާދަކުރީ އެމް.އެން.ޔޫގެ ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީ (ފެސްޓް)އެވެ. މިމެޗު ޝަރަފުވެރި ކޮށްދެއްވީ ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލޮޖީގެ ޑީން ޑރ. ޝަޒްލާ މުޙައްމަދު އަދި އެމް.އެން.ޔޫގެ ޑީން އޮފް ސްޓުޑެންޓްސް ނާދިޔާ އަޙްމަދެވެ.

އެވިޑްއާއި ފެސްޓް ވާދަކުރި މެޗު 0-8އިން ކާމިޔާބުކުރީ އެވިޑް ކޮލެޖެވެ. މެޗުގެ 7 ލަނޑު ފެނިގެންދިޔައީ ފަހު ހާފުގައެވެ. މޮޅު ކުޅުންތެރިއަކަށް ހޮވުނީ އެވިޑް ކޮލެޖަށް ތިން ލަނޑު ކާމިޔާބުކޮށްދިން ޖާރޒީ ނަންބަރު 10، ޙުސައިން ޝުހައިލެވެ. ޙުސައިން ޝުހައިލު ވަނީ ދެވަނަ ހާފުގައި ވިދިވިގެން ދެލަނޑު (މެޗުގެ 2ވަނަ ލަނޑު 24ވަނަ މިނެޓުގައި އަދި 3ވަނަ ލަނޑު 25ވަނަ މިނެޓުގައި) ކާމިޔާބުކޮށް މެޗުގެ ނަތީޖާ ކަށަވަރުކޮށްދީފައެވެ.

ސައިރިކްސްއާއި އެވިޑް މުބާރާތުގެ ފައިނަލް މެޗަށް ނިކުންނާނީ މިއަދު ހަވީރު 04:45ގައެވެ. މިމެޗު އޮންނާނީ އެކުވެނި ވެލިދަނޑުގައެވެ. މިއީ ފުޓްސަލް ފިއެސްޓާގެ ފައިނަލެއްގައި ސައިރިކްސް ވާދަކުރާ ދެވަނަ ފަހަރެވެ. ސައިރިކްސް ކޮލެޖަކީ 2016ވަނަ އަހަރުގެ ރަނަރަޕް ޓީމެވެ.

އެމް.ޑަބްލިއު.އެސް.ސީ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2019ގެ ޓައިޓްލް ސްޕޮންސަރަކީ މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)އެވެ. މި މުބާރާތުގެ ޕްރިންޓިންގ ޕާޓްނަރަކީ އެމް 7އެވެ. ސްޕޮންސަރުންނަކީ ދިރާގު އަދި ވިޒިޓް ލާމްއެވެ. މީޑިއާ ޕާޓްނަރަކީ ޕީ.އެސް.އެމް ސްޕޯޓްސްއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ޘާނަވީ ދާއިރާގައި ބާއްވާ އެންމެބޮޑު ކުޅިވަރު ޙަރަކާތެވެ. މި މުބާރާތް ރާވައި އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިންނެވެ. މި އަހަރު މި ބާއްވަނީ މީގެ 7ވަނަ މުބާރާތެވެ. 2013އިން ފެށިގެން މެދުކެނޑުމެއްނެތި މި މުބާރާތް އަންނަނީ ބާއްވަމުންނެވެ. މި މުބާރާތް ހުޅުވާލާފައިވަނީ އެމް.އެން.ޔޫގެ ފެކަލްޓީތަކާއި ދިވެހިރާއްޖޭގެ އެހެނިހެން ކޮލެޖުތަކަށެވެ. މުބާރާތުގައި ފިރިހެން ޑިވިޜަނާއި އަންހެން ޑިވިޜަން ހިމެނެއެވެ. މުބާރާރުގައި އަންހެން ޑިވިޜަން އެންމެ ފުރަތަމަ ހިމެނީ 2018ވަނަ އަހަރުއެވެ.

ލިޔުނީ: ޝީޒާ މުޙައްމަދު،
އެމް.އެން.ޔޫ.އެސް.ޔޫ މީޑިއާ