އެމް.އެން.ޔޫގެ ފެކަލްޓީތަކަށް އަމާޒުކޮށްގެން ބާއްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019ގެ ފުރަތަމަ ދުވަހުގެ މެޗުތައް ކުޅެ ނިމިއްޖެއެވެ.
މުބާރާތުގެ ފުރަތަމަ ދުވަހުގެ މެޗުތައް ކުޅުނީ ތިން ދަންފަޅިއަކަށް ބަހާލައިގެނެވެ. ޖުމްލަ 6 މެޗު ކުޅެފައިވާއިރު ކޮންމެ ދަންފަޅިއަކު ކުޅެފައިވަނީ 2 މެޗެވެ.
މިރޭ ކުޅުނު އެންމެ ފަހު ދެމެޗުގައި ފުރަތަމަ ވާދަކުރީ ފެކަލްޓީ އޮފް ހެލްތު ސައިންސަސް އަދި އެމް.އެން.ޔޫ ބިޒްނަސް ސްކޫލެވެ. ދެޓީމުގެ ފަރާތުން މޮޅު ކުޅުމެއް ފެނިގެން ގޮސްފައިވާ މިމެޗު އެމް.އެން.ޔޫ ބިޒްނަސް ސްކޫލްއިން ކާމިޔާބުކުރީ 30-18 ޕޮއިންޓްއިން ފެކަލްޓީ އޮފް ހެލްތު ސައިންސަސްގެ މައްޗަށް ކުރި ހޯދައިގެނެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ އެމް.އެން.ޔޫ ބިޒްނަސް ސްކޫލުގެ ކުޅުންތެރިޔާ ޝައްމާ އަހުމަދެވެ.
މިރޭގެ އެންމެ ފަހު މެޗުގައި ބައްދަލުކުރީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް އަދި ސްކޫލް އޮފް މެޑިސިންއެވެ. ވާދަވެރި ކުޅުމަކަށްފަހު މެޗު ނިމިގެންދިޔައީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް އިން 13 ޕޮއިންޓް ކާމިޔާބުކޮށް މެޗުން މޮޅުވެގެންނެވެ. ސްކޫލް އޮފް މެޑިސިން އިން ގިނަ ”އެޓަމްޕްޓް“ ތަކެއް ކޮށްފައިވީނަމަވެސް އެޓީމަށް ކާމިޔާބުކުރެވުނީ 2 ޕޮއިންޓްއެވެ. މިމެޗުގެ އެންމެ މޮޅު ކުޅުންތެރިއަކަށް ހޮވިގެންދިޔައީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ- ނައުޝީން އަހުމަދެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019ގެ ދެވަނަ ދުވަހުގެ މެޗުތައް ފެށުމަށް ހަމަޖެހިފައިވަނީ 19 އޮކްޓޯބަރ ވާ ހޮނިހިރު ދުވަހުގެ ހަވީރު 16:00ގައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ނެޓްބޯޅަ މުބާރާތް 2019 އަކީ އެމް.އެން.ޔޫ.އެސް.ޔޫގެ ފަރާތުން ބާއްވާ މިފަދަ ތިންވަނަ މުބާރާތެވެ. މިގޮތުން ފުރަތަމަ މުބާރާތް ބޭއްވުނީ 2015ގައި ކަމަށްވާއިރު، އެ އަހަރުގެ ތަށި އުފުލާލީ އެމް.އެން.ޔޫ ބިޒްނަސް ސްކޫލުންނެވެ. 2016 ވަނަ އަހަރު ބޭއްވުނު 2 ވަނަ މުބާރާތުގެ ޗެމްޕިއަންކަން ފެކަލްޓީ އޮފް ލޯ އެންޑް އިސްލާމިކް ސްޓަޑީޒް އިން ހޯދިއިރު، 2017 އަދި 2018ވަނަ އަހަރު މި މުބާރާތް ބާއްވާފައެއް ނުވެއެވެ. މި މުބާރާތަކީ އެމް.އެން.ޔޫގެ ފެކަލްޓީ/ސެންޓަރތަކަށް ހުޅުވާލައިގެން ބާއްވާ މުބާރާތަކަށްވާއިރު، މި މުބާރާތުގައި ޖުމްލަ 10 ޓީމު މިފަހަރު ވާދަކުރެއެވެ. މި 10 ޓީމާއެކު، އެމް.އެން.ޔޫ.އެސް.ޔޫގެ ގޮފި އުފެދިފައިވާ ހުރިހާ ފެކަލްޓީ/ސެންޓަރތަކެއް މި މުބާރާތުގައި ތަމްސީލުކުރާއިރު، މި މުބާރާތްވެގެންދާނީ ތާރީޚީ މުބާރާތަކަށެވެ.
ލިޔުނީ: އާމިނަތު ޝަމާ މުހައްމަދު،
މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ
