އެމް.އެން.ޔޫ.އެސް.ޔޫ އަހުރަ ހޭންޑް ބޯޅަ މުބާރާތުގެ ތަށި ފެނަކަ ބަލިކޮށް އިސްކަންދަރު އެއަރ ބޭސްއިން އުފުލައިލައިފިއެވެ.
މުބާރާތުގެ ފައިނަލުގައި އަންހެން ޑިވިޝަނުން އިސްކަންދަރު އެއަރ ބޭސް އަދި ފެނަކަ ބައްދަލުކުރި މެޗު އިސްކަންދަރު އެއަރ ބޭސް އިން ކާމިޔާބު ކުރީ 13-15 ގެ ނަތީޖާއަކުންނެވެ. މެޗުގެ ފުރަތަމަ ދެ ހާފުގައި ދެ ޓީމުންވެސް ވާދަވެރި ކުޅުމެއް ފެނިގެން ގޮސްފައިވާއިރު މެޗުގެ ފުރިހަމަ ވަގުތު ހަމަވެ މެޗު ނިމިގެންދިޔައީ 11-11 ނަތީޖާއަކުން ދެ ޓީމުވެސް އެއްވަރުވެގެންނެވެ.
މެޗުގެ އިތުރު ވަގުތުކުޅެ، ދެޓީމު އެއްވަރުވެފައި އޮތުމުން ޖެހި ޕެނަލްޓީގައި އިސްކަންދަރު އެއަރ ބޭސްއިން 4 ޕެނަލްޓީ ކާމިޔާބުކޮށްފައި ވާއިރު ފެނަކައަށް ކާމިޔާބުކުރެވުނީ 2 ޕެނަލްޓީއެވެ. މި ނަތީޖާއާއި އެކު އިސްކަންދަރު އެއަރ ބޭސްއިން ވަނީ މުބާރާތުގެ އަންހެން ޑިވިޝަނުގެ ޗެމްޕިއަންކަން ހޯދައިފައެވެ. މި މެޗުގެ އެންމެ މޮޅު ކުޅުންތެރިއަކަށް ހޮވުނީ އިސްކަންދަރު އެއަރ ބޭސްގެ ޖާރޒީ ނަމްބަރު 5، މައީޝާ އަބްދުލް ހަންނާނެވެ.
މުބާރާތުގެ އަންހެން ޑިވިޝަނުގައި ޖުމްލަ 10 ޓީމެއް ބައިވެރިވެފައި ވާއިރު މި ޓީމުތައްވަނީ 3 ގްރޫޕަކަށް ބަހާލެވިފައެވެ.
އެގޮތުން އަންހެން ޑިވިޝަނުގައި ބައިވެރިވި ޓީމުތަކަކީ:
1. އިހައްދޫ ސްކޫލް
2. މޯލްޑިވިއަން
3. ފެނަކަ ކޯޕަރޭޝަން
4. މުންޑޫ ކައުންސިލް
5. ލ.އަތޮޅު ތަޢުލީމީ މަރުކަޒު
6. ދިރާގު
7. ލ. ގަން ކައުންސިލް
8.އިސްކަންދަރު އެއަރ ބޭސް
9. ގަން ރީޖަނަލް ހޮސްޕިޓަލް
10. ލާމު ބްލޫސް
މުޅި މުބާރާތުން އަންހެން ޑިވިޝަނުގެ އެންމެ މޮޅު ކުޅުންތެރިއަކަށް އިސްކަންދަރު އެއަރ ބޭސްގެ ޖާރޒީ ނަމްބަރު 5، މައީޝާ އަބްދުލް ހަންނާން ހޮވިފައިވާއިރު މުބާރާތުގެ ޓޮޕް 6 ކުޅުންތެރިން ހޮވައި ކުޅުންތެރިންނަށްވަނީ ޓްރޮފީ ހަވާލު ކޮށްފައެވެ.
އެގޮތުން އަންހެން ޑިވިޝަންގެ އެންމެ މޮޅު 6 ކުޅުންތެރިންނަކީ:
1. ލާމު އަތަޅު ތަޢުލީމީ މަރުކަޒުގެ ޖާރޒީ ނަމްބަރު 10، މަރިޔަމް ރައުޝަން.
2. މޯލްޑިވިއަން ޖާރޒީ ނަމްބަރު ޖާރޒީ ނަމްބަރު 12، ފާތިމަތު ޝަރުމީލާ.
3. ފެނަކަ ޖާރޒީ ނަމްބަރު 17، އާމިނަތު ލިއުޝާ.
4. އިސްކަންދަރު އެއަރ ބޭސް ޖާރޒީ ނަންބަރު 7،ޝަޙްފާ ޝިއުތު
5. ފެނަކަ ޖާރޒީ ނަންބަރު 13، އައިޝަތު ސަނާ.
6. އިސްކަންދަރު އެއރ ބޭސްގެ ޖާރޒީ ނަމްބަރު 1، އާމިނަތު ޖެނިފާ
މުބާރާތުގެ އަންހެން ޑިވިޝަންގެ އެންމެ މޮޅު ކޯޗަކީ އިސްކަންދަރު އެއަރ ބޭސް ގެ ކޯޗް މައުމޫން އަބްދުއް ސައްތާރެވެ. އަދި މުބާރާތުގެ އަންހެން ޑިވިޝަންގެ ފެއަރޕްލޭ ޓީމަކަށް ހޮވުނީ ލާމު އެޓޯލް އެޑިއުކޭޝަން ސެންޓަރެވެ.
މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ. މި މުބާރާތް ރާވާ އިންތިޒާމު ކުރަނީ ލ. ގަމު ކެމްޕަހުގައި ޤާއިމުކުރެވިފައިވާ އެމް.އެން.ޔޫ.އެސް.ޔޫގެ ގޮފި އަހުރައިންނެވެ. މިފަހަރުގެ މުބާރާތުގައި އެމް.އެން.ޔޫ.އެސް.ޔޫއިން ދަނީ މުބާރާތް އިންތިޒާމުކުރުމުގައި އަމަލީގޮތުން ހަރަކާތްތެރިވަމުންނެވެ.
މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ “ނިރުވާނާ އިން ލާމު” އެވެ. ސްޕޮންސަރުންގެ ތެރޭގައި “ލ. ގަމު ކައުންސިލް”، “ލ. ގަން ޕޮލިސް ސްޓޭޝަން”، “ދިރާގު”، “އައިލެންޑާސް އެސޯސިއޭޝަން”، ”ރިއަލް އައިލެންޑް ސޮސައިޓީ“، ”ކޭ ބޯލަ ބޮޑުބެރު ގްރޫޕް“ ”އެމް.އެން.ޑީ.އެފް ސެންޓްރަލް އޭރިއާ“ އަދި “އަމީގޯސް ސްޕޯޓްސް ކްލަބް” ހިމެނެއެވެ. އަދި ހަމަ އެހެންމެ އެމް.އެން.ޔޫގެ ލ. ގަން ކެމްޕަހުން ދެއްވާ ފުރިހަމަ އެއްބާރުލުމާއި އެހީތެރިކަން ފާހަގަކުރެވެއެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
