ފޯރިގަދަ ކަމާއެކު ކުރިޔަށް މިދާ އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019ގެ ފުރަތަމަ ދުވަހުގެ ހަވީރު ކުޅުނު މެޗުތަކުން ސްކޫލް އޮފް ނާރސިންގް އަދި ސެންޓަރ ފޯ ފައުންޑޭޝަން ސްޓަޑީޒް މޮޅުވެއްޖެއެވެ.
ޓީމުތަކުން ވާދަވެރި ކުޅުމެއް ދައްކުވައިދިން މިމެޗުތައް ފެށީ ހަވީރު 16:00ގައެވެ.
ސްކޫލް އޮފް ނާރސިންގް އަދި ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ ބައްދަލުކުރި މެޗުގައި 05-32 ޕޮއިންޓްގެ ބޮޑު ފަރަގަކުން މެޗު ކާމިޔާބުކުރީ ސްކޫލް އޮފް ނާރސިންގް އިންނެވެ. މި މެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ ސްކޫލް އޮފް ނާރސިންގްގެ އާމިނަތު ފިރުޝާއެވެ.
ހަވީރު ކުޅުނު އެންމެ ފަހު މެޗުގައި ފެކަލްޓީ އޮފް އާރޓްސް ބަލިކޮށް މެޗު ކާމިޔާބުކުރީ ސެންޓަރ ފޮރ ފައުންޑޭޝަން ސްޓަޑީޒްއިންނެވެ. މިމެޗު ސީ.އެފް.އެސްއިން ކާމިޔާބުކުރީ 05-14 ޕޮއިންޓްއިންނެވެ. މެޗުގެ އެންމެ މޮޅު ކުޅުންތެރިޔާގެ މަގާމު ހާޞިލުކުރީ ސީ.އެފް.އެސްގެ އާމިނަތު ފަސީހާއެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
